Kitango Kyendeji i kisumpi kityetye kya bene Kidishitu batame kileta bwendeji ku Batumoni ba Yehova ntanda yonso. Bano batutu bengilanga mingilo ibidi:

•   Bemaninanga mwingilo wa kuteakanya bufundiji bwa mu Bible bulupulwa mu mabuku, bwifundwa ku kupwila, ne ku masomo a Batumoni ba Yehova.—Luka 12:42.

•   Batalanga mwingilo wa ntanda yonso wa Batumoni ba Yehova na kulongolola mwingilo wetu wa busapudi ne na kutala muswelo wingidijibwa byabuntu.

 Kitango Kyendeji kilondanga kimfwa kyāshile “batumibwa ne bakulumpe mu Yelusalema” mu myaka katwa kabajinji, bene bādi bakwata butyibi bwa mvubu pa mwanda wa bene Kidishitu bonso. (Bilongwa 15:2) Pamo’nka bwa bano bana-balume ba kikōkeji, batutu ba mu Kitango Kyendeji ke bendejipo ba bulongolodi bwetu. Balondanga bwendeji bwa mu Bible, na kwitabija’mba Yehova Leza i mutonge Yesu Kidishitu bu Mutwe wa kipwilo.—1 Bene Kodinda 11:3; Bene Efisesa 5:23.

 Mu Kitango Kyendeji mudi Kenneth Cook, Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, ne Jeffrey Winder. Bengidilanga ku kite kya ntanda yonso ku Warwick, mu New York, mu États-Unis.

 Kitango Kyendeji i kibunde’ko makomite asamba mwanda wa kutala myanda palapala ya mwingilo wetu, kadi tutu yense wa mu Kitango Kyendeji wingilanga mu komite umo nansha mavule mu ano’a.

•   Komite wa Bakwatakani: Utalanga myanda ya bijila ne kulonga’po kintu kitatyi kilongeka bimpengele, kitatyi kipangwapangwa Batumoni ba Yehova pa mwanda wa nkulupilo yabo, ne mu myanda mikwabo ya bukidibukidi ifikila Batumoni ba Yehova.

•   Komite Utala Bengidi: Utalanga mpangiko ikwatwa’ko pa mwanda wa ba mu kisaka kya Betele.

•   Komite Ulupula Mabuku: Utalanga mwingilo wa kulupulwa ne kutumwa kwa mabuku esambila pa Bible ne lūbako lwa bifuko bya kutōtela’mo, mabilo a bwalamuni, ne mobo a misambo.

•   Komite wa Mingilo: Utalanga mwingilo wetu wa kusapula “myanda miyampe ya Bulopwe.”—Mateo 24:14.

•   Komite wa Bufundiji: Wimaninanga bufundiji bwa ku mushipiditu buletwa ku kupwila, ku masomo, ne mu mampangiko a mawi makwate ne mavideo.

•   Komite wa Balembi: Uteakanyanga bufundiji bwa ku mushipiditu bulupulwa mu bitampe ne pa site yetu, ne kutala mwingilo wa bwalamuni.

 Kutentekela pa kwingila mu ano makomite, Kitango Kyendeji kībungilanga pamo yenga ne yenga mwanda wa kubandaula bisakibwa bya bulongolodi bwa Batumoni ba Yehova. Pobebunga namino, batutu ba mu Kitango Kyendeji babandaulanga binena Bisonekwa, ne kuleka mushipiditu ujila wibaludike na kulonga bukomo bwa kukwata butyibi bobetabije abo bonso.—Bilongwa 15:25.

 I bene Kidishitu bakulupilwa bakwashanga mu makomite a Kitango Kyendeji. (1 Bene Kodinda 4:2) Badi na bukomo ne bwino mu mwingilo utalwa na komite obengila’mo, kadi batanwanga ku lenyo ya komite’wa yenga ne yenga. Nansha byokebakwatangapo butyibi, baletanga madingi ne milangwe ya kamweno. Kadi baloñanga bukomo amba butyibi bwa komite bulondwe ne kuta mutyima ku bilupuka’ko ne kwendelela kwikala’ko. Kadi babwanya kutumwa na Kitango Kyendeji mwanda wa kukapempula batutu ne bakaka mu bipindi palapala bya ntanda nansha kunena mīsambo ku binkumenkume pamo bwa ku kupwila kwa pa mwaka nansha ku kupānwa kwa mapolome ku Masomo a Ngileade.