Batumoni ba Yehova ba mu Bilgari basapwilanga bakwabo bininge bubine butala padi Leza ne pa Bible Kinenwa kyandi. Pa kwibakwasha’ko, Batumoni tutwa na tutwa ba mu matanda makwabo bavilukilanga ku Bilgari tamba mu mwaka wa 2000. Le i bikoleja’ka bidi mu kuvilukila mu ntanda ya bweni mwanda wa kusapula? I kika kinenenwa’mba bilomba kulonga bukomo? Tala bintu byanenene bantu bamo bavilukīle mu Bilgari.

 Darren ushikatanga mu Angeletele unena’mba, “twadi kala na kitungo kya kukengidila mu ntanda ya bweni musakilwa basapudi bavule. Potwesongele na Dawn, twavilukīle mu Londoni mwanda wa kufundija Bible mu ludimi lwa Kirusi. Kitatyi kityetye pa kupita’po, twakwata mpangiko ya kuvilukila mu ntanda ya bweni, ino twakomenwa kwenda pa bubinga bwishileshile. Twalangile amba ketubwanyapo kwenda, ino kupwa mulunda nami umo wetukwasha tumone amba, ngikadilo yotwadi’mo ibashinta ne amba tubwanya kufikila pa kitungo kyetu kya kuviluka.” Ba Darren ne Dawn bashilula kukimba kibundi kisakilwa bafundiji ba Bible bavule, kadi kwine kobadi bakokeja kuvilukila. Mu 2011, bavilukila ku Bilgari.

 Kimfwa kisangaja kya bantu bavilukīle mu bipindi bikwabo bya ntanda, kyakankamikile bantu bamo kebadipo dibajinji na kitungo kya kukengidila mu ntanda ya bweni. Giada ushikatanga mu Itadi na wandi mulume Luca wanenene amba: “Netene na Batumoni bapyasakane baingile na nsangaji mu Amerika wa Kunshi ne mu Afrika. Natengelwe bininge na nsangaji yabo ne myanda yobemwenine yobanombwele. Kino kyaunkweshe nshinte bitungo byami bya ku mushipiditu.”

 Ba Tomasz ne Veronika bavilukile ku Czech baenda mu Bilgari mu 2015, na babo bana babidi ba Klara ne Mathias. Le i bika byebalengeje baviluke? Tomasz walondololwele amba: “Twadi tulangulukila bininge pa bimfwa bya bakwetu bavilukīle mu ntanda ya bweni, kubadila’mo ne babutule, ne kulangulukila pa myanda imoimo yobemwenine. Twatengelwe na nsangaji yabo, kadi twadi twisambila’po pamo ku njibo.” Pano bantu ba mu kino kisaka basapulanga mu wabo mwaba mupya mu kibundi kya Montana kya mu Bilgari.

 Linda i Kamoni mukwabo wavilukīle mu Bilgari. Wanenene amba: “Myaka mivule kunyuma naendele mu Ekwatere, netana’mo na bantu bamo bavilukīle’mo kukasapula. Kino kyaunengeja nange amba padi nami difuku dimo nkabwanya kukengila kokwa kusakilwa basapudi bavule.” Ba Petteri ne Nadja, ba mulume ne mukaji ba mu Felande nabo balangulukīle pa kimfwa kya bantu bakwabo. Banenene amba: “Mu kyetu kipwilo, twadi’mo na basapudi ba bwino bavilukīle ku bifuko bikwabo mwanda wa kukwasha bantu ku mushipiditu. Badi besambila na bupyasakane pa myaka yobalongele mu uno mwingilo. Badi banena’mba ino yadi myaka milumbuluke mu bwabo būmi.”

 Kwiteakanya senene i kuyampe ku boba basaka kukengidila mu ntanda ya bweni. (Luka 14:28-30) Nele, wa mu Belejike wavulukile amba, “ponashilwile kulangulukila bininge pa kukengila mu ntanda ya bweni, nalombēle ne kukimba mu mabuku etu bishinte bisambila pa kukengidila mu ntanda ya bweni. Nefundile’byo ne kukimba kuyuka byomfwaninwe kulonga pa kwiteakanya mwa kwendela.”

 Ba Kristian ne Irmina, ba mu Polonye bakashikete mu Bilgari myaka kitema ne kupita. Bamwene amba i biyampe kukapwila mu kisumpi kya ludimi lwa Bilgari kumeso kwa kuviluka. Kino kisumpi kyebakankamikile ne kwibakwasha befunde ludimi. Ba Kristian ne Irmina banenene amba: “Twafudile ku kujingulula’mba shi witabije kwingila, Yehova Leza ukavuija bisakibwa byobe. Shi usapwila Yehova na mutyima umo amba, ‘Ami uno! Ntume!’ nabya ubwanya kulonga bintu byokwadipo ulangila.”—Isaya 6:8.

 Pa kwiteakanya ne kulea lupeto, ba Reto ne Cornelia, ba mulume ne mukaji ba ku Swazilande, bakwete butyibi bwa kwisuminwa bintu mu būmi. Banenene amba “mwaka umo kumeso kwa kuviluka, twaendele mu Bilgari yenga mutuntulu mwanda wa kuyuka mwikadile kibundi. Twesamba’mo na bamishonele ba bwino betupele madingi mayampe.” Ba Reto ne Cornelia baingidije ano madingi, kadi pano bashikete mu Bilgari ke myaka 20 ne kupita.

 Boba bavilukila mu ntanda ya bweni banenwa kwibidila ngikadilo mipya kadi mikomo. (Bilongwa 16:9, 10; 1 Bene Kodinda 9:19-23) Kikoleja kikatampe kikalanga na bavule i kya kwifunda ludimi lweni. Luca, otwatelanga kala wanenene amba, “tusangelanga nyeke kulondolola mu byetu bishima ku kupwila. Ino mu kine kitatyi’kya ami ne wami mukaji twadi tukomenwa kuteakanya’nka ne malondololo mēpi mu ludimi lwa Bilgari! Byadi pamo’nka bwa kujokela ku bwanuke. Na bubine, malondololo a bana batyetye ba mu Bilgari adi mayampe kupita etu.”

 Ravil, wa mu Beletanye, wanenene amba: “Kwifunda ludimi kwadi kupungija. Ino nadi nanga’nka kulanga’mba, ‘kokelēmeka bipitepite, kadi zaula’ko kitatyi kyolonga bilubo.’ Namwene bikoleja bu ke mwandapo, ino bibadilwa mu mwingilo ukola otwingidila Yehova.”

 Linda otwatelanga kala wanenene amba: “Nkibwanyapo kwifunda ludimi lweni. Ludimi lwa Bilgari i lukomo kwifunda, kadi kitatyi kivule nadi nanga bya kwibileka. Shi kubwanyapo kwisamba na bantu ne kwivwana byobanena, ukemona bu udi bunka. Pa kuningija kipwano kyami na Yehova, nadi nefunda bintu byonso mu ludimi lwa Suede. Ku mfulo na bukwashi bwa batutu ne bakaka baswe, nabwanya kwifunda ludimi.”

 Kūminina misongo ku njibo nako kubwanya kwikala bu kikoleja kikwabo. Boba bavilukanga kwabo bashiyanga babutule ne balunda bobasenswe. Eva wavilukīle mu Bilgari na wandi mulume Yannis unena’mba, “dibajinji, nadi nemona bu ngidi bunka. Pa kwiivwana biyampe, twadi twisamba kitatyi ne kitatyi na balunda netu ne kisaka kyotwashile, kadi twapwana na balunda bakwabo kwine’kwa.”

 Kudi bikoleja bikwabo. Ba Robert ne Liana, bavilukīle mu Swazilande, bashintulwile amba: “Ludimi, kutentekela’po ne bibidiji, byadi bu kikoleja kikatampe kotudi, kadi ketwadipo beteakanye ku bitatyi bya mashika bya kwine’kwa.” Inoko, kwikala na mumweno muyampe ne kwikala’ko na mizaulo kwetukweshe twingile mu Bilgari na kikōkeji mu myaka 14 ipityile’i.

 Lilly udingila boba bonso basaka kukasapula kokwa kusakilwa basapudi bavule. Wanenene amba, “nabwenye kwimwena bukwashi bwa Yehova mu muswelo onkyadipo padi wa kwimwena’bo mu yetu ntanda. Mbwanya kukwasha bakwetu bininge, kadi kino kinkwashanga ngikale pabwipi na Yehova ne kundetela nsangaji.” Ravil, wandi mulume nandi witabija uno mwanda. Wanenene amba: “Buno i būmi buyampe kutabuka, mukenga wa pa bula wa kuyuka bene Kidishitu bapyasakane ba matanda meshileshile badi na bwino buvule bwa kufunda bubine bwa mu Bible. Nefundile bintu bivule kobadi.”

 Mushipiditu wa kwilanga ne mutyima wa kusaka kwingila udi na bavule bikwashanga pa kusapula “myanda miyampe ya Bulopwe . . . pa ntanda yonso ikelwe na bantu.” (Mat. 24:14) Byobadi na mutyima wa kukwasha bakwabo, boba baile mu Bilgari i bamone muswelo wibapa Yehova byobya bisakasaka mityima yabo, ne muswelo walengeja milangwe yabo yendeke.—Ñimbo ya Mitōto 20:1-4.