BIPANGUJO BYA BANKASAMPE
Lelo Kulāla kwa Bantu ba Ngitu Imo I Kubi?
“Ponadi ntama, nadi nkokwa na bantu ba ngitu imo na yami, ne kino kyadi kikoleja kondi. Nadi nanga’mba i kitatyi’tu, bisa kupita, inoko uno mwivwanino waumbikele.”—David, wa myaka 23.
David i mwine Kidishitu usaka kusangaja Leza. Le ubwanya kumusangaja koku kadi ukokwa na bantu ba ngitu imo na yandi? Le na bubine Leza umwene namani kulāla kwa bantu ba ngitu imo?
Lelo Bible unena’po namani?
Muswelo umonwa kulāla kwa bantu ba ngitu imo ubwanya kwishila mungya bitatyi ne bibidiji. Inoko bene Kidishitu kebaludikwangapo na milangwe itādile bantu nansha “kuselelwa koku ne koku na kivula kyo-kyonso kya bufundiji.” (Efisesa 4:14) Inoko, muswelo obamona kulāla kwa bantu ba ngitu imo (ne mwiendelejo o-onso ukwatañene na kino) i mukwatañane na misoñanya iletelwe mu Bible.
Misoñanya ya mu Bible itala kulāla kwa bantu ba ngitu imo idi patōka. Kinenwa kya Leza kinena’mba:
“Kufwaninwepo kulāla na mwana-mulume na molādilanga na mwana-mukaji.”—Levi 18:22.
“Leza webapēne ku bilokoloko bya busekese bya munyanji, mwanda bana-bakaji babo bashintyile abo bene mulongelwanga mungya kipangila kebelonga byampikwa kulonda kipangila.”—Loma 1:26.
“Kemwakyongolwai. Ba busekese, ne ba kutōta bilezaleza, ne ba makoji, ne bana-balume balālwa na bana-balume, ne bana-balume balāla bana-balume, ne bangivi, ne bantu ba makomwa-meso, ne bankolwankolwa, ne ba kutukana, ne ba manyengenyenge kebakapyanangapo Bulopwe bwa Leza.”—1 Kodinda 6:9, 10.
Na bubine, misoñanya ya Leza italanga bantu bonso, boba babila kulāla na bantu ba ngitu imo nansha ke boba babila kulāla na bantu ba ngitu ingi bene. Bine, muntu ense ufwaninwe kwijiba shi kaabila kulonga byobya kebisangajapo Leza.—Kolose 3:5.
Le ko kunena’mba . . . ?
Le ko kunena’mba Bible ukankamika kushikwa boba balāla na bantu ba ngitu imo?
Aa. Na bubine, Bible kakankamikangapo kushikwa muntu nansha umo—ulāla na bantu ba ngitu imo nansha na ba ngitu ingi. Inoko, witusoñanya ‘tulondelonde ndoe na bantu bonso,’ pampikwa kuta mutyima ku mwiendelejo wabo wa mu būmi. (Bahebelu 12:14) Nanshi, i bibi kusanshija, kwikala kipolapola, nansha ke kulonga bilongwa bibi mu muswelo kampanda ku boba balāla na bantu ba ngitu imo.
Le ko kunena’mba bene Kidishitu bafwaninwe kulwa na bijila bya Leta bitabije busongi bwa bantu ba ngitu imo?
Bible ulombola’mba busongi i kijimba kikutyila pamo mwana-mulume umo ne mwana-mukaji umo. (Mateo 19:4-6) Inoko bijila bya bantu bitabija busongi bwa bantu ba ngitu imo bimanine pa myanda ya politike, ke pa mwikadilopo muyampe wa mu būmi. Bible udyumunanga bene Kidishitu baleke kutwela mu politike. (Yoano 18:36) Nanshi, kebatumbijangapo nansha kulwa na bijila bya Leta bitabija busongi ne kulāla kwa bantu ba ngitu imo.
Ino le shi . . . ?
Ino le shi muntu ukilāla na bantu ba ngitu imo? Le uno muntu ukokeja kushinta?
En-en, ukokeja. Mwanda bantu bamo ba mu myaka katwa kabajinji nabo bābwenye kushinta! Bible pa kupwa kunena’mba boba balāla na bantu ba ngitu imo kebakapyanangapo Bulopwe bwa Leza, ubweja’ko amba: “Mo mwadi mwikadile ne bamobamo mu bukata mwenu.”—1 Kodinda 6:11.
Le ko kunena’mba boba bālekele’byo kulāla na bantu ba ngitu imo kebāivwenepo nansha dimo mutyima wa kujokela ku mwikadila wabo wa kala? Aa, ke nankyopo. Bible unena’mba: “vwalai bumuntu bupya, bwalamunwanga ke bupya kupityila ku buyuki bwa binebine.” (Kolose 3:10) Kushinta i mwingilo wa endaenda.
Ino le shi muntu usaka kulonda misoñanya ya Leza inoko ukikonda na milangwe ya kulāla na bantu ba ngitu imo le?
Muntu mwine ye ubwanya kutonga kunekenya ino milangwe nansha kino kilokoloko mwanekenenyanga milangwe mikwabo. Namani? Bible unena’mba : “Nangilai nyeke mu mushipiditu nabya kemukalongapo nansha dimo bya kusakasaka bya ngitu.”—Ngalatea 5:16.
Uno vese kanenenepo amba muntu kakekalapo na bya kusakasaka bya ngitu. Inoko, unena’mba kwikala na bibidiji biyampe bya ku mushipiditu pamo bwa kwifunda Bible ne kulombela, bikamukomeja anekenye ino milangwe.
David, otwatelanga kūlu’ku, wajingulwile amba kino i kya bine—nakampata paapwile kusapwila bambutwile bandi bene Kidishitu myanda yaadi ulwa nayo. Unena’mba, “Nadi pamo bwa ami watūla kiselwa kilēma kyadi pa mapuji, kadi nadi wa kwikala na nsangaji mivule mu busongwalume bwami shi nebasapwidile’mo tamba kala.”
Mfulo mfulō, tubwanya kwikala na nsangaji mikatampe shi tulonda misoñanya ya Yehova. Bine tukulupile amba ino misoñanya i “myoloke, isangajanga mutyima,” ne amba mu kwiilama “mudi mpalo mikatampe.”—Ñimbo ya Mitōto 19:8, 11.
