Kyamalwa kikatampe kikaleta kitatyi kya malwa makatampe keafikīle kashā muzo wa muntu. Mungya bupolofeto bwa Bible, kino kyamalwa kikafika mu “mafuku a mfulo,” nansha “kitatyi kya ku mfulo.” (2 Temote 3:1; Danyele 12:4) Kikekala “kyamalwa kikatampe kekyaikele’ko kashā tamba ku ngalwilo ya ino ntanda kufika ne pano, aa, kadi kekikekala’kopo monka.”—Mako 13:19; Danyele 12:1; Mateo 24:21, 22.

Binkumenkume bya pa kyamalwa kikatampe

•   Konakanibwa kwa mutōtelo wa bubela. Mutōtelo wa bubela ukonakanibwa lubilo bininge. (Kusokwelwa 17:1, 5; 18:9, 10, 21) Umbikalo wa ntanda welekejibwe na Bumo bwa Mizo bukalonga’po kintu mwanda wa kufikidija kiswa-mutyima kya Leza.—Kusokwelwa 17:3, 15-18. a

•   Kutambwa kwa mutōtelo wa bine. Mizo mikutyile mu bumo, itelelwe mu kimonwa kya Ezekyele bu “Koka wa ntanda ya Makoka,” ikalonga bukomo bwa konakanya boba badi mu mutōtelo wa bine. Inoko Leza ukakinga batōtyi bandi baleke konakanibwa.—Ezekyele 38:1, 2, 9-12, 18-23.

•   Kutyibilwa mambo kwa bekadi ba pano pa ntanda. Yesu ukatyibila bantu bonso mambo kadi “ukasansanya bantu, baba koku baba koku, pamo’nka na mukumbi usansanya mikōko mu bambuji.” (Mateo 25:31-33) Butyibi bwandi bukemanina pa kukwatakanya nansha kubulwa kukwatakanya “banababo” na Yesu, bene bakaludika nandi momwa mūlu.—Mateo 25:34-46.

•   Kukongakanibwa kwa baludiki ba Bulopwe. Bantu ba kikōkeji batongelwe kukaludika na Kidishitu bakavuya lwendo lwabo lwa pano panshi ne kusangwilwa mūlu.—Mateo 24:31; 1 Bene Kodinda 15:50-53; 1 Bene Tesalonika 4:15-17.

•   Amakedona. Dino “divita dya difuku dikatampe dya Leza Mwinē Bukomo Bonso,” ditwanga ne bu “difuku dya Yehova.” (Kusokwelwa 16:14, 16; Isaya 13:9; 2 Petelo 3:12) Boba bakamonwa na Yesu bu balwana bakonakanibwa. (Zefenia 1:18; 2 Bene Tesalonika 1:6-10) Kadi ukonakanya ne ngikadilo ya politike ya ntanda yonso, yelekejibwe mu Bible na kinyema kya ntanda kya mitwe isamba-ibidi.—Kusokwelwa 19:19-21.

Binkumenkume bikalongeka pa kupwa kwa kyamalwa kikatampe

•   Kukutwa kwa Satana ne bandemona. Mwikeulu mukatampe ukela Satana ne bandemona “mu lupongo,” lwelekeja ngikadilo ya lufu ya kubulwa kwingila. (Kusokwelwa 20:1-3) Satana ukekala mu lupongo pamo bwa aye udi mu kifungo; kakabwanyapo kuludika bintu nansha kuntu kumo.—Kusokwelwa 20:7.

•   Kushilula kwa Myaka Kanunu. Bulopwe bwa Leza bukashilula kuludika myaka 1 000, kadi bukaletela bantu madyese mavule. (Kusokwelwa 5:9, 10; 20:4, 6) “Kibumbo kikatampe” kya bantu kebabadika ‘bakalupuka mu kyamalwa kikatampe,’ bakapanda ne kumona ngalwilo ya Myaka Kanunu pano pa ntanda.—Kusokwelwa 7:9, 14; Ñimbo ya Mitōto 37:9-11.