“Sangalai mu lukulupilo. Ūmininai mu byamalwa. Takamanai mu milombelo.”—Bene Loma 12:12, Bwalamuni bwa Ntanda Mipya.

 “Sangalai mu lukulupilo. Tūkijai mityima mu bya malwa bikatampe. Mwipānei mumilombelo.”—Bene Loma 12:12, Dibuku Dijila.

 Mu uno vese, mutumibwa Polo wākankamikile’mo bene Kidishitu bene Loma balonge bintu bisatu bine bikebakwasha bekale nyeke na kikōkeji mu kupangwapangwa ne mu bikoleja bikwabo.

 “Sangalai mu lukulupilo.” Bene Kidishitu badi na lukulupilo lwa kutendelwa lwa būmi bwa nyeke—ku bamo momwa mūlu, ne ku bavule bene nako mu paladisa pano pa ntanda. (Ñimbo ya Mitōto 37:29; Yoano 3:16; Kusokwelwa 14:1-4; 21:3, 4) Mu luno lukulupilo mubadilwa ne kukamona Bulopwe bwa Leza a bupwija makambakano onso atana muzo wa muntu. (Danyele 2:44; Mateo 6:10) Batōtyi ba Leza babwanya kusangala nansha shi balwanga na bikoleja, mwanda bayukile na kusumininwa amba lukulupilo lwabo ludi’ko bine ne amba kūminina kwabo kukalengeja Leza ebetabije.—Mateo 5:11, 12; Bene Loma 5:3-5.

 “Ūmininai mu byamalwa.” Mu Bible kyubwa kya Kingidiki ‘kūminina’ kingidijibwanga divule dine na mulangwe wa “kwimana nkū pampikwa kunyema; kutakamana; kwimanija nshinkidingi.” Balondi ba Kidishitu ‘byokebadipo ba ino ntanda’ b o mwanda bayukile amba basa kupangwapangwa ne amba basakilwa kūminina. (Yoano 15:18-20; 2 Temote 3:12) Shi mwine Kidishitu atakamene mu kwingidila Leza nansha shi kulonga namino kumulomba kūminina matompo, lwitabijo lwandi lwa amba dyakadilwe kantu Leza ukamupala mpalo luningilanga’ko. (Mateo 24:13) Kino kikulupiji kimukwashanga ōminine bikoleja na kitūkijetyima ne nsangaji.—Bene Kolose 1:11.

 “Takamanai mu milombelo.” Pa kushala na kikōkeji kudi Leza, bene Kidishitu bakankamikwanga kyaba ne kyaba kulombela kitatyi kyonso. (Luka 11:9; 18:1) Bendelelanga na kukimba buludiki bwa Leza ne kutala’nka kwadi mu būmi bwabo bonso. (Bene Kolose 4:2; 1 Bene Tesalonika 5:17) Bakulupīle amba Leza ukalondolola milombelo yabo mwanda bakōkelanga mbila yandi ne kulonga bukomo bwa kumusangaja. (1 Yoano 3:22; 5:14) Bayukile kadi amba shi batakamene mu milombelo, Leza ukebapa bukomo bobasakilwa bwa kushala bakōkele mu matompo o-onso.—Bene Fidipai 4:13.

 Polo wālembēle mukanda wandi bene Kidishitu bādi bashikata mu Loma dya mu 56 Y.M. Mu shapita 12 wa uno mukanda, wāletele’mo madingi mapotoloke a mwa kulombwela ngikadila ya bwine Kidishitu, mwa kwikadila na batōtyi-netu ne na bantu bakwabo, ne mwa kulongela bintu mu ndoe potupangwapangwa. (Bene Loma 12:9-21) Ano madingi ēbapelwe pa kitatyi kifwaninwe, mwanda bene Kidishitu ba mu Loma bādi ba kutanwa bukidi bonka na kupangwapangwa kwa malwa.

 Myaka mityetye pa kupita’po, mu 64 Y.M., mudilo mukatampe wāonakenye kibundi kya Loma. Miuningo yaāndabele amba i Mbikavu Nero wālengeje’o. Mungya Tasite mulembi wa mānga mwine Loma, Nero wātompele kwiepeja mu uno mwanda na kutopeka bene Kidishitu. Kino kyālengeje bene Kidishitu bapangwepangwe bya malwa. Madingi a Polo a mwa kūminina kupangwapangwa ēbakweshe balwe talala na ino ngikadilo mikomo koku balamine lwitabijo . (1 Bene Tesalonika 5:15; 1 Petelo 3:9) I biyampe batōtyi ba Leza dyalelo beule kimfwa kyabo.

 Tala ino video mīpi, umone myanda mikatampe idi mu mukanda wa Bene Loma.