“Lēmeka shobe ne inobe, amba wikale mūmi kitatyi kilampe mu ntanda ikupa Yehova Leza obe.”—Divilu 20:12, Bwalamuni bwa Ntanda Mipya.

 “Lemeka shobe ne inobe mwine kumo, nankyo mafuku obe alepejibwe pa yoya ntanda yakupa Yehova Leza obe.”—Divilu 20:12, Mukanda Ukola.

 Leza wāsoñenye bene Isalela ba kala balēmeke bambutwile babo. Pa kubweja mulao ku ino mbila, wādi usaka kwibakankamika bakōkele’yo. Nansha Bijila bya Leza byaāpele bene Isalela, bitwa ne bu Bijila bya Mosesa, byokebikingilangapo, ino misoñanya yandi keishintyilepo. Misoñanya idi mu Bijila bya Leza ikingilanga kadi idi na mvubu ku bene Kidishitu.—Bene Kolose 3:20.

 Bana—bankasampe ne batame—balombolanga’mba balēmekele bambutwile babo na kwibakōkela ne kwibalombola kalēmo. (Bene Levi 19:3; Nkindi 1:8) Nansha shi bana abatama ne kwikala na byabo bisaka, bendelelanga kuta mutyima na buswe bambutwile babo. Kimfwa, bafwaninwe kulonga bukomo bwa kukwatakanya bambutwile babo shi abanunupa, enka ne kwibakwasha na lupeto shi basakilwa’lo.—Mateo 15:4-6; 1 Temote 5:4, 8.

 Tumona’mba bana ba bene Isalela bādi banenwe kukōkela bashabo ne bainabo bene, kulonga namino kwādi kulombola’mba betabije mwingilo wa mvubu udi na inabo mu kisaka. (Nkindi 6:20; 19:26) Dyalelo, bana bafwaninwe kulonga’nka namino.

 Divule dine musoñanya wa kukōkela bambutwile udi na mikalo. Bana ba bene Isalela kebādipo bafwaninwe kukōkela bambutwile babo, nansha muntu ungi mukwabo, shi bebalomba kulonga bintu kebikwatañenepo na bisaka Leza. (Kupituluka mu Bijila 13:6-8) Muswelo umo onka dyalelo, bene Kidishitu bakōkele “Leza bu mulopwe kupita’ko bantu.”—Bilongwa 5:29.

 Mu Bijila byawāpele Isalela, Leza wālaile’mo amba bana bādi bakōkele bambutwile babo, bādi ba kwikala bōmi ‘kitatyi kilampe ne . . . kwikala biyampe’ mu ntanda yaēbapele. (Kupituluka mu Bijila 5:16) Kebādipo ba kutanwa na makambakano na oa ādi afikila bana bādi bapumpunya bijila bya Leza ne kutombokela bambutwile babo. (Kupituluka mu Bijila 21:18-21) Nansha byokepapite myaka mivule, misoñanya idi mu bino bijila keishintyilepo. (Bene Efisesa 6:1-3) Ekale twi bankasampe nansha batame, tukeshintulwila ku meso a Umpangi wetu. Enka na mwalaile’byo, bana bamukōkela aye ne bambutwile babo bakekala na būmi bulampe. Bine, badi na lukulupilo lwa kwikala’ko nyeke.—1 Temote 4:8; 6:18, 19.

 Mbila itanwa mu Divilu 20:12 i mbila milēme mpata mu Mbila Dikumi, nansha’mba Binenwa Dikumi. (Divilu 20:1-17) Mbila iibadikidile ilombola bintu byādi bifwaninwe bene Isalela kulongela Leza, kimfwa bādi banenwe kumutōta’nka aye. Mbila ilonda’po nayo yādi ilombola bintu byobādi bafwaninwe kulongela bantu-nabo, mwine mubadilwa ne mbila ya kwikala na lulamato kudi mwinē petu ne kuleka kwiba. Nanshi mbila ya amba, “lēmeka shobe ne inobe” imweka bwa kilalo kya kipangila kidi pa bukata bwa bino bisumpi bibidi bya mbila.