“Ntumbo kudi Leza momwa mūlu mulampe, ne pano panshi napo ndoe mu bantu batōkēlwe.”—Luka 2:14, Bwalamuni bwa Ntanda Mipya.

 “Leza atumbijibwe ntumbo momwa mulu, ne pano panshi napo ndoe ikale ku bantu bonso bamusangaja.”—Luka 2:14, Myanda Miyampe.

 Bino binenwa bya mitendelo byānenene bamwikeulu kitatyi kyābutwilwe Yesu, bilombola amba boba bakulupile mudi Yesu betabijibwanga na Leza kadi bekalanga na ndoe.

 “Ntumbo kudi Leza momwa mūlu mulampe.” Kupityila ku bino binenwa, bamwikeulu bākomeneje amba Leza i mufwaninwe kutambula ntumbo yonso. Kadi bino binenwa bilombola amba, kubutulwa kwa Yesu ne mwingilo wandi wa pano pa ntanda, byādi bya kukwasha bininge ku ntumbo ya Yehova a Leza. Kimfwa, Yesu wādi usaka bantu batumbije Leza pangala pa byawādi ufundija. Wānenene amba: “Byomfundija ke byamipo, ino i bya yewa wantumine.” (Yoano 7:16-18) Pādi palonga Yesu bingelengele, divule dine boba bādi bebimona bādi ‘batumbija Leza.’ (Luka 5:18, 24-26; Yoano 5:19) Enka ne lufu lwa Yesu lwātuntwidile ku ntumbo ya Leza. Lwākweshe amba mpango mikatampe ya Leza ya kuyuja ntanda na bantu boloke kadi basenswe ndoe ikafikidile.—Ngalwilo 1:28.

 “Pano panshi napo ndoe.” Mu ino ndoe mubadilwa bivule, ke enkapo’tu kuleka kwikala’ko kwa divita. Mubadilwa ne kutūkijibwa mutyima, bine bibwanikanga enka shi muntu i mwitabijibwe na Yehova. Bantu babwanya kwikala mu kipwano kiyampe na Leza, kupityila kudi Yesu. (Yakoba 4:8) Yesu byadi Mulopwe wa Bulopwe bwa Leza, ukaleta ndoe ya nyeke pa ntanda yonso.—Ñimbo ya Mitōto 37:11; Luka 1:32, 33.

 “Bantu batōkēlwe.” Uno musemwa ufunkila pa bantu bobatōkelwe mutyima kudi Leza, nansha’mba baitabije mwanda wa lwitabijo lwa kubulwa budimbidimbi lobadi nalo mwadi ne mudi yewa waātumine, Yesu. Kekifunkilangapo pa kutōkelwa kutōkelwe Leza mutyima bantu bonso pampikwa kubanga mwikadila wabo ne bilongwa byabo. Bilembwa bya Kingidiki bya kala bikulupilwa bininge bikwatakanya muswelo walamwine’po Bwalamuni bwa Ntanda Mipya ne malamuni makwabo adi’ko dyalelo aleta mulangwe wa amba, ndoe idi mu bantu betabijibwe na Leza.—Tanga “ Luka 2:14 mu Malamuni Makwabo.”

 Luka shapita 2 wisambilanga pa myaka mibajinjibajinji ya būmi bwa Yesu bwa pano pa ntanda. Kupwa’tu kwa aye kubutulwa, mwikeulu wāmwekēle bakumbi ba mikōko bādi “bakesha balama luombe lwabo bufuku.” b (Luka 2:4-8) Mwikeulu wēbasapwila “myanda miyampe ya nsangaji mikatampe,” na kwibalombola’mba: “Dyalelo dino’di, mu kibundi kya Davida mubemubutwilwa Umpandiji, ke Kidishitu Mfumwetu kadi.” (Luka 2:9-11) Wālombwele bakumbi kwine kobādi ba kutana mwana wa lukeke’wa, kupwa bāmona kibumbo kya bamwikeulu kitendela Leza. Bakumbi pa kufika mu Betelema, bātana Madia, Yosefa ne Yesu mwana mutyetye. (Luka 2:12-16) Pa kupwa kwa bakumbi kusekununa bintu bya kutendelwa byobamwene, bājokela kwādi luombe, “batumbija Leza ne kumutendela mwanda wa bintu byonso byobaivwene ne byobamwene.”—Luka 2:17-20.

 “Leza atumbijibwe ntumbo momwa mulu, ne pano pa nshi napo ndoe ikale ku bantu batokelwe pa mutyima.”—Luka 2:14, Dibuku Dijila.

 “Ntumbo kudi Leza mulu, ne ndoe pa ntanda ku bantu baaswele.”—Luka 2:14, Bisonekwa Bitokele.

 “Leza atumbijibwe ntumbo mūlu mwine, ne pano panshi ndoe, ya ku mutamba wa bantu mo mwatokelwa she-e, aye.”—Luka 2:14, Mukanda Ukola.

 Tala ino video mīpi, umone myanda mikatampe idi mu mukanda wa Luka.