“Mwene nakusoñenye kala? Abe kankamana kadi wikomeje. Kokizakala nansha kukwatwa moyo, mwanda Yehova Leza obe udi nobe konso koenda.”—Yoshua 1:9, Bwalamuni bwa Ntanda Mipya.

 “Le nkyakunene po amba: ikala mukomo ne mukankamane? Kozakalai, kotuyukai, ku mwanda Vidye Leza obe ukekala nobe ponso pokenda.”—Yoshua 1:9, Bisonekwa Bitokele.

 Na bino binewa, Yehova a Leza wākulupije mutōtyi wandi wa kikōkeji Yoshua amba, wādi ubwanya kwikala ‘mukankamane kadi mukomo’ nansha ke mu makambakano makomo ne mu bikoleja bikomo kunekenya. Yoshua kādipo na bubinga bwa kutyinina mafuku a kumeso shi wādi ukōkele mbila ya Leza, mwanda byādi bya kwikala pamo bwa Yehova udi pabwipi nandi umukwasha anekenye. Leza wādi na Yoshua mwanda wādi umusoñanya ne kumupa bushindañani pa balwana nandi.

 Le Yoshua wādi ubwanya namani ‘kukankamana ne kwikomeja’? Wādi wa kumona bukomo ne bukankamane na kutanga bilembwa bya ku bukomo bwa mushipiditu byāletelwe na Yehova mu kyokya kitatyi. Muno mwādi mubadilwa ne ‘Bijila byonso byobāsoñenye Yoshua kudi mwingidi wa Yehova Mosesa.’ b (Yoshua 1:7) Yehova wālombwele Yoshua ‘atange’o na diwi ditūke [ko kunena’mba “na kulangulukila’po,” mungya New International Version] dyuba ne bufuku.’ (Yoshua 1:8) Kutanga kwa uno muswelo ne kulanguluka kwāningije ñeni ne mutyima wa Yoshua amba alonge kiswa-mutyima kya Leza. Namino, Yoshua wādi usakilwa kwingidija byobya byawādi wifunda mu Kinenwa kya Leza, ne “kulama senene byonso [byādi] bilembelwe’mo.” Kulonga kino, kwādi kwa kumukwasha alonge bintu na tunangu ne kunekenya. Kadi mo mobyāikadile. Nansha byaādi utanwa na bikoleja, Yoshua wādi na būmi buyampe kadi bwa nsangaji mwanda wādi mutōtyi wa kikōkeji wa Yehova.—Yoshua 23:14; 24:15.

 Binenwa byobālombwele Yoshua kudi Yehova i bikankamika enka ne dyalelo. Bilombola mutelanga Yehova mutyima batōtyi bandi, nakampata pobatanwa na bikoleja. Usakanga banekenye pamo bwa Yoshua! Ne kadi pamo bwa Yoshua, babwanya ‘kukankamana ne kwikomeja’ na kutanga kitatyi ne kitatyi Kinenwa kya Leza Bible, kulangulukila’po ne kulonga enka mokibaludikila.

 Kupwa kwa Mosesa kufwa, Yehova wāpēle Yoshua mwingilo wa kuludika muzo wa Isalela. (Yoshua 1:1, 2) Mu kyokya kitatyi, bene Isalela bādi kebadi pabwipi na kutwela mu Kenani, Ntanda ya Mulao. Inoko balwana bakomo bādi bebatengēle. Kimfwa, Yoshua wādi ufwaninwe kutwela mu bulwi na bene Kenani, bankuma-bibi ba mu meso fututu. c (Kupituluka mu Bijila 9:5; 20:17, 18) Bene Kenani bādi bavule bininge kadi bādi na bya bulwi bikunkane kwibapita. (Yoshua 9:1, 2; 17:18) Inoko Yoshua wālondele buludiki bwa Yehova na bukankamane. Kadi Leza wēlombwele amba udi nandi, mwanda bene Isalela bānekenye balwana nabo bavule mu myaka isamba kete.—Yoshua 21:43, 44.