Bisonekwa bya Kingidiki bya Bwine Kidishitu—Bwalamuni bwa Ntanda Mipya byalupwilwe mu Angele mu 1950, kupwa Bible mutuntulu wa Bisonekwa Bijila—Bwalamuni bwa Ntanda Mipya walupulwa mu 1961. Tamba penepa, batangi midiyo makumi na makumi ba ndimi 210 ne kupita bamwenine mu buno bwalamuni bwa bine kadi bupēla kutanga bwa Bisonekwa Bijila butambile ku ndimi mibajinjibajinji.

Komite wa Bwalamuni bwa Bible wa Ntanda Mipya wajingulwile’mba i biyampe kwingidija muneneno utenga mityima ya batangi ba dyalelo. O mwanda misoñanya imo itala muneneno ne bishima yalondelwe mu buno bwalamuni mwanda wa kufikila pa bino bitungo:

• Kwingidija muneneno wa dyalelo kadi wivwanikwa. Bishima bimo bidi mu Mabible a Kiluba kebivwanwangapo biyampe na batangi, i bipingakanibwe na bishima bivwanikwa. Kimfwa, kishima “wa bwitwa” kibapingakanibwa na kishima “ndumba,” (Ngalwilo 38:15) “dikumbo” na “sanduku,” (Divilu 25:10, 14, 15) “nkolwa” na “sāka,” (Eseta 4:4) “madabahu” na “kisōkelo.”—Ngalwilo 8:20.

  Kishima “lukunwa” mu Kihebelu ne Kingidiki kya kala, kibwanya kufunkila pa nze ya mityi ne pa lutundu lwa bantu, nansha bana, nansha pa mema a bwana-bulume. Ino kishima “lukunwa” byokekingidijibwangapo bininge mu Kiluba pa kwisambila pa bantu, kibapingakanibwa na bishima bileta mulangwe mwinemwine mungya myanda īsambilwa’po. (Ngalwilo 1:11; 22:17; 48:4; Mateo 22:24; Yoano 8:37) Pavule pene, kishima “lutundu” i kingidijibwe mwanda wa kwisambila pa mulao wa mu Edena, udi mu Ngalwilo 3:15.

• Bishima bya mu Bible bipēlejibwe. Mu malamuni amo a Bible, bishima bimo biletanga nshintulwilo ya bubela. O mwanda bino bishima i byalamunwe biyampe mu buno bwalamuni. Kimfwa, malamuni amo a Bible anenanga’mba Yesu “wāpopelwe ku musalabu.” Ino byakāpopelwepo ku musalabu, twi balamune amba “wāipailwe ku mutyi,” nansha’mba “wāpopelwe ku mutyi” mu buno bwalamuni.—Mateo 20:19; 27:31, 35.

   Ne kishima “mfyo” nakyo mo monka, i kishale enka popa pokifunkila pa kipindi kya ku ngitu. Ino shi i kingidijibwe mu muswelo wa kyelekejo, na mokikadile mu Kusokwelwa 2:23, twi balamune mu mavese mulangwe mwinemwine wa kishima’mba “milangwe ya munda,” ino mulangwe wa kishima pa kishima twewela kunshi kwa dyani.

  Pamo’nka bwa mu Kihebelu ne mu Kingidiki, kishima kya Kiluba “mutyima,” kifunkilanga pa mutyima otudi nao’u ne pa mutyima wa kyelekejo, o mwanda twi bekilame mu mavese. Inoko mu bisonekwa bityetye mokekiletapo buluji biyampe, twi balamune mulangwe mwine. Kimfwa, mu mukanda wa Nkindi, twi balamune amba “mubulwe ñeni” pa kyaba kya “mubulwe mutyima,” ebiya mulangwe wa kishima pa kishima twewela kunshi kwa dyani. (Nkindi 6:32; 7:7) E mwalamwininwe ne bishima bikwabo, kimfwa “binune” “ngitu,” ne “lusengo,” mungya myanda īsambilwa’po. (Ngalwilo 45:18; Musapudi 5:6; Yoba 16:15) Bishima bimo i bishintululwe mu “Nshintulwilo ya Bishima bya mu Bible.”

Mu buno bwalamuni bwa Bible mudi bilembwa bibwanine bya kunshi kwa dyani. Divule dine bishilulanga namino:

• “Nansha’mba” I muswelo mukwabo ubwanya kwalamunwa bilembwa bya Kihebelu, Kialamia nansha Kingidiki uleta mulangwe umo onka.—Ngalwilo 1:2, kunshi kwa dyani pa “bukomo bwa Leza”; Yoshua 1:8, pa “diwi ditūke.”

• “Bibwanika padi i” I muswelo mukwabo ubwanya kwalamunwa bilembwa uleta mulangwe mwishile ao’ko wa bine.—Ngalwilo 21:6, pa “kusepa nami”; Zekadia 14:21, pa “mwine Kenani.”

• “Kishima pa kishima i” I bwalamuni bwa kishima pa kishima bwa kishima kya Kihebelu, Kialamia nansha Kingidiki nansha nshintulwilo minemine ya kishima kya mu ludimi lubajinjibajinji.—Ngalwilo 30:22, pa “dīmi”; Divilu 32:9, pa “mitwe myūmu.”

• Nshintulwilo ne myanda mikwabo ya mu kine kitatyi’kya Nshintulwilo ya majina (Ngalwilo 3:17, pa “Adama”; Divilu 15:23, pa “Mala”); myanda itala bulēmi ne bipimo (Ngalwilo 6:15, pa “maboko”); mwinē mpingakani wa dijina (Ngalwilo 38:5, pa “Aye”); myanda mikwabo ya kamweno idi mu Mbwejo ne mu Nshintulwilo ya Bishima.—Ngalwilo 37:35, pa “Kibundu”; Mateo 5:22, pa “Ngehena.”

Mu kipindi kya ku ngalwilo kinena’mba, “Ntwelelo ya Kinenwa kya Leza,” mudi mulongo wa bufundiji bwa kyalwilo butanwa mu Bible. Kupwa’tu kwa mukanda wa Kusokwelwa ke “Mulongo wa  Mikanda ya mu Bible,” “Nondelo ya Bishima bya mu Bible,” ne “Nshintulwilo ya Bishima bya mu Bible.” Nshintulwilo ya Bishima ikwashanga mutangi evwanije bishima bitongelwe mungya mobingidijibwe mu Bible. Mu Mbwejo A mudi bino bipindi: “Misoñanya ya Bwalamuni bwa Bible,” “ Myanda Mikatampe Idi mu Buno Bwalamuni,” “Muswelo Wafikile Bible Kotudi,” “Dijina dya Leza mu Bisonekwa bya Kihebelu,” “Dijina dya Leza mu Bisonekwa bya Kingidiki bya Bwine Kidishitu,” “Tabulo: Bapolofeto ne Balopwe ba Yuda ne ba Yelusalema,” ne “Myanda Mikatampe ya mu Būmi bwa Yesu Pano pa Ntanda.” Mu Mbwejo B mudi tulata, matabulo, ne myanda mikwabo ya kamweno ya kukwasha befundi ba Bible ba kininga.

Mu bilembwa bya Bible, mukanda ne mukanda i mulombole myanda idi mu mashapita, ne mavese moiselelwe, amba mutangi ayuke bidi mu mukanda onso mutuntulu. Mu mukuku wa pa bukata wa paje ne paje mudi bisonekwa bya kunyemena’ko biselelwe mu malamuni mabajinji, bilombola mavese makwabo a mu Bible esambila pa mwanda’wa.