Ñimbo ya Mitōto 51:1-19
Kudi mukulu wa bañomba. Lwimbo lwa Davida, patwelele mupolofeto Natana kwadi, Davida pa kupwa kulāla na Bafe-Sheba.+
51 A Leza ntōkelwe mutyima, mwendele buswe bobe bwa ndamatyidile.+
Bula kujilula kwami mwendele lusa lobe lukatakata.+
2 Ngoije senene kilubo kyami,+Kadi ntōkeje ku bubi bwami.+
3 Mwanda ndyukile biyampe kujilula kwami,Kadi bubi bwami budi nyeke ku meso ami.*+
4 I abe onalubila kutabuka bonso;*+Nalonga kyokya kibi ku meso obe.+
O mwanda wi moloke powisamba,Udi na bubinga mu kutyiba kobe kwa mambo.+
5 Tala! Nabutwilwe na mambo,Kadi mama wañimite mu bubi.*+
6 Tala! Abe usangelanga bubine budi mu muntu wa munda;+Fundija bya munda byami* tunangu twa bine.
7 Ntōkeje ku bubi bwami na kimuna kya hisopa, amba ngikale utōka;+Ngoije, amba ntōke tō kupita mashika mekwate.+
8 Ngivwanije mawi a nsangaji ne kusepelela,Amba mikupa yowasonsakenye isepelele.+
9 Tala kungi,* kokatala bubi bwami,+Kadi talula* bilubo byami byonso.+
10 Panga mondi mutyima utōka, a Leza,+Kadi tūla munda mwami mushipiditu mupya,+ wa kininga.
11 Kokansonsolola ku meso obe;Kadi kokantalula mushipiditu obe ujila.
12 Njokejeje nsangaji ya lupandilo lobe;+Sañamuna munda mwami mutyima wa kukukōkela.*
13 Nkafundijanga boba bajilula bijila mashinda obe,+Amba babipya-mambo bajokele kodi.
14 Mpandije ku mambo a mashi,+ abe Leza, Leza wa lupandilo lwami,+Amba ludimi lwami lusapule na nsangaji boloke bobe.+
15 A Yehova, mumununa milomo yami,Amba kyakanwa kyami kisapule mitendelo yobe.+
16 Mwanda abewa kusakangapo kitapwa—longa nakupe’kyo;+Kuloelelwangapo kyamulambu kisōkwe kituntulu.+
17 Bitapwa bisangaja Leza i mushipiditu mutyumuke;Mutyima mutyumuke ne musonsakane, abe Leza, kukewelapo.*+
18 Longela Ziona kyokya kiyampe na mutyima obe muyampe;Ubaka mumbu ya Yelusalema.
19 Penepo ukaloelelwa bitapwa bya boloke,Bitapwa bisōkwe ne byamulambu bituntulu;
Penepo bañombe bakalambulwa pa kisōkelo kyobe.+
Kunshi kwa Dyani
^ Nansha’mba “mu ñeni yami.”
^ Kishima pa kishima i, “abe bunka bobe.”
^ Nansha’mba “Kadi ne wa bubi tamba kitatyi kyañimite mama.”
^ Nansha’mba “bifyame byami.”
^ Nansha’mba “Fya mpala yobe.”
^ Nansha’mba “bula.”
^ Kishima pa kishima i, “Nkwashe’ko na mushipiditu usaka.”
^ Nansha’mba “kukeufutululapo.”
