Bene Kodinda Umbajinji 16:1-24
16 Ino pa mwanda wa mukongo wa bajila,+ mukokeja kulonda byobya byonalombwele bipwilo bya mu Ngalatea.
2 Mu difuku dibajinji dya yenga ne yenga, muntu ne muntu alee’ko kantu kampanda mungya muswelo wandi, kutyina’mba kwakekala mikongo shi nafika.
3 Ino shi nafika kwako, nsa kutuma bantu bomwitabije mu mikanda yenu+ bakatūle byabuntu byenu bya na mutyima umo ku Yelusalema.
4 Inoko, shi bimweka’mba i biyampe ne ami ñende’ko, nankyo nsa kwenda nabo lumo.
5 Inoko nsa kwiya komudi shi napite mu Masedonya, mwanda nsa kukapita mu Masedonya;+
6 kadi padi nsa kushikata nenu nansha kupityija nenu kitatyi kya mashika, amba mukanshindikile kokwa konsa kwenda.
7 Mwanda nkisakilepo kwimumona panopano bya lupito, mwanda nkulupile kwikala nenu kitatyi kampanda,+ shi Yehova* uswile.
8 Ino nashala bidi mu Efisesa+ kufika ne ku Masobo a Pentekosa,
9 mwanda kibelo kikatampe kitwala ku mingilo i kinshitwilwe,+ ino kudi bakinkwa bavule.
10 Ino shi Temote+ wafika, tadijai kutyina’mba wakekala na kintu kyatyina kitatyi kyadi mu bukata mwenu, mwanda wingilanga mwingilo wa Yehova,*+ monka moñingidila’o ami.
11 Nanshi, muntu nansha umo kakimufutulula. Mutumei mu ndoe, amba āye kuno kondi, mwanda ami mwilaije pamo ne banabetu.
12 Ino pa mwanda wa Apolosa+ mwanetu, namwisāshile āye komudi pamo ne banabetu. Aye kadipo na mutyima wa kwiya panopano, inoko usa kwiya shi wamone kyaba.
13 Talai’nka kutala,+ imanijai pototo mu lwitabijo,+ ikalai bwa bana-balume,*+ mwikomejei.+
14 Byonso byomulonga longai’byo na buswe.+
15 Pano nemwisāshila, banwe banabetu: Muyukile amba ba mu njibo ya Shitevanusa byo byangulwa bibajinji bya mu Akaya ne amba i bepāne mu kwingidila bajila.
16 Kadi mwikale kukōkelelela bantu badi bwa abo ne boba bonso bengidila pamo kadi bengila bininge.+
17 Ino nasangala byondi na Shitevanusa,+ Fotunatusa, ne Akaikusa, mwanda abemupingakena byomudi patupu.
18 Mwanda abatūja mushipiditu wami ne wenu mwine. Nanshi lēmekai bantu ba uno muswelo.
19 Bipwilo bya mu Azia bibemwimuna. Akwila ne Piseka pamo ne kipwilo kidi mu yabo njibo+ abemwimuna na mutyima umo mudi Mfumwetu.
20 Banabetu bonso abemwimuna. Mwiimunei banwe bene na bene na mififyo ijila.
21 Luno i lwimu lwami, ami Polo, lonalemba na makasa ami.
22 Shi muntu kasenswepo Mfumwetu kisanso kikatampe, afingwe mafingo. Ee, a Mfumwetu, iya!
23 Kanye ka ku buntu bitupu ka Mfumwetu Yesu kekale nenu.
24 Buswe bwami bwikale nenu banwe bonso mudi Kidishitu Yesu.
