Samwele Umbajinji 1:1-28
1 Ino kwadi mwana-mulume umo wa mu Lamataimi-Zofimi*+ mu ntanda ya ngulu ya Efelaimi+ wa dijina dya bu Elekana,+ mwanā Yelohama, mwanā Edihu, mwanā Tohu, mwanā Zufe, mwine Efelaimi.
2 Wadi na bakaji babidi, dijina dya umo i Hana, ne dijina dya mukwabo i Penina. Penina wadi na bana, ino Hana kadipo na mwana nansha umo.
3 Uno mwana-mulume wadi ukanda mwaka ne mwaka tamba ku kyabo kibundi ukatōta* ne kulambula bitapwa kudi Yehova wa bibumbo mu Shilo.+ Ye kwadi kwingila ne bana babidi ba Edi, ba Hofini ne Finease,+ bu babitobo ba Yehova.+
4 Difuku dimo Elekana pa kulambula kitapwa, wapa wandi mukaji Penina bipindi pamo ne bandi bana bonso bana-balume ne bana-bakaji,+
5 ino wapa Hana kipindi kishile na bikwabo, mwanda Hana ye waadi usenswe bininge, inoko Yehova kamupēlepo bana.*
6 Ne kadi mukao-nandi wadi umukolomona kitatyi kyonso mwanda wa kumufītyija mutyima mwanda’po’tu Yehova kamupēlepo bana.
7 Ye mwaadi ulongela mwaka ne mwaka; ponso padi pakanda Hana ku njibo ya Yehova,+ mukao-nandi wadi umukolomona bininge, nandi kadila ne kudya kwine mpika.
8 Ino wandi mulume Elekana wamunena’mba: “A Hana, le kyodidila i kika, ne kyokudīlapo kine i kika, kadi kyofītyīlwe bininge ku mutyima i kika le?* Le nkikunengelelepo kutabuka bana dikumi bana-balume?”
9 Kupwa Hana waimana abo pa kupwa kudya ne kutoma mu Shilo. Papo kitobo Edi wadi ushikete pa kityi dya pa ñunji ya tempelo*+ ya Yehova.
10 Hana wadi na bululu* bya mwiko, penepa waanza kulombela kudi Yehova+ koku udila bibibibi.
11 Kadi wapikile ne ino mpiko amba: “A Yehova wa bibumbo, shi ute mutyima ku malwa a mwingidi obe ne kumvuluka, kadi shi kwidilwepo mwingidi obe ino umupe mwana mwana-mulume,+ nkamupāna kudi Yehova mafuku onso a būmi bwandi, kadi bwembe kebukatengapo ku mutwe wandi.”+
12 Paadi ulombela kitatyi kilampe ku meso a Yehova, Edi wadi umutala ku kyakanwa.
13 Hana wadi wisamba mu mutyima wandi, enka milomo yo yadi ijina, inoko diwi dyandi kedyadipo divwanikwa. Penepa Edi walanga’mba i mukolwe.
14 Edi wamunena’mba: “Le ukekala mukolwe kufika ne kitatyi’ka? Leka kutoma vinyu.”
15 Penepo Hana wamulondolola’mba: “Aa, a mfumwami! Ne mwana-mukaji udi na njia mikatampe;* nkitomenepo vinyu nansha kintu kikolwañana, ino mpungulwilanga muya* wami ku meso a Yehova.+
16 Kokamona mwingidi obe bu mwana-mukaji wa bituputupu, mwanda nekīsamba ne pano mungya malwa ami makatampe ne tusua twami.”
17 Kupwa Edi walondolola’mba: “Enda mu ndoe, kadi Leza wa Isalela akupe kyowamulomba.”+
18 Nandi wanena’mba: “Tōkelwa’po mwingidi obe mutyima.” Ebiya mwana-mukaji waenda wadya ne kudya, ne mpala yandi keyakidipo mifītwe.
19 Penepa babūka lubanga futwi bevukwila ku meso a Yehova, kupwa bakajokela ku yabo njibo mu Lama.+ Elekana walāla na wandi mukaji Hana, Yehova nandi wata* Hana mutyima.+
20 Mu mwaka umo* Hana waimita, wabutula mwana mwana-mulume, wamwinika+ bu Samwele,* mwanda wanenene amba, “I kudi Yehova konamulombele.”
21 Mwenda mafuku Elekana wakanda pamo ne ba mu njibo yandi bonso kukalambula kitapwa kya owa mwaka kudi Yehova+ ne kutūla kyamulambu kya mpiko yandi.
22 Ino Hana kakandilepo,+ mwanda wanenene wandi mulume amba: “Shi mwana’tu waleka mabele, nsa kumuleta; kupwa usa kukamweka ku meso a Yehova kadi ekale konka lonso.”+
23 Kupwa Elekana wandi mulume wamunena’mba: “Longa byobya byolanga’mba i biyampe kutabuka.* Shala ku njibo enka ne byosa kumulekesha mabele. Yehova afikidije byowanena.” Ebiya mwana-mukaji washala ku njibo walela wandi mwana kufika ne byaamulekeshe mabele.
24 Aye’tu umulekesha mabele, wakanda nandi ku Shilo, pamo ne ñombe mulume wa myaka isatu, ne efa* umo wa bukula, ne mutyibi mukatampe wa vinyu,+ kupwa wafika ku njibo ya Yehova mu Shilo+ koku uselele ne wandi mwana.
25 Penepo batapa ñombe’wa, baleta ne mwana kudi Edi.
26 Ebiya Hana wanena’mba: “Mfwile’ko’po lusa, a mfumwami! Bine ne byodi mūmi,* abe mfumwami, i ami mwana-mukaji waimene nobe mu kino kifuko nombela kudi Yehova.+
27 Nadi nombela pa mwanda wa uno mwana, kadi Yehova waumpe kyonamulombele.+
28 Ami nami pano namupāna* kudi Yehova. Mu mafuku andi onso, i mupānwe kudi Yehova.”
Penepa nandi* wevukwila ponka’pa ku meso a Yehova.
Kunshi kwa Dyani
^ Nansha’mba “wa ku Lama, mwine Zufe.”
^ Nansha’mba “ukevukwila.”
^ Kishima pa kishima i, “washityile ndá yandi.”
^ Nansha’mba “mwanda waka mutyima ukusansa?”
^ Ko kunena’mba, kipema.
^ Nansha’mba “muya wa bululu.”
^ Tala Nshintulwilo ya Bishima.
^ Nansha’mba “mwana-mukaji mutyinibwe bininge mu mushipiditu.”
^ Kishima pa kishima i, “wavuluka.”
^ Bibwanika padi i, “Mu kitatyi kifwaninwe.”
^ Ko kushintulula’mba “Dijina dya Leza.”
^ Kishima pa kishima i, “byobya biyampe mu meso obe.”
^ Kintu kya malitele 22 (makwatyi 20 a byūmu). Tala Mbwejo B14.
^ Nansha’mba “Mwendele būmi bwa muya obe.”
^ Kishima pa kishima i, “namwapwija.”
^ Mobimwekela kifunkila pa Elekana.
