Divilu 24:1-18
24 Ebiya wanena Mosesa amba: “Kanda kudi Yehova, abe ne Alone, Nadaba ne Abihu,+ ne bakulumpe ba Isalela 70, mukevukwile dya kulampe.
2 Mosesa ukafwena kudi Yehova bunka; ino bakwabo kebakafwenapo pabwipi, kadi bantu kebakakandapo nandi.”+
3 Ebiya Mosesa waiya wasapwila bantu binenwa byonso bya Yehova ne mutyibilo wa mambo,+ kadi bantu bonso balondolola kya pamo amba: “Binenwa byonso byanena Yehova, twitabije kwibilonga.”+
4 Penepo Mosesa waandika binenwa byonso bya Yehova.+ Kupwa wabūka lubanga bwē waubaka kisōkelo munshi mwa lūlu ne bikomo 12 mungya bisaka 12 bya Isalela.
5 Kupwa watuma bansongwalume bene Isalela, bakalambula byamulambu bisōkwe baela ne bitapwa bya bañombe bu bitapwa bya kipwano+ kudi Yehova.
6 Ebiya Mosesa wayata’ko kipindi kya mashi waela’o mu ngeso, ne kipindi kikwabo kya mashi wakusa pa kisōkelo.
7 Penepo wayata mukanda wa kipwano katangila’o bantu na diwi dikatampe.+ Nabo banena’mba: “Byobya byonso byanena Yehova twitabije kwibilonga, kadi tukebikōkelanga.”+
8 Penepa Mosesa wayata mashi wakusa’o bantu+ kanena’mba: “Ano’a i mashi a kipwano kyasamba nenu Yehova mungya bino binenwa byonso’bi.”+
9 Mosesa ne Alone, Nadaba ne Abihu, ne bakulumpe ba Isalela 70 bakanda,
10 kadi bamwene Leza wa Isalela.+ Munshi mwa maulu andi mwadi kintu kimweka bwa mabwe a safile māle, kadi kyadi kitōka tō pamo bwa madiulu onkaonka.+
11 Kasanshijepo bantu ba bulēme ba Isalela,+ kadi bamwene kimonwa kya Leza wa bine, badya ne kutoma.
12 Ponkapo Yehova wasapwila Mosesa amba: “Kandila kuno kondi ku lūlu wikale konka. Nsa kukupa bipāpo bya mabwe na bijila ne mbila byonkalemba mwanda wa kwibafundija.”+
13 Penepo Mosesa wataluka pamo ne mwingidi wandi Yoshua,+ kadi Mosesa wakanda ku lūlu lwa Leza wa bine.+
14 Penepa wanena bakulumpe amba: “Mwitukungilei pano’nka ne byotujokela komudi.+ Mudi na Alone ne Hula.+ Ense udi na mambo a kusamba ubwanya kwenda kobadi.”+
15 Ebiya Mosesa wakanda ku lūlu papo dikumbi dyadi dilupūte.+
16 Ntumbo ya Yehova+ yadi pa Lūlu lwa Shinai,+ kadi dikumbi dyadi dilupūte mafuku asamba. Mu difuku dya busamba-bubidi, aye papo mu bukata mwa dikumbi waita Mosesa.
17 Ku bene Isalela badi batala, ntumbo ya Yehova yadi imweka pamo bwa mudilo uloteja pa nsongo ya lūlu.
18 Penepo Mosesa watwela mu dikumbi kakanda ku lūlu.+ Kadi Mosesa washikete pa lūlu mafuku 40, dyuba ne bufuku.+
