Kusokwelwa Kudi Yoano 14:1-20
14 Penepo namwene, na’mba ntale! Kana ka Mukōko+ kemene pa Lūlu lwa Ziona,+ kadi wadi pamo na bantu 144 000+ balembwe dijina dyandi ne dijina dya Shandi+ pa mapala abo.
2 Naivwene diwi ditamba mūlu pamo bwa lupumo lwa mema mangi ne pamo bwa kukungula kwa mukungulo mukatampe; kadi diwi dyonaivwene dyadi pamo bwa batuimba bomba nsense yabo.
3 Kadi bembanga lwimbo ludi pamo bwa lwimbo lupya+ kumeso kwa lupona ne ku meso a bipangwa byūmi biná+ ne bakulumpe,+ kekwadipo muntu wabwenye kuyuka biyampe lolwa lwimbo poso enka boba 144 000,+ bapotelwe pano pa ntanda.
4 Bano’ba bo bampikwa kwisubija na bana-bakaji; na bubine, i bajike.+ Bano’ba bo balondanga nyeke Kana ka Mukōko konso kokenda.+ Bano’ba bapotelwe+ mu bantu bu byangulwa bibajinji+ bya Leza ne bya Kana ka Mukōko,
5 mu byakanwa byabo kemwatenwepo bongojani nansha bumo; i ba kubulwa kakoba.+
6 Kadi namwene mwikeulu mukwabo wipapa mu bukata mwa mūlu,* wadi na myanda miyampe ya nyeke ya kusapwila boba bekele pano pa ntanda, mizo yonso ne bisaka ne ndimi ne bantu.+
7 Kanena na diwi dikatampe amba: “Tyinai Leza, mutumbijei ntumbo, mwanda kitatyi kya butyibi bwandi kibafika,+ nanshi tōtai Yewa walongele diulu ne ntanda ne dijiba+ ne masulo a mema.”
8 Mukwabo, mwikeulu wa bubidi walonda’po kanena’mba: “Wapone! Babiloni Mukatampe+ wapone,+ aye wadi utomeja mizo yonso vinyu ya kilokoloko kya* busekese*+ bwandi!”
9 Mwikeulu mukwabo, wa busatu, webalonda kanena na diwi dikatampe amba: “Shi muntu utōta kinyema kya ntanda+ ne kyelekejo kyakyo, ne kutambula kayukeno pa mpala nansha pa kuboko kwandi,+
10 nandi ukatomanga vinyu ya bulobo bwa Leza ipungululwa mu kitomeno kya bukalabale Bwandi+ yampikwa kusābulwa, kadi ukamweshibwa malwa na mudilo ne bibidikityi+ mu meso a bamwikeulu bajila ne mu meso a Kana ka Mukōko.
11 Kadi mwishi wa malwa abo ukandanga nyeke ne nyekeke,+ kadi dyuba ne bufuku kebakōkolokwangapo nansha dimo, boba batōta kinyema kya ntanda ne kyelekejo kyakyo, ne yewa ense utambula kayukeno ka dijina dyakyo.+
12 Pano po palomba bajila bekale na kūminina,+ boba balama mbila ya Leza ne kukwatyija lwitabijo+ lwa Yesu.”
13 Kadi naivwene diwi ditamba mūlu kedinena’mba, “Lemba’mba: Ba nsangaji i boba bafwa mu bumo na Mfumwetu+ tamba pano. Bine, e mwanenena mushipiditu, wibaleke bakōkolokwe ku mingilo yobasusukile nayo, mwanda bintu byobalongele bibakunkujanga.”*
14 Penepo namwene, na’mba ntale! dikumbi ditōka tō, kadi yewa wadi ushikete pa dikumbi wadi pamo bwa mwanā muntu,+ wadi na kilukwa kya olo ku mutwe wandi ne kikwakwa kya bui mu kuboko kwandi.
15 Mwikeulu mukwabo walupuka mu kipandulwe kya tempelo, kanena na diwi dikatampe yewa wadi ushikete pa dikumbi amba: “Pityija’mo kikwakwa kyobe unoe, mwanda kitatyi kya kunoa kibaiya, mwanda mwangulo wa ntanda ubaele bininge.”+
16 Penepo yewa wadi ushikete pa dikumbi waolwela kikwakwa kyandi pano pa ntanda, ne ntanda nayo yanoibwa.
17 Ebiya kadi mwikeulu mukwabo walupuka mu kipandulwe kya tempelo kidi mūlu; nandi wadi na kikwakwa kya bui.
18 Ebiya kadi mwikeulu mukwabo walupuka ku kisōkelo, kadi wadi na lupusa pa mudilo. Kanena na diwi dikatampe yewa wadi na kikwakwa kya bui, amba: “Pityija’mo kikwakwa kyobe kya bui ukongakanye bisansa bidi ku muñanza wa pano pa ntanda, mwanda mañanza abaele.”+
19 Mwikeulu’wa waolwela kikwakwa kyandi pano pa ntanda kakongakanya muñanza wa pano pa ntanda, kupwa wewela mu kyengelo kya vinyu kikatampe kya bulobo bwa Leza.+
20 Kadi wapondelwa mu kyengelo kya vinyu panja pa kibundi, penepo mashi atamba mu kyengelo kya vinyu’kya akanda kufika ne mu nkano ya tubalwe, mu bula bwa makilometele kubwipi kwa 296.*
Kunshi kwa Dyani
^ Nansha’mba “mu lwelēle; peulu.”
^ Mu Kingidiki i, porneia. Tala Nshintulwilo ya Bishima.
^ Nansha’mba “bulobo bwa.”
^ Nansha’mba “byendanga nabo pamo.”
^ Kishima pa kishima i, “biwanza 1 600.” Kiwanza kimo i mametele 185 (mayo 606,95). Tala Mbwejo B14.
