Kusokwelwa Kudi Yoano 18:1-24
18 Bino’bi pa kupita’po namwene mwikeulu mukwabo utūka mūlu na lupusa lukatampe, penepo ntanda yamunikilwa na ntumbo yandi.
2 Ebiya waela lubila na diwi dikatampe, amba: “Wapone! Babiloni Mukatampe wapone,+ waikala ke kīkalo kya bandemona ne kifuko mufyama mishipiditu* yonso ya disubi ne byoni byonso bya disubi kadi bishikibwe!+
3 Pa mwanda wa vinyu ya kilokoloko kya* busekese* bwandi, mizo yonso ibakwatwa,+ ne balopwe ba pano pa ntanda nabo balongele nandi busekese,+ ne bansunga* ba pano pa ntanda nabo bapetele pa mwanda wa bukomo bwandi bwa kungwija bya bupeta pampikwa bumvu.”
4 Kadi naivwene diwi dikwabo dilupuka mūlu kedinena’mba: “Tambai’mo, banwe bantu bami,+ shi kemusakilepo kwiabila nandi bubi bwandi, ne shi kemusakilepo kutambula ku mpupo yandi.+
5 Mwanda bubi bwandi bubaungwila mulwi kufika ne mūlu,+ kadi Leza wavuluka bilongwa byandi bya bukondame.*+
6 Mwalwijei monka mwaadi ulongela bakwabo,+ bine, mulubwilei pabidi bintu byaadi ulonga;+ mu kitomeno+ mwaatyangile’mwa, mutyangilei’mo dibidi.+
7 Monka mwaetumbijije aye mwine ne kwikala mu būmi bwa bupeta pampikwa ne bumvu bwine, mo monka nenu mumweshei malwa ne kumutweja mu madilo. Mwanda unenanga’nka kunena mu mutyima wandi amba: ‘Ami nshikete bu mulopwe mukaji, kadi nkidipo mukaji wa kishala, nkikekalapo mu madilo nansha dimo.’+
8 O mwanda mpupo yandi ikāya mu difuku dimo dyonka, lufu ne madilo ne nzala, kadi ukasōkwa na mudilo fututu,+ mwanda Yehova* Leza, mwine wamutyibila mambo, i mukomo.+
9 “Kadi balopwe ba pano pa ntanda balongele nandi busekese* ne kwikala nandi mu būmi bwa bupeta pampikwa bumvu bakamudila beyaya bya bulanda pa kumona mwishi wa kusōkwa kwandi.
10 Bakemana kulampe mwanda wa kutyina malwa amufikila kebanena’mba: ‘Yō, i kya bulanda, i kya bulanda, abe kibundi kikatampe,+ abe Babiloni kibundi kikomo, mwanda mu nsá imo yonka butyibi bobe bubafika!’
11 “Ne bansunga ba pano pa ntanda nabo kebamudila bayoyokota mwanda kekukidipo muntu wa kupota monka bintu byabo bivulevule,
12 bintu bivulevule bya olo, ndalama, mabwe malēme, malungo, bukonge bulumbuluke, bisandi bityilakana, bisandi bya swá, ne bisandi bityila pyā; ne bintu byonso bilongelwe na mityi inunka mwenye; ne bintu bya miswelo yonso bipungilwe na meno a banzovu, ne na mityi milēme, mukuba, byuma, ne mimfinye;*
13 kadi ne shinamona, nketyi,* ensense, māni a mananshi, ensense itōka, vinyu, māni a mpafu, bukula bupēla, ñano, bañombe, mikōko, tubalwe, matempa,* bapika, ne būmi bwa* bantu.
14 Bine, bipa bilumbuluke byowadi usakasaka* bibakufunduka, ne bintu byonso bya munsonso ne bya buya bwa dyangi bibakujimina, kebikamwekapo monka nansha dimo.
15 “Bansunga badi bapoteja bino bintu, bene bapetēle kwadi, bakemana kulampe mwanda wa kutyina malwa amufikila, kebadila bayoyokota,
16 amba: ‘Yō, i kya bulanda, i kya bulanda—kibundi kikatampe, kivwele bukonge bulumbuluke, bityilakana ne bityila pyā, kineñenye senene shē na bya kwidyangula nabyo bya olo ne mabwe malēme ne malungo,+
17 mwanda mu nsá imo yonka buno bupeta bukatampe bubaonakanibwa fututu!’
“Kadi kapita ne kapita wa masua ne muntu ense wenda pa mema, ne bengidi ba mu kyombo ne boba bonso badīlanga mu majiba, baimene kulampe
18 kebela mabila pobamwene mwishi wa kusōkwa kwandi, kebanena’mba: ‘Le i kibundi’ka kidi pamo bwa kino kibundi kikatampe?’
19 Betūta luvumbi ku mitwe yabo kebela mabila koku badila bayoyokota’mba: ‘Yō, i kya bulanda, i kya bulanda, kibundi kikatampe, kyapeteje boba bonso badi na byombo pa lui na bupeta bwakyo, mwanda mu nsá imo yonka kibaonakanibwa fututu!’+
20 “Sepelela pa mwanda wandi, abe diulu,+ ne banwe bajila+ ne batumibwa ne bapolofeto, mwanda Leza wamutyibila mambo pa mwanda wenu!”+
21 Kadi mwikeulu umo mukomo watekuna dibwe didi pamo bwa dibwe dikatampe dya mpelo wedyela pa dijiba, kanena’mba: “Namino e mukelelwa lubilo lonka Babiloni kibundi kikatampe, kadi kakamwekapo monka nansha dimo.+
22 Ne mawi a batuimba bemba na lunsense, bañomba, bēla nshiba, ne bavumija bimpungidi keakevwanwapo dikwabo modi. Kadi i kutupu sendwe wingila kaji ko-konso ukatanwa dikwabo modi, ne kadi i kutupu lunwa lwa dibwe dya mpelo lukevwanwa dikwabo modi.
23 I kutupu kitōkeji kya kinanu kikamunika dikwabo modi, kadi i kutupu diwi dya musoñañani ne dya mutundaile dikevwanwa dikwabo modi; mwanda bansunga bobe badi bantu ba majina ba pano pa ntanda, kadi mizo yonso yaongwelwe na bilongwa+ byobe bya majende.
24 I amo, mudi aye mwatenwe mashi a bapolofeto ne a bajila+ ne a boba bonso batapilwe pano pa ntanda.”+
Kunshi kwa Dyani
^ Bibwanika padi i, “umpuya; kupūja; binenwa bya ku mushipiditu.”
^ Nansha’mba “bulobo bwa.”
^ Mu Kingidiki i, porneia. Tala Nshintulwilo ya Bishima.
^ Nansha’mba “bansunga bendakana.”
^ Nansha’mba “bunkuma-bibi bwandi.”
^ Tala Nshintulwilo ya Bishima.
^ Nansha’mba “bikundulu; bikundudyu.”
^ Nansha’mba “nketu; bisombelwa bya bene India.”
^ Nansha’mba “bilandala bañombe.”
^ Nansha’mba “myuya ya.”
^ Nansha’mba “byadi bisakasaka muya obe.”
