Kusokwelwa Kudi Yoano 5:1-14
5 Kadi namwene mu kuboko kwa lundyo kwa Yewa ushikete pa lupona+ muvungo mulembe momu ne momu,* mulamikwe bininge na biyukeno bisamba-bibidi.
2 Kadi namwene mwikeulu mukomo wela lubila na diwi dikatampe amba: “Lelo i ani mufwaninwe kuvungulula owa muvungo ne kulamuna biyukeno byao?”
3 Ino kekwadipo muntu nansha umo shi mūlu shi pano panshi shi munshi mwa panshi wadi ubwanya kuvungulula muvungo nansha kutala’mo.
4 Penepo naanza kudila bya mwiko mwanda kekwatenwepo muntu wadi mufwaninwe kuvungulula muvungo nansha kutala’mo.
5 Ino umo mu bakulumpe waunena’mba: “Leka kudila. Tala! Ntambo wa ku kisaka kya Yuda,+ muji+ wa Davida,+ wanekenya+ mwanda wa kuvungulula muvungo ne kulamuna biyukeno byao bisamba-bibidi.”
6 Kadi namwene mu bukata mwa* lupona ne mwa bipangwa byūmi biná ne mu bukata mwa bakulumpe+ mwimene kana ka mukōko+ kadi kamweka’nka bwa katapwe,+ ka masengo asamba-abidi ne meso asamba-abidi, kadi ano meso elekeja mishipiditu isamba-ibidi ya Leza+ yatuminwe mu ntanda yonso.
7 Ponkapo waiya, wayata’o ku kuboko kwa lundyo kwa Yewa ushikete pa lupona.+
8 Aye pa kuyata muvungo, bipangwa byūmi biná ne bakulumpe 24+ bapona panshi ku meso a Kana ka Mukōko, kadi umo ne umo wadi na lunsense ne ngeso ya olo miyule’mo ensense. (Ensense yelekeja milombelo ya bajila.)+
9 Penepa kebembe lwimbo lupya,+ amba: “Abe shobe wi mufwaninwe kuyata muvungo ne kulamuna biyukeno byao, mwanda watapilwe kadi na mashi obe wapotēle Leza bantu+ ba ku bisaka byonso ne ndimi ne bantu ne mizo,+
10 kadi webalamwine ke bulopwe+ ne babitobo ba Leza+ wetu, kadi bakabikalanga bu balopwe+ pa ntanda.”
11 Namwene, kadi naivwene diwi dya bamwikeulu bangi bajokolokele lupona ne bipangwa byūmi ne bakulumpe, ne bungi bwabo badi tununu makumi twa tununu makumi* ne tununu twa tununu,+
12 kadi badi banena na diwi dikatampe amba: “Kana ka Mukōko katapilwe+ ko kafwaninwe kupebwa bukomo ne bupeta ne tunangu ne buninge ne bulēme ne ntumbo ne dyese.”+
13 Kadi naivwene kipangwa ne kipangwa mūlu ne pano panshi ne munshi mwa panshi+ ne mu dijiba, ne bintu byonso bidi’mo, kebinena’mba: “Yewa ushikete pa lupona+ ne Kana ka Mukōko+ beselwe dyese ne kupebwa bulēme+ ne ntumbo ne bukomokomo nyeke ne nyekeke.”+
14 Bipangwa byūmi biná byadi binena’mba: “Amena!” ebiya bakulumpe nabo bapona panshi kebatōta.
Kunshi kwa Dyani
^ Kishima pa kishima i, “munda ne pangala.”
^ Nansha’mba “pa bukata bwa.”
^ Nansha’mba “makumi a tununu misunsa makumi a tununu.”
