Mu mwaka wa 2020 mwalongekele bimpengele bya kipangila bivule kadi mwashilwile ne kipupo kya COVID-19 kyaponene ntanda yonso. Le Batumoni ba Yehova bakweshe namani boba bafikilwe nabyo?

 Mu mwaka wa mingilo wa 2020, a Komite wa Bakwatakani wa Kitango Kyendeji waitabije kulupula madolala midiyo 28 b mwanda wa kukwasha baponenwe na kimpengele. Luno lupeto lwakweshe bantu baponenwe na bimpengele 200 ne kupita—kubadila’mo ne kipupo kya COVID-19, bimpumpu bivule, dilobe mu Afrika, bipupo bya nzala mu Venezuela, ne mulanga mu Zimbabwe. Lupeto lwa byabuntu lwakweshe ku kupota bya kudya, mema, mwa kwikala, bivwalwa, bundapi ne bingidilwa bikwabo bya kukundula nabyo, kulongolola, ne kūbakulula. Tala’tu bimfwa bimo bya mwingilo wa kukwasha baponenwe na bimpengele.

 COVID-19. Kujokolola ntanda yonso, kipupo kyasuswile batutu ne bakaka ku ngitu, mu ñeni ne mu myanda itala lupeto. Pa kwibakwasha, kwabundilwe ntanda yonso Makomite 800 Atala Myanda ya Kukwasha Boba Baponenwe na Bimpengele. Batutu ba mu ano makomite babandawile bisakibwa bya banabetu ne kutuma malapolo bukidibukidi, mene akweshe Komite wa Bakwatakani ayuke muswelo muyampe wa kuleta bukwashi.

 Mu bula bwa mwaka, Makomite Atala Myanda ya Kukwasha Boba Baponenwe na Bimpengele akweshe bantu na byakudya, mema, bintu bya kulama bukundwe, ne malawa. Mu bifuko bimo ano Makomite aingile bininge pamo na bakulumpe mwanda wa kukwasha banabetu batambule bukwashi bwa Leta.

 Bantu ke Batumonipo bamwene mwingilo wetu wa kukwasha. Kimfwa, Field Simwinga, wa lupusa wa mu kibundi kya Nakonde, mu Zambia, wasapwidile batutu amba: “Tudi na mapu pa buno bukwashi bwa pa kitatyi kifwaninwe bwakwashibwe bisaka byaponenwe na misongo.”

 Kimpengele kya Nzala mu Angola. Kipupo kya COVID-19 kyalengeje byakudya bityepe mu Angola ne kukanda kwa bei. Batutu ne bakaka bavule bakomenwe’nka ne kupota bya kudya.

 Banenene musambo wa Brezile ukwashe’ko na kutumina banabetu ba mu Angola mifuko ya bya kudya. Pa kwingidija biyampe lupeto lwa byabuntu, banabetu bakimbile biyampe muswelo mulumbuluke wa kupota bya kudya ne kwibituma. Mu uno muswelo, mufuko ne mufuko wapotelwe’tu ne kutumwa na kintu kya madolala 22, inoko mwadi kintu kya makilo 20 a bya kudya, kimfwa mutyele, nkunde, ne māni a kutēkela. Kufika ne pano, kwatuminwe mifuko 33 544, kadi yonso yadi na mantoni 654. Pa kubweja’ko ne byakudya byaletelwe mu kibundi, bino bya kudya byakweshe bantu 50 000!

 Le banabetu beivwene namani pa buno bukwashi? Alexandre, ushikatanga kufula kwa Angola unena’mba: “Mwene buno bukwashi bu bukamoni bulombola’mba Yehova unsenswe ne amba nkidipo bunka. Bulongolodi bwa Yehova buvuijanga bisakibwa byami!” Mariza, inabana ulelele bana bunka unena’mba: “Yehova waivwana milombelo yami. Namufwija’ko pamo ne bulongolodi bwandi!”

 Mulanga mu Zimbabwe. Mu mwaka wa mingilo wa 2020, mu Zimbabwe mwadi mulanga mukatampe, walengeje bantu midiyo ne midiyo bekale mu nzala. Batumoni tununu na tununu ba mu Zimbabwe kebadipo na byakudya bivule.

 Kwabundilwe Makomite atano a Kukwasha Baponenwe na Bimpengele mwanda wa kupa banabetu byakudya. Basapudi tutwa na tutwa bakweshe ku kukuta bya kudya, kwibyomeka mu myotoka, ne kuleta yabo myotoka. c Mu mwaka wa mingilo wa 2020, twaingidije madolala 691 561 mwanda wa kupa bantu 22 700 ne musubu bya kudya!

 Kitatyi kyafikile bukwashi, banabetu bamo badi kebapwe byakudya byabo. Banabetu bafwijije’ko Yehova. Bamo bashilula’nka ne kwimba ñimbo ya Bulopwe.

 Mu kibundi kimo, bakaka babidi ba kishala bakatenwe ku lenyo yateakanibwe mu kibundi mwanda wa kwisambila pa bukwashi bwadi bwa kuleta bulongolodi ke bwa ntandapo. Inoko byaalamuka kebesambe’ko myanda ya politike, ebiya bakaka bapela kulonga byobanenene’ko kulonga pa kutambula bukwashi. Pobadi batamba mu ino lenyo, bebazawila ne kwibanena’mba, “kemwakiyai kwitulomba bya kudya kwetu!” Ino mayenga abidi pa kupita’po, batutu bafika mu kibundi, bapa bano bakaka bya kudya bya bukwashi, abo pabo bukwashi bwa bulongolodi’bwa kebwafikile!

 Bukwashi bwakwashibwe baponenwe na bimpengele mu Zimbabwe nabo bwaletele bukamoni. Kimfwa, tala myanda yatene Prisca ushikatanga mu kakibundi katyetye. Nansha byatenwe na makambakano aletele mulanga, Prisca wadi usapula Dya Busatu ne Dya Butano dyonso, enka ne mu kitatyi kya kudima. Bantu ba mu kibundi badi bamuzawila’mba: “Usa kwipaya bantu ba mu kyobe kisaka nzala pa mwanda wa bobe busapudi.” Prisca webalondolola’mba: “Yehova kabwanyapo kwela bengidi bandi nansha dimo.” Kitatyi kityetye pa kupita’po, watambula bukwashi bwatumine bulongolodi. Kino kyatulumwije balondakani nandi bamo, banena Prisca amba: “Leza kakwelelepo, o mwanda tusaka kuyuka myanda mivule pādi.” Pano balondakani basamba-babidi balondanga kupwila kupityijibwanga ku ladio.

 Pano potwenda tufwena ku mfulo, tukendelela kutanwa na bimpengele bya kipangila. (Mat. 24:3, 7) Bine, tufwijanga’ko bininge pa byabuntu byomutūla na mutyima tō mu miswelo palapala idi mu donate.mt1130.com. Byabuntu byenu bisa kwingidijibwa biyampe mwanda wa kukwasha boba basakilwa bukwashi.