Mu bantu midiyo tutwa na tutwa bashikete mu Amerika wa Kunshi, mudi bantu midiyo ne midiyo badi na yabo ndimi ne bibidiji byabo. Bavule mu bano bana ba kibundi i batutu ne bakaka bene Kidishitu, basenswe kibidiji kyabo kyobapyene. Pa kukwasha bantu befunde bubine bwa mu Bible, balamunanga ne kwabanya mabuku a Batumoni ba Yehova mu ndimi 130 ne kupita ya bana ba kibundi ba mu Amerika wa Kunshi. a Ino bamo mobadi balwibwanga pa butongi bwabo bwa kwingidila Yehova ne pa kupela kulonda bibidiji byampikwa kukwatañana na bisonekwa bivudile mu bantu babo. Le byabuntu byenu bingidijibwanga namani mwanda wa kwibakwasha?

 Mu Meksike, batutu ne bakaka ba Huichol, mu ngulu ya Jalisco, bapelele na bulēme kulonda bisela bya kipwilo, byadi bikambakanya mutyima wabo wa mundamunda. b Ino kino kyalobeje bantu bamo mu kibundi. Mu mafuku 4 Kweji 12, 2017, kibumbo kya bantu kyatamba’dyo kisumpi kya Batumoni ne bantu bakwabo bobadi nabo. Kino kibumbo kyebatambija mu kibundi ku bukomo, kyaonakanya bintu byabo ne kwibazakaja’mba basa kwibepaya shi bajokele’mo.

 Batumoni ba mu bibundi bya pabwipi bavuije bisakibwa bya bukidibukidi bya bano batutu ne bakaka. Ino i bika byadi bya kulongwa mwanda wa bajokele kwabo? Tutu umo witwa bu Agustín unena’mba, “Ketwadipo na lupeto lubwane lwa kufuta avoka, kadi ketwadipo tuyukile kwa kwenda kukalomba madingi a mwa kusambila.”

 Bwanapabo bwa kutōta bwa banabetu byobwadi mu kyaka, Betele ya mu Amerika wa pa Bukata yalonga’po kintu bukidibukidi. Dibajinji, balomba balupusa ba mu kibundi balonge maankete pa bino bintu bibi. Kupwa komite wa bakwatakani wa Kitango Kyendeji kya Batumoni ba Yehova waitabija Betele ingidile pamo na ba ku Mwingilo Utala Myanda ya Bijila badi ku Kité kya ntanda yonso mwanda wa kusamba pa kyaba kya batutu ne bakaka ba Huichol. Ku mfulo uno mwanda wafika ku Kidye Kikatampe kya Ntanda, ko kunena’mba Kidye kikatampe kya mu Meksike.

 Kisumpi kya baavoka ba ntanda yonso kyalemba mikanda, mobashintulwile biyampe amba, monka mufwaninwe kulēmekelwa bibidiji bya bana ba kibundi, bana ba kibundi bene bafwaninwe kulēmekwa ne kukinga bwanapabo bwa mwanā kibundi yense. Bantu bonso badi na bwanapabo kampanda nansha shi bashikatanga kwepi.

 Mu mafuku 8 kweji 7, 2020, Kidye kikatampe kyakwata butyibi mwa kimo bwa kubingija Batumoni ba Yehova. Kyaleta musoñanya wa kujokeja mu kibundi bonso bapangilwe. Agustín otwatelanga kala walombwele kufwija’ko aye ne bakwabo amba: “Tubafwija’ko bininge kadi twi basangale pa byetulongela banabetu. Shi kebetukweshepo, ketwadipo ba kulonga kintu.”

 Banabetu ba mu San Juan de Ilumán, kakibundi ka mu Ekwatere kadi ku musanza wa Otavalo, nabo batenwe na bulwi bwa uno muswelo. Mu 2014 pa kupwa kupebwa lupusa, bashilwile kūbaka Njibo ya Bulopwe. Ino mumpe umo wasela kibumbo kya bantu 100 mwanda wa kukankaja banabetu baleke kūbaka. Bilo itala bijila ya ku musambo wa Ekwatere ne ya ku kité kya ntanda yonso, aingidile pamo mwanda wa kunenena banabetu pa kuno kutyumuna bwanapabo bwa kutōta.

 Batutu bakatūla uno mwanda ku kidye. Kino kyalengeje bantu ba mu kibundi baleke kulwa banabetu, kupwa bashilula monka kupwila ne kūbaka Njibo ya Bulopwe. Ino pa kusaka kukinga bwanapabo bwa banabetu mu mafuku a kumeso, mikendi yetu yanena kidye kikatampe kilondolole kino kipangujo kikatampe: Le bana ba kibundi bafwaninwe kulēmeka bijila bya ntanda yonso bitala kulēmeka bwanapabo bwa bantu?

 Mu mafuku 16 Kweji 7, 2020, balombola’mo Kidye kya Bijila kya mu Ekwatere, kidye kikatampe kya mu ino ntanda. Batutu baavoka ba mu Ekwatere bakemanina kipwilo. Ne kadi batutu baná badi bapotolwele bijila bya ntanda yonso bakanena ku kidye. Pa mwanda wa kipupo kya COVID-19, badi banenena ku matanda palapala kupityila ku bya busendwe. Uno wadi musunsa mubajinji kidye kwitabija kisumpi kitala myanda ya bijila kya Batumoni ba Yehova ba ntanda yonso kinene mu uno muswelo. c Kino kisumpi kyatelele bijila bya ntanda yonso mwanda wa kubingija’mba bana ba kibundi kebabwanyapo kuleka bwanapabo bwabo mwanda’po’tu babadilwa mu bana ba kibundi.

 Banabetu ba ku musanza wa Otavalo batengēle na kitūkijetyima butyibi bwa Kidye kya Bijila. Pano’ko bidi bafwijanga’ko pa bukwashi bobebakweshe. César, mukulumpe wa mu kipwilo kwa Quichua unena’mba: “I enka Yehova kete, kupityila ku bulongolodi bwandi, ubwanya kulonga bivule pa mwanda wa bantu batyetye.”

 Baavoka badi balonda uno mwanda bonso i Batumoni ba Yehova, kadi i basangale pa kukwasha na buyuki bwabo bwa bijila pampikwa kufutwa. Inoko kulombola mwadi mwikadile ino myanda ne kuteakanya ino myanda, ne kwiinena ku meso a kidye kwalombele kitatyi ne lupeto. Baavoka betu ne batutu bakwabo bapityije mansá 380 ne kupita pa kuteakanya bya kunena mu kisambo, ne mansá makwabo 240 a kwibyalamuna mu ndimi ya mu Meksike. Kintu kya baavoka 40 batambile mu matanda meshileshile baingile mansá tutwa na tutwa mu myanda ya mu Ekwatere. Le lupeto lwalupwilwe pa mwanda wa kunenena banabetu lwaalujibwe namani? I kupityila ku byabuntu byomutūla mu miswelo palapala ilombwelwe mu donate.mt1130.com. Mwafwai’ko pa mutyima wenu wa kupāna.