Difuku dilonda’ko, ke Dya Yenga, Nisane 9, Yesu wataluka ku Betani na bana bandi ba bwanga waenda ku Yelusalema. Abo pa kufwena ku Betefaji, pa Lūlu lwa Impafu, Yesu wasapwila bandi bana ba bwanga babidi amba:

“Endai mu kibundi kyomumwene’kya, ponkapo musa kutana mpunda mukute ne kyana kya mpunda pamo nandi. Mwibakutululei mundetele’bo. Shi muntu kaemunena, mufwaninwe kunena’mba, ‘I Mfumwetu wibasaka.’ Penepo nandi usa kwibatuma ponka na ponka.”​—Mateo 21:2, 3.

Bana ba bwanga abakomenwa kujingulula’mba bulombodi bwa Yesu i bupolofeto bwa mu Bible. Ino mwenda mafuku, abaivwanija kufikidila kwa bupolofeto bwa Zekadia. Wālaile amba Mulopwe mutongwe wa Leza ukāya mu Yelusalema “mwityepeje kadi ukandile pa mpunda, pa kyana kya mpunda, kyana kya mpunda mukaji.”​—Zekadia 9:9.

Bana ba bwanga pa kufika ku Betefaji, abasela kyana kya mpunda kilume ne inakyo, bantu bemene kubwipi abaipangula’mba: “Le i kika kine kyomukutulwila kyana kya mpunda?” (Mako 11:5) Abo pa kwivwana amba i Mfumwetu Yesu usaka banyema, abaleka bana ba bwanga bamuselele’bo. Bana ba bwanga abaala bivwalwa byabo bya pangala pa mpunda ne pa mwana wakyo, ino Yesu wakanda pa kyana kya mpunda.

Penda Yesu ku Yelusalema, kibumbo kyenda kivudila’ko. Bavule abaala bivwalwa byabo mu dishinda. Bakwabo nabo abaposola misambo ya mityi, nansha “bimuna bya mu ntanda” kebāla’byo pa nshi. Kebela mabila’mba: “Pandija’po, tubalombe! Mweselwe dyese i yewa wiya mu dijina dya Yehova! Bweselwe dyese Bulopwe bwiya, bwa tata wetu Davida!” (Mako 11:8-10) Bafadiseo badi mu kibumbo abalobe pa kwivwana bino byungwe. Abasapwila Yesu amba: “A Mufundiji, funina bobe bana ba bwanga.” Yesu walondolola’mba: “Nemulombola’mba, shi bano’ba bekale talala nyā, mabwe asa kwela lubila.”​—Luka 19:39, 40.

Yesu paamona Yelusalema, wadila kanena’mba: “Yō, abe, bine abe, shi wayukile dyalelo bintu bileta ndoe​—ino yō, pano i bifībwe mu meso obe.” Yelusalema usa kumona’kyo pa mwanda wa kubulwa kikōkeji kwandi. Yesu walaya’mba: “Balwana nobe pobakakushimikila nsakwa ya bikomo bya nsongo, bakakujokoloka ne kukutēkela kasāla ku mitamba yonso. Bakakubasa panshi abe ne bobe bana badi modi bene, kadi kebakashiyepo modi dibwe ditentamine pa dibwe dikwabo.” (Luka 19:42-44) Binenwa bya Yesu byāfikidile pāonakanibwe Yelusalema mu 70 Yesu ke mwiye.

Yesu pa kutwela mu Yelusalema, ‘kibundi kyonso kibajina, kebanena’mba: “Le uno nandi i ani?”’ Bibumbo kebinena’nka kunena’mba: “Uno i mupolofeto Yesu, wa ku Nazala wa Ngadilea!” (Mateo 21:10, 11) Boba badi mu kibumbo bamwene Yesu usangula Lazalasa ke basapwila bakwabo myanda ya kingelengele’kya. Bafadiseo abatompola mwanda bantu abebanyema. Kebanena’mba: “Talai! Ntanda yonso ibamulonda.”​—Yoano 12:18, 19.

Mungya kibidiji kyandi Yesu shi waiya mu Yelusalema, wikalanga wenda ku tempelo kufundija. Kwine’kwa waundapa’ko mpofu ne kilema. Babitobo bakulu ne basonekeji pa kumona byaalonga ne kwivwana bana bela mabila mu tempelo amba, “Pandija’po, tubalombe, Mwanā Davida!” abafītwa mutyima. Bendeji ba bipwilo abanena Yesu amba: “Le wivwene binena bano’ba?” Walondolola’mba: “Lelo kashā kemwatangile kino amba, ‘Mu kyakanwa kya bana batyetye ne bana ba lukeke, ubatambija’mo mitendelo’?”​—Mateo 21:15, 16.

Yesu watale koku ne koku bintu bidi mu tempelo. Byokyadi ke kyolwa, watambe ne batumibwa bandi. Kumeso kwa Nisane 10 kushilula, wajokela ku Betani, kwine kwaalāla bufuku bwa Dya Yenga.