▪ Mu kino kishinte, twefundile’mo amba kudi mwanda umo wa mvubu mpata utala bipangwa byonso bya ñeni: kupandulwa kwa dijina dikatampe dya Yehova. Mwanda wa bubikadi—ko kunena’mba, muswelo muyampe wa Yehova wa kuludika—ubadilwa mu uno mwanda mukatampe wa kupandulwa kwa dijina dya Yehova. Ne mwanda utala bululame bwa bantu nao ubadilwa enka mu uno mwanda mukatampe.

Mwanda waka pano tukomenejanga’mba mwanda mukatampe wimanine pa dijina dya Yehova ne kupandulwa kwadyo? Tubandaulei’ko bubinga busatu.

Bubinga bubajinji, Satana wātambile bulwi dijina dya Yehova, nansha bulēme bwandi mu budimi bwa Edena. Kipangujo kya kyongo kyobāipangwile Eva kudi Satana kyādi kimwekeja Yehova bu Leza wa mwino mwine utūdīle babikalwa bandi bijila bya kasuminiji. Kupwa Satana wānena patōkelela bintu bishile na byānenene Yehova na kumumwekeja bu mbepai. Nanshi wāvubakeninye dijina dya Yehova myanda. Wāikala “Dyabola,” dijina dishintulula’mba “vubavuba.” (Yoa. 8:44) Eva byawāitabije bubela bwa Satana, wālekele kukōkela Leza, wātombokela bubikadi bwandi. (Ngo. 3:1-6) Enka ne didi kūlu dino, Satana uvubakenyanga dijina dya Leza myanda, na kuzambalaja bubela pa bumuntu bwa Yehova. Boba betabija buno bubela kebakōkelangapo Yehova. O mwanda ku bantu ba Leza, kusambakanya bubela pa dijina dijila dya Yehova i bukondame bukatampe. Bo bubinga bukatampe bwikadile’ko makambakano onso ne bintu bibi bilongeka mu ino ntanda.

Bubinga bwa bubidi, pa mwanda wa kamweno ka bipangwa byonso, Yehova i musumininwe kubingija dijina dyandi ne kwidipandula. Uno i mwanda wa mvubu mpata kudi Yehova. O mwanda unena’mba: “Na bubine nkapandula dijina dyami dikatampe.” (Ezk. 36:23) Kadi Yesu wālombwele patōka bintu bya mvubu mpata bifwaninwe kutela bengidi bonso ba Yehova ba kikōkeji mu milombelo, paānenene amba: “Dijina dyobe dipandulwe.” (Mat. 6:9) Kadi Bible ulombolanga misunsa ne misunsa kamweno kadi mu kutumbija dijina dya Yehova. Tutalei’ko’tu bino bimfwa bityetye: “Pai Yehova ntumbo ifwaninwe dijina dyandi.” (1 Bi. 16:29; Ñim. 96:8) “Imbilai dijina dyandi dya ntumbo mitendelo.” (Ñim. 66:2) “Nkatumbijanga dijina dyobe nyeke.” (Ñim. 86:12) Musunsa umo mu misunsa yēsambile Yehova tamba momwa mūlu, i uno wālongekele mu tempelo mu Yelusalema mwine mwānenene Yesu amba: “Tata, tumbija dijina dyobe.” Yehova nandi wālondolola’mba: “Neditumbija kadi nkeditumbijanga dikwabo.”—Yoa. 12:28. a

Bubinga bwa busatu, mpango ya Yehova ikwatañene nyeke na dijina dyandi, nansha bulēme bwandi. Kimfwa: Le pa kupwa kwa ditompo dya mfulo dikekala’ko ku mfulo kwa Umbikalo wa Myaka Kanunu wa Kidishitu, i bika bikalonda’ko? Le bipangwa bya ñeni bikendelela kwiabanya pangala  pa mwanda mukatampe wa kupandulwa kwa dijina dya Yehova? Pa kwitukwasha tulondolole kino kipangujo, tuvulukei’ko myanda ibidi ibadilwa mu uno mwanda mukatampe: bululame bwa bantu ne bubikadi bwa diulu ne ntanda. Le bantu ba kikōkeji bakendelela kwikonda na kikoleja kya kulama bululame bwabo? Aa. Bakekala babwaninine kadi batompibwe ne pa mfulo. Bakapebwa būmi bwa nyeke ne nyeke. Lelo mwanda wa bubikadi bwa diulu ne ntanda ukendelela kwisambilwapo enka ne kuleta nkalañani mu bukata bwa bipangwa bya ñeni? Aa. Bipangwa byonso mūlu ne pano pa ntanda bikekala mu bumo kadi biketabija buludiki bwa Yehova. Le tunene namani pa mwanda utala dijina dya Leza?

Mu kine kitatyi’kya, muntu yense ukayuka bubine bwa padi Yehova kadi dijina dyandi dikapandulwa lonso. Inoko, dijina dya Yehova dikendelela kwikala dya mvubu mpata ku bengidi bandi bonso ba kikōkeji ba mūlu ne pano pa ntanda. Mwanda waka? Mwanda bakendelela kumona bintu bya kutendelwa bilonga Yehova. Tala uno mwanda: Yesu byakalwija Yehova na kwityepeja lupusa lonso lwa kuludika, Leza ukekala “bintu byonso ku muntu ense.” (1 Ko. 15:28) Ebiya bantu pano pa ntanda bakekala na “bwanapabo bwa ntumbo budi na bana ba Leza.” (Loma 8:21) Kadi Yehova ukafikidija ne pa mfulo mpango yandi ya nyeke ya kulungila pamo bipangwa byonso bya ñeni bya momwa mūlu ne pano pa ntanda, bu kisaka kimo kikatampe kadi kidi mu bumo.—Ef. 1:10.

Le bino bintu byonso pa kupwa kulongeka, kisaka kya Yehova momwa mūlu ne pano pa ntanda kikeivwana namani? I byendele’mo kulanga’mba tukendelela kusaka kutumbija nyeke dijina dilumbuluke dya Yehova. Davida kaimba wa mitōto wālembele ku bukomo bwa mushipiditu amba: “Yehova Leza atendelwe . . . Dijina dyandi dya ntumbo ditendelwe nyeke.” (Ñim. 72:18, 19) Tukendelela kusokwela’ko bubinga bukwabo kadi busangaja, bwa kutumbijija dijina dya Leza nyeke ne nyeke.

Dijina dya Leza, dyelekeja bulēme bwandi bonso. Ino nakampata dituvulujanga buswe bwandi. (1 Yo. 4:8) Tukavuluka nyeke amba buswe bo bwālengeje Yehova etupange, bo bwāmulengeje apāne kitapwa kya kinkūlwa, kadi bo bwāmulengeje alombole boloke mu muswelo wandi wa kuludika. Inoko tukendelela kumona Yehova ulombola buswe ku bipangwa byandi nyeke ne nyeke. Tukasaka kupwana na Tata wetu ne kwimbila dijina dyandi dya ntumbo mitendelo nyeke ne nyeke.—Ñim. 73:28.