1, 2. (a) Le binenwa bya Yesu bidi mu Mateo 24:12 bitala dibajinji bāni? (b) Le mukanda wa Bilongwa ulombola namani amba bene Kidishitu babajinji bavule bālamine buswe bwabo? (Tala kifwatulo ku ngalwilo.)

YESU paādi pano panshi, wālombwele muswelo ukajingulula bantu “mvuyo ya ngikadilo ya bintu.” Kutentekela pa bino, wālaile kadi amba: “Buswe bwa bangi bene bukatalala.” (Mateo 24:3, 12) Bayuda ba mu myaka katwa kabajinji bādi betela bu bantu ba Leza, nansha nankyo bālekele buswe bwabo mudi Leza butalale.

² Inoko, bene Kidishitu bavule mu kine kitatyi’kya bādi na mumweno mwishile. Bādi basapula na bupyasakane “myanda miyampe ya Kidishitu” ne kulombola buswe bobādi baswele Leza, banababo mu lwitabijo, enka ne boba bādi kebayukile bubine bene. Bano bene Kidishitu bālamine buswe bobādi baswele Leza. (Bilongwa 2:44-47; 5:42) Ino i kya bulanda, mwanda bene Kidishitu bamo babajinji bālekele buswe bwabo butalale. Le tubayuka kino namani?

3. Le i bika padi byālengeje buswe bwa bene Kidishitu bamo butalale?

 ³ Yesu wāsapwidile bene Kidishitu babajinji ba mu Efisesa amba: “Ubaleka buswe bowadi nabo dibajinji.” (Kusokwelwa 2:4) Bimweka’mba bene Kidishitu ba mu Efisesa bātādilwe na mumweno wa bantu bādi bebajokolokele wa kusaka kwisangaja abo bene. (Efisesa 2:2, 3) Efisesa kyādi kibundi kya bupeta, mwādi bantu batele mutyima ku kwikala na būmi buyampe ne na bintu bya katutu kupita kintu kyo-kyonso. Bavule mu Efisesa bādi ba busekese kadi bampikwa kulēmeka bijila bya Leza. Bādi batele mutyima bininge ku kwisangaja abo bene pa kyaba kya kulombola buswe bwampikwa kwisakila kudi Leza ne ku bantu bakwabo.

4. (a) Le buswe bwendanga butalala namani mu ano etu mafuku? (b) I mu myanda’ka isatu motufwaninwe kulama buswe bwetu?

⁴ Kadi binenwa bya Yesu bitala kutalala kwa buswe bidi na kamweno ne mu ano etu mafuku. Dyalelo bantu bendanga bajimija buswe bwabo mudi Leza. Pa kyaba kya kukulupila Leza apwije makambano adi mu ino ntanda, inoko bantu bavule bakulupilanga’ko malongolodi a bantu. Buswe bwabo bwendanga butalala. Enka ne buswe bwa bengidi ba Yehova bukokeja kutalala, na mwataledile bwa ba mu kipwilo kya mu Efisesa wa kala. Nanshi twisambilei’ko pa myanda isatu yotubwanya kulama’mo buswe bwetu: (1) buswe botuswele Yehova, (2) buswe botuswele bubine bwa mu Bible, ne (3) buswe botuswele banabetu.

5. Mwanda waka tufwaninwe kusanswa Leza?

⁵ Le i ani otufwaninwe kusanswa bininge? Yesu amba: “‘Sanswa Yehova Leza obe na mutyima obe onso ne na muya obe onso ne na ñeni yobe yonso.’ Ino’i yo mbila itabukile bukatampe kadi yo imbajinji.” (Mateo 22:37, 38) Buswe botuswele Leza bwitukwashanga tukōkele mbila yandi, tūminine, ne kushikwa bibi. (Tanga Ñimbo ya Mitōto 97:10.) Inoko Satana ne ntanda yandi bakimbanga tutalaje ne kujimija buswe botuswele Leza.

6. I bika bilongekanga shi bantu abajimija buswe bwabo mudi Leza?

⁶ Ino ntanda idi na mumweno munyengakane pa buswe. Pa kyaba kya kusanswa Leza, ino bantu bavule ‘besenswe abo bene.’ (2 Temote 3:2) Batele mutyima ku “bya kusakasaka bya ngitu ne bya kusakasaka bya meso ne kwimwekeja na mitatulo” pa byobya byobadi nabyo mu būmi. (1 Yoano 2:16) Mutumibwa Polo wālombwele byobya bibwanya kwitufikila shi twisangaja dibajinji batwe bene. Aye amba: “Kuta mutyima ku ngitu i lufu.” Mwanda waka? Mwanda na bubine boba balonga uno muswelo bekalanga ke balwana na Leza. (Loma 8:6, 7) Bantu batele mutyima ku kwivudijija lupeto mu bwabo būmi nansha ku kusangaja bilokoloko byabo bya busekese, bafulanga ku kutyumukwa mutyima mpata.—1 Kodinda 6:18; 1 Temote 6:9, 10.

7. Le i milangwe’ka ileta kyaka ibwanya kutādila bene Kidishitu dyalelo?

⁷ Bantu bavule batuna kwikala’ko kwa Leza, balakana shi Leza udi’ko, ne boba bakulupile mu kwialamuna, bakimbanga kunekenya bantu baleke kusanswa Leza nansha kukulupila’mba udi’ko. Banenanga amba poso i enka kilubi nansha muntu wampikwa kufunda ye ubwanya kukulupila mudi Mupangi. Kadi bantu bavule balēmekele bininge bantu ba sianse kupita’ko Mupangi. (Loma 1:25) Nansha ke mwine Kidishitu ukokeja kutādilwa na ino milangwe. Kipwano kyetu na Yehova kibwanya kuzoza, ne buswe botumuswele nabo bwatalala.—Bahebelu 3:12.

8. (a) I bintu’ka bibwanya kutyumuna bantu ba Yehova mutyima? (b) Le i muswelo’ka witukankamika Ñimbo ya Mitōto 136?

⁸ Byotukidi mu ino ngikadilo mibi ya  Satana, o mwanda kudi bintu bivule bibwanya kwitutyumuna mutyima kyaba kimo. (1 Yoano 5:19) Ino shi tutyumukwe mutyima, nabya lwitabijo lwetu lukazoza ne buswe botuswele Leza nabo bukatalala. Kimfwa, tubwanya kutanwa na makambakano pa mwanda wa bununu, misongo nansha kubulwa lupeto. Nansha padi tubwanya kujingwa mutyima mwanda ketubwenyepo kulonga bintu motwadi twibisakila. Tubwanya kutyumukwa mutyima shi bintu bimo mu būmi kebyendekelepo na motwadi tukulupidile. Nansha shi tulwa na makambakano’ka, ketufwaninwepo kulanga nansha dimo amba Yehova wetwela. Langulukila pa bino binenwa bikankamika bidi mu Ñimbo ya Mitōto 136:23 bya amba: “Wetuvulukile umbulanda bwetu; ke-luntu lusa lwandi i lwa nyeke.” Nanshi tubwanya kukulupila’mba Yehova witwivwananga potumulomba ‘bukwashi’ kadi witulondololanga.—Ñimbo ya Mitōto 116:1; 136:24-26.

9. Le i bika byākweshe Polo alame buswe bwaādi uswele Leza?

⁹ Mutumibwa Polo i mwingidi wa Leza wālangulukile na mushike pa muswelo wāmukwatakenye Yehova, ne kino kyāmukweshe ashale mwimanije pototo. Wālembele amba: “Yehova i mukwashi wami; nkikakwatwapo moyo. Le muntu ukokeja kunonga kika?” (Bahebelu 13:6) Kikulupiji kya Polo mudi Yehova kyāmukweshe ōminine bikoleja bya mu būmi. Polo paādi mu ngikadilo mikomo, kājimijepo kikulupiji kyandi mudi Yehova. Nansha ke paādi mu kifungo, wākweshe banababo bene Kidishitu na kutumina bipwilo mikanda ikankamika. (Efisesa 4:1; Fidipai 1:7; Filemone 1) Nansha Polo byaātenwe na makambakano, aye wālamine buswe bwaādi uswele Yehova. Wādi ukulupile mudi “Leza wa kusenga konso, wituseñanga mu byamalwa byetu byonso.” (2 Kodinda 1:3, 4) Le i muswelo’ka otubwanya kwiula Polo?

10. Le i muswelo’ka otubwanya kulama buswe botuswele Yehova?

¹⁰ Polo wālombwele muswelo umo otubwanya kulama buswe botuswele Leza paālembele amba: “Lombelai kitatyi kyonso.” Kadi wālembele monka amba: “Takamanai mu milombelo.” (1 Tesalonika 5:17; Loma 12:12) Mwanda waka milombelo itufwenyanga kudi Yehova? Potulombela, twisambanga na Yehova. Kino kitukwashanga twikale mu kipwano kiyampe nandi. (Ñimbo ya Mitōto 86:3) Potulombola Tata wetu wa mūlu milangwe yetu ya mu mutyima ne mwiivwanino wetu, tumufwenanga pabwipi. (Ñimbo ya Mitōto 65:2) Kadi potumona mulondolwela Yehova milombelo yetu, buswe botumuswele nabo buvudilanga’ko. Tukulupile amba “Yehova udi pa bwipi na boba bonso bamwitanga.” (Ñimbo ya Mitōto 145:18) Kikulupiji kyetu mu buswe ne mu bukwashi bwa Yehova kiketukwasha tūminine makambakano o-onso otutanwa nao dyalelo ne mu mafuku āya kumeso.

11, 12. Le i muswelo’ka otubwanya kuvudija buswe botuswele bubine bwa mu Bible?

¹¹ Byotudi bene Kidishitu, o mwanda tusenswe bubine. Mu Kinenwa kya Leza mo mutanwa bubine. Yesu wāsapwidile Shandi amba: “Kinenwa kyobe i bubine.” (Yoano 17:17) Pa kusanswa bubine bwa mu Bible, tufwaninwe bidi kuyuka bine bidi mu Bible. (Kolose 1:10) Inoko ke enkapo kyakyo. Tala mwitukwashisha mulembi wa Ñimbo ya Mitōto 119 twivwanije byobya byotufwaninwe kulonga. (Tanga Ñimbo ya Mitōto 119:97-100.) Mafuku onso, tufwaninwe kulangulukila na katentekeji ne na mushike pa byobya byotutanga mu Bible. Shi tulangulukila pa muswelo otubwanya kumwena mu kwingidija bubine bwa mu Bible mu bwetu būmi, nabya tukebusanswa bya binebine.

 ¹² Kadi mulembi wa Ñimbo ya Mitōto wānenene amba: “Ē! mo bitobelapo binenwa byobe mu kyakanwa mwami!” (Ñimbo ya Mitōto 119:103) Mabuku emanine pa Bible alupulwa na bulongolodi bwa Leza adi pamo bwa bidibwa bitobala. Twikalanga tukimba kudya bidibwa byotusenswe kitatyi ne kitatyi. Mu muswelo umo onka, tufwaninwe kwitūdila’ko kitatyi kya kwifunda. Nabya tukasangela binebine “binenwa bifwaninwe” bya bubine, ne kino kiketukwasha tuvuluke byobya byotutanga ne kwibingidija pa kukwasha bakwabo.—Musapudi 12:10.

13. I bika byākweshe Yelemia asanswe binenwa bya Leza? Ne bino byāikele namani na lupusa padi?

¹³ Mupolofeto Yelemia wādi usenswe binenwa bya Leza. Wānenene amba: “Binenwa byobe byatenwe, nami nadya’byo; kabidi binenwa byobe byadi tusepo ko nadi, ne kusepelela kwa wami mutyima; mwanda nainikilwe pa dyobe dijina, a Yehova Leza wa bibumbo.” (Yelemia 15:16) Yelemia wādi ulangulukila na mushike pa binenwa bya Leza bilēme, kadi wādi wibisenswe. Wāsangedile kwimanina Yehova ne kusapula musapu wandi. Shi tusenswe bubine bwa mu Kinenwa kya Leza, nabya tukajingulula dyese dya pa bula dyotudi nadyo dya kwikala Batumoni ba Yehova ne dya kusapula myanda ya Bulopwe mu ano mafuku a mfulo.

14. I bika bikwabo biketukwasha tutamije buswe botuswele bubine bwa mu Bible?

¹⁴ I bika bikwabo biketukwasha tutamije buswe botuswele bubine bwa mu Bible? Tufwaninwe kutanwa kitatyi ne kitatyi ku kupwila, kwine kotufundijibwanga na Yehova. Kwifunda Bible yenga ne yenga kupityila ku Kifundwa kya Kiteba kya Mulami kubadilwa mu miswelo mikatampe yotufundijibwanga’mo. Shi tusaka kumwena bininge mu kuno kupwila, nabya tufwaninwe kwiteakanya kumeso kwa kitatyi. Kimfwa, tubwanya kubandaula bisonekwa byonso bya mu Bible bitelelwe’mo. Dyalelo, bavule i bapelelwe kutanga nansha kutentula Kiteba kya Mulami mu bingidilwa bya busendwe mwanda kidi mu ndimi mivule pa diteba dya jw.org ne mu JW Library. Bingidilwa bimo bidi na bupunga bwitukwasha tutane bukidibukidi bisonekwa bitelelwe’mo. Shi twifunda kishinte ne kishinte, tutanga bisonekwa na katentekeji ne kulangulukila’po  na mushike, nabya buswe botuswele bubine bwa mu Bible bukavudila’ko.—Tanga Ñimbo ya Mitōto 1:2.

15, 16. (a) Mungya Yoano 13:34, 35, le i mbila’ka itupele Yesu? (b) I muswelo’ka ukwatañene buswe botuswele Leza ne Bible na buswe botuswele banabetu?

¹⁵ Mu bufuku bwandi bwa mfulo pano pa ntanda, Yesu wālombwele bandi bana ba bwanga amba: “Nemupe mbila impya, amba mwisanswe banwe bene na bene; monka monemusanshilwe, amba nenu mwisanswe banwe bene na bene. Pa kino e pakayukila bonso amba mwi bami bana ba bwanga, shi mudi na buswe umbukata mwenu.”—Yoano 13:34, 35.

¹⁶ Kusanswa batutu ne bakaka kukwatañene na buswe botuswele Yehova. Shi ketusenswepo Leza, nabya ne banabetu nabo ketukebasanswapo. Kadi shi ketusenswepo banabetu, i bikomo kusanswa Leza. Mutumibwa Yoano wālembele amba: “Yewa kasenswepo mwanabo, mwine wamwene, kakokejapo kusanswa Leza, mwine wakamwenepo.” (1 Yoano 4:20) Buswe botuswele Yehova ne banabetu bukwatañene kadi ne na buswe botuswele Bible. Mwanda waka? Mwanda shi tusenswe byobya byotwifunda mu Bible, nabya tukasaka kukōkela mbila idi’mo ya kusanswa Leza ne banabetu.—1 Petelo 1:22; 1 Yoano 4:21.

17. I mu miswelo’ka imoimo motubwanya kulombola buswe?

¹⁷ Tanga 1 Tesalonika 4:9, 10. I mu miswelo’ka mipotoloke motubwanya kulombola buswe ku banabetu mu kipwilo? Tutu nansha kaka mununu ubwanya kusakilwa bukwashi pa kwenda ku kupwila ne pa kujoka. Wa kishala nandi ubwanya kusakilwa bukwashi bwa kumulongolwela bintu bimo ku njibo yandi. (Yakoba 1:27) Batutu ne bakaka batyumukwe mityima, badi na njia, nansha boba balwa na makambakano makwabo basakilwa kutebwa mutyima, kwibakankamika ne kwibasenga. (Nkindi 12:25; Kolose 4:11) Tulombolanga’mba tusenswe “boba botubutulwa nabo mu lwitabijo” kupityila ku byotunena ne ku byotwibalongela.—Ngalatea 6:10

18. I bika biketukwasha tupwije kwisusa na banabetu?

¹⁸ Bible wānenene amba “mu mafuku a mfulo” a ino ngikadilo mibi, bantu bavule bakekala ba kwisakila ne ba makomwa-meso. (2 Temote 3:1, 2) Byotudi bene Kidishitu, nanshi tufwaninwe kulonga bukomo bwa kutamija nyeke buswe botuswele Yehova, Kinenwa kyandi, ne buswe botwisenswe batwe bene na bene. Byotukidi bampikwa kubwaninina, kyaba kimo tubwanya ne kwisusa na banabetu. Ino byotwisenswe batwe bene na bene, tukalonga bukomo bwa kupwija kwisusa ko-konso na kanye kadi pampikwa kwija. (Efisesa 4:32; Kolose 3:14) Ketwakilekai nansha dimo buswe bwetu butalale! Ino, twendelelei na kutamija buswe botuswele Yehova, Kinenwa kyandi, ne buswe botuswele banabetu.