“Shi mulombe Tata kintu kyo-kyonso, ukemupa’kyo mu dijina dyami.”​—Yoano 16:23.

Binenwa bya Yesu bilombola patōka’mba Yehova usakanga tulombe kwadi, ke kupityilapo ku byelekejo, ku basanto, bamwikeulu, nansha ku bankambo bafwile, ino i mu dijina dya Yesu Kidishitu. Shi tulombela Leza mu dijina dya Yesu, tulombolanga’mba tuyukile mwingilo wa mvubu wāingile Yesu. Yesu wānenene amba: “I kutupu wiya kudi Tata poso upityila padi ami.”​—Yoano 14:6.

“Pungulwilai mityima yenu ku meso andi.”​—Ñimbo ya Mitōto 62:8.

Kitatyi kyotulombela kudi Yehova, tufwaninwe kwisamba na motwisambilanga na tata wa buswe. Pa kyaba kya kutanga milombelo mu dibuku nansha kupituluka bintu bikwatyile pa mutwe, tufwaninwe kwisamba nandi na bulēme kadi bitamba ku mutyima.

“Shi tumulombe kintu kyonso, shi kika shi kika, mwendele kiswa-mutyima kyandi, witwivwananga.”​—1 Yoano 5:14.

Yehova Leza i mwitulombole mu Bible byaketulongela ne byobya byasaka tumulongele. Pa kusaka Leza etabije milombelo yetu, tufwaninwe kulomba “mwendele kiswa-mutyima kyandi.” Pa kulonga namino, tufwaninwe kwifunda Bible amba tuyuke Leza biyampe. Shi tulonge namino, milombelo yetu ikamusangaja.

Lomba bisakibwa byobe. Tubwanya kulomba Leza bisakibwa byetu bya difuku ne difuku—bya kudya, bivwalwa, ne mwa kwikala. Kadi tubwanya kulomba tunangu mwa kukwatyila butyibi buyampe, ne kulomba bukomo bwa kūminina matompo. Tubwanya kulomba twikale na lwitabijo, betulekele ne kwitukwasha kudi Leza.​—Luka 11:3, 4, 13; Yakoba 1:5, 17.

Lombelela’ko Bakwenu. Bambutwile ba buswe basangalanga shi babo bana besenswe abo bene na bene. Yehova nandi usakanga bandi bana ba pano panshi bete mutyima abo bene na bene. I biyampe kulombelela’ko mwinē petu, betu bana, kyetu kisaka, ne balunda netu. Mwanā bwanga Yakoba wālembele amba, ‘mwilombelelei banwe bene na bene.’​—Yakoba 5:16.

Lombola kufwija’ko. Bible unena pangala pa Umpangi wetu amba: “[Wālongele biyampe] na kwimupa mvula wa mūlu ne bitatyi bya kupa bipa, wimwikutyija byakudya ne kuyuja nsangaji mu mityima yenu.” (Bilongwa 14:17) Shi tulangulukila pa bintu byonso bitulongēle Leza, tukekala na mutyima wa kumufwija’ko mu milombelo. Na bubine, tufwaninwe ne kulombola kufwija’ko Leza kupityila ku mwiendelejo wetu.​—Bene Kolose 3:15.

Kyaba kimo tubwanya kwivwana bulanda pa mwanda wa milombelo yetu yampikwa budimbidimbi keilondolwelwepo bukidibukidi. Le tufwaninwe kufula ku kunena’mba, Leza ketutelepo mutyima? Nansha dimo! Langulukila pa bimfwa bilonda’ko bilombola’mba tusakilwa’tu padi kwendelela na kulombela.

Steve, utelelwe mu kishinte kibajinji unena’mba, “Shi nalekele’byo kulombela, longa najimije kala kikulupiji kya kwikala na nsangaji.” Le i bika byamukweshe? Washilwile kwifunda Bible, wayuka kamweno kadi mu kulombela ne kuleka’byo mpika. Steve unena’mba, “Nalombele Leza mwanda wa kumufwija’ko pa kukwatakanibwa na buswe na balunda nami baswe. Pano ngidi na nsangaji kupita mafuku kunyuma.”

Le Jenny, wadi wimona bu kafwaninwepo kwivwanwa na Leza nandi le? Unena’mba, “Ponadi nemona bu wa bitupu, nazenzele Leza ankwashe ngivwanije kyonadi nemwena bu wa bitupu.” Le kino kyamukweshe namani? “Kwisamba na Leza kwaunkweshe nemone biyampe, mone amba nansha shi mutyima wami untopeka, aye kantopekangapo. Kadi kwaunkweshe ñendelele kulonga bukomo.” Byaikala namani? Unena’mba, “milombelo yaunkweshe mone amba Yehova udi’ko bine, Leza wa buswe ne kanye, Tata, kadi Mulunda, mwine ukankwatakanya nyeke ne kunkwasha ponso pononga bukomo bwa kulonga byasaka.”

Langulukila ne pa kimfwa kya Isabel. Pawaimite dīmi, badokitele bamusapwila’mba wandi mwana ukabutulwa na bulema bukatampe. Ñeni yamuvutakana bininge. Bantu bamo bamunena apulumune’dyo. “Neivwene’nka na ami usa kufwa na moyo mu mutyima wami.” Le walongele’po namani? Unena’mba, “nalombele’nka kulomba Leza ankwashe.” Mwenda mafuku, wabutula mwana mwana-mulume, Gerard, kadi mulemane. Le Isabel wamwene amba Leza walondolola milombelo yandi? En-en! Mu buluji’ka? Isabel unena’mba, “pontalanga wami mwana udi pano na myaka 14, usangela būmi nansha byadi mulemane, njingululanga’mba i malondololo mayampe ku milombelo yami, dyese dikatampe dingesele Yehova Leza.”

Bino binenwa byampikwa budimbidimbi bituvuluja binenwa bya mulembi wa mitōto bya amba: “Abe ukevwana kulomba kwa betyepeje, a Yehova. Ukakomeja mityima yabo ne kwibata mutyima bininge.” (Ñimbo ya Mitōto 10:17) Bine, buno i bubinga buyampe bwa kutakamena mu milombelo!

Mu Bible mudi milombelo mivule ya Yesu. Yoya iyukene biyampe i yoya yaāfundije bandi bana ba bwanga. Le i ñeni’ka yotubwanya kuboila’ko?