• Kutongwa na Leza. “Nabikika mulopwe wami . . . nkakupa mizo ke bupyani bobe ne ntanda yonso nayo ke kintu kyobe.”​—Ñimbo ya Mitōto 2:6, 8.

• Kwikala Mpyana wa Mulopwe Davida. “Mwana i mwitubutwilwe, Mwana mwana-mulume i mwitupebwe . . . Bukata bwa buledi bwandi ne ndoe, kebikekalapo na mfulo, pa lupona lwa Davida ne pa bulopwe bwandi mwanda wa kwibukomeja pototo.”​—Isaya 9:6, 7.

• Kubutwilwa mu Betelema. “A Betelema . . . , mudi abe mukatamba yewa wa kungikadila bu mulopwe . . . Bukatampe bwandi bukafika ne ku mafulo.”​—Mika 5:2, 4.

• Kupelwa na bantu ne kwipaibwa. “Wadi mufutululwe, kadi netu twamumwene bu wa bitupu. . . . Wasabakanibwe pa mwanda wa kujilula kwetu; wasonsakanibwe pa mwanda wa bilubo byetu.”​—Isaya 53:3, 5.

• Kusangulwa mu bafwe ne kutumbijibwa. “Kukanshiyepo mu Kibundu. Kukalekapo muntu obe wa lulamato amone kīna. . . . Kudi nyeke katōkwe ku kuboko kobe kwa lundyo.”​—Ñimbo ya Mitōto 16:10, 11.

Mu mānga yonso ya muzo wa muntu, i enka muntu umo kete ubwenye bisakibwa bya kwikala Muludiki muyampe; kadi uno muntu i Yesu Kidishitu. Bine, mwikeulu umo wālombwele Madia, inandya Yesu amba: “Leza ukamupa lupona lwa shandi Davida, . . . ne Bulopwe bwandi kebukekalapo na mfulo.”​—Luka 1:31-33.

Yesu kāikelepo mulopwe pano pa ntanda. Inoko ukaludika bantu aye momwa mūlu bu Mulopwe wa Bulopwe bwa Leza. Le i bika bimulengeje ekale Mulopwe muyampe? Tala bintu byālongele Yesu paādi pano pa ntanda.

•   Yesu wādi utele bantu mutyima. Yesu wākweshe bana-balume ne bana-bakaji, bakansampe ne batame, kwampikwa kubanga mobekadile. (Mateo 9:36; Mako 10:16) Pāmuzenzele wa makopo amba: “Shi usakile, nankyo ntōkeje,” Yesu wāmukwatyilwe lusa, wāmundapa.​—Mako 1:40-42.

• Yesu wētufundije mwa kusangeja Leza. Wānenene amba: “Kemukokejapo kwingila bu bapika ba Leza koku kadi bapika ba Bupeta.” Kadi wānenene amba, tufwaninwe kulongela bakwetu bintu motusakila nabo betulongele’byo​—musoñanya wāityilwe bu Kijila Kitabukile Bulēme. Kadi wālombwele amba Leza katelepo mutyima’nka ku byotulonga, ino utele’o ne ku mulangilo ne mwiivwanino wetu. Nanshi pa kusangaja Leza, tufwaninwe kuta mutyima ku mwine motwiivwanina mu mutyima. (Mateo 5:28; 6:24; 7:12) Yesu wānenene amba pa kwikala na nsangaji ya bine, tufwaninwe kuyuka byobya bitusakila Leza kulonga ne kwibilonga.​—Luka 11:28.

• Yesu wāfundije mushintulwila kusanswa. Binenwa ne bilongwa bya Yesu byādi na bukomo kadi byātengele mityima ya bantu bādi bamwivwana. “Bibumbo kebitendela mufundijijo wandi, mwanda wadi wibafundija pamo bwa muntu udi na lupusa.” (Mateo 7:28, 29) Wēbafundije amba: “Sanswai . . . balwana nenu.” Wālombelele’nka ne bantu bamo bāmwipaile amba: “Tata, wibalekele, mwanda kebayukilepo byobalonga.”​—Mateo 5:44; Luka 23:34.

Yesu i mubwanye bisakibwa bya kwikala Mulopwe muyampe wa ntanda wa kukwasha bantu ne kwibevwanina lusa. Ino le washilwile kuludika kitatyi’ka?