Natamine mu Puerto Limón, kibundi kidi mu kyabu kutunduka kwa Kosita Rika ne mu bibundi bikwabo bya kubwipi. Mwetu munda tudi mwānda, bana-balume basatu, bana-bakaji nabo batano, amiwa ye wa busamba-bubidi. Tata wafwile ponadi na myaka mwānda. Penepa, mama kaetulela bunka bwandi.

Mu būmi bwami nadi nsenswe futu ya nteneshi. Naanjile makayo nakidi’tu mwanuke. Pa bunkasampe nakatwelele mu ekipe ya bakayi bakaya bitupu, ketwitambe na maekipe makwabo. Ponadi ntela mu ino ekipe ami papo na myaka 20 ne musubu, mukulu wa ekipe waunena nkatele mu ekipe ya bakayi ba bwino mu Nikaragua. Inoko, mama byaadi ubelabela mu kino kitatyi, kadi ami ye wadi umutala, nkyasakilepo kwenda mu Nikaragua. O mwanda napelele. Mwenda mafuku, mukulu wa ekipe mukwabo waungita nkatele mu ekipe mikatampe ya futu ya nteneshi ya ntanda ya Kosita Rika, mibundwe na bakayi bakaya bitupu. Pano, naitabije. Natedile mu ekipe mikatampe ya ntanda kushilwila mu 1949 kutūla 1952, kadi nakaile makayo mavule mu Cuba, mu Meksike, ne mu Nikaragua. Mu bakayi bayampe nadi wa bubidi nansha wa busatu, kenkaye ne mu makayo a miswelo 17 pa kubulwa kilubo. Nadi nsangala pansasula kibumbo!

Ino i kya bulanda, nadi kendi kisekese. Nansha byonadi na mukaji wa ntekele nkuvwike, ino kadi nadi ne na bishinka bikwabo. Nadi kendi nkolwankolwa wa mu meso fututu. Difuku dimo nakolelwe bininge, abo bukya lubanga keneipangula monafikile kwinjibo! Kadi nadi nkaya makayo a kwidya lupeto ne a tombola.

Ponadi mu ino ngikadilo, mama waikala ke Kamoni wa Yehova. Wadi utompa kunomboja myanda itala nkulupilo yandi, inoko kebyakokejikilepo dibajinji, mwanda nadi mumunwe bininge na makayo. Ponadi neibidija, nansha shi ke nsá ya kudya, nkyadipo ngivwana nzala! Mutyima wami onso wadi’nka ku makayo. Nadi nsenswe futu ya nteneshi kupita kintu kyonso!

 Inoko, ponabwenye myaka 29, netapile bibi ponadi nkimba kukobola nteneshi mu makayo. Ami pa kwivwana biyampe, natamba mu ekipe ya bakayi ba bwino. Nansha nankyo, nadi nekiteakanya makayo a futu ya nteneshi na kufundija bakayi bakaya bitupu kubwipi na kwami.

Mu 1957, natambwile lwito lwa kukatanwa ku kitongo kya Batumoni ba Yehova kyalongelwe mu kiwanza monatedile futu ya nteneshi. Ponadi mu kibumbo najingulwile ami mwine amba mwiendelejo wa bulēme onamwene mu Batumoni i mwishile kulampe na mwiendelejo wa kavutakanya onadi mona mu kibumbo kya bantu badi babandila futu ya nteneshi. Byonamwene ku kino kitango byauntonwene nshilule kwifunda Bible na Batumoni ne kutanwa ku kupwila kwabo.

Nadi nsangela bufundiji buvule bwa mu Bible bonadi nefunda. Kimfwa, Yesu wālaile amba mu mafuku a mfulo, bandi bana babwanga bakasambakanya myanda miyampe ya Bulopwe bwa Leza pano pa ntanda ponso. (Mateo 24:14) Nefundile kadi amba bene Kidishitu ba bine kebafutwangapo pa mwingilo wabo. Yesu wānenene amba: “Mubatambula ku bitupu, nenu pānai ku bitupu.”​—Mateo 10:8.

Ponadi nefunda Bible, nadi ndingakanya byanena na bilongeka mu Batumoni ba Yehova. Nadi nebatendela pa bukomo bobalonga pampikwa kukōka mwanda wa kusambakanya myanda miyampe ya Bulopwe bwa Leza pano pa ntanda ponso. Namwene amba badi na mushipiditu wa kupāna mwine wāsoñenye Yesu ku bene Kidishitu. Ponatangile Mako 10:21 naivwene lwito lwa Yesu lwa amba, “Iya wikale mulondi wami,” nasakile kwikala Kamoni.

Inoko, byaunombele kitatyi pa kukwata butyibi busumininwe. Kimfwa myaka mivule, nadi nkaya makayo a nimelo ya “dyese” yenga ne yenga mu tombola mikatampe ya ntanda. Inoko, nafundile mu Bible amba Leza ukatyibila mambo boba batōta leza wa “dyese,” pamo ne bantu ba makomwa-meso. (Isaya 65:11; Kolose 3:5) O mwanda nakwete butyibi bwa kuleka kukaya makayo a kwidya lupeto. Dya Yenga dibajinji ami pa kupwa’tu kuleka makayo a tombola, nimelo yami ya “dyese” yabwina! Bantu bauntopekele kyonkyakakailepo mu mwine yenga’wa, kupwa baanza kuningila nkakaye monka, ino napela. Nkyajokelepo monka mu makayo a kwidya lupeto.

Natenwe kadi ne na ditompo dikwabo mu būmi bwami bwa “bumuntu bupya” enka mu dine difuku dyonabatyijibwe ku kitango kya Batumoni ba Yehova. (Efisesa 4:24) Kyolwa, ami njokela ku otela konadi nshikata, natana’ko kishinka kyami kya kala kinkungile pa kibelo. Waungita bya bukena’mba “A kikupa wami, iya. Iya twisangaje!” Nalondolola ponka na ponka amba, “Napele!” Kupwa namushintulwila amba pano kenodanga mu būmi bwami misoñanya ya mu Bible. (1 Kodinda 6:18) Wabezemuka’mba, “Bika?” Penepa waanza kupeleka byobya binena Bible pa mwanda utala busekese, kauningila tupwane monka. Inoko, ami natwelele’tu nyā mu kyumba kupwa neshityila’mo ne kwela’ko kalé, aye washala panja. Dyalelo, ngidi na nsangaji mwanda tamba ngikala bu Kamoni mu 1958, ndi mushinte bininge mu būmi bwami.

Nemonanga’mba mbwanya kulemba kitabo kituntulu shi nsake kwisambila pa byonso byonemwenine mu kulonda madingi ne buludiki bwa mu Bible! Byabuyabuya bimo bidi i balunda ba bine bondi nabo, kwikala na būmi bwa kitungo, ne nsangaji ya bine.

Nekitanga ne pano futu ya nteneshi, inoko nkikiimonengapo bu idi na mvubu kutabuka. Mu kuta futu ya nteneshi nadi na ntumbo ne lupeto, inoko bino bintu kebyaijijepo kupita. Ino, kipwano kyondi nakyo na Leza ne bu bana na bana bwetu bwa ntanda yonso, byobikekala’ko nyeke. Bible unena’mba: “Ino ntanda ipitanga ne bya kusakasaka byayo bine, inoko yewa ulonga kiswa-mutyima kya Leza udi’ko nyeke.” (1 Yoano 2:17) Pano nsenswe Yehova Leza ne bantu bandi bene kumo kupita kintu kyonso!