KU BA MULUME NE MUKAJI
3: Kwilēmeka
MOKUSHINTULWILA
Ba mulume ne mukaji belēmekele, betanga mutyima nansha shi badi na milangwe mishile pa mwanda kampanda. Dibuku Ten Lessons to Transform Your Marriage dinena’mba, “Bano ba mulume ne mukaji bepukanga myanda ibwanya kwibalengeja batunye kwiivwanika. Kadi, baloñanga bukomo bwa kwisambila pa myanda ilupuka. Batejanga na bulēme mulangwe wa benē pabo ne kukwata kya mfulo kibwanya kwibakwasha abo bonso.”
MUSOÑANYA WA MU BIBLE: “Buswe . . . kebukimbangapo tumweno twa abo bwine.”—1 Kodinda 13:4, 5.
“Pa kulombola’mba ndēmekele wami mukaji mumonanga na bulēme kadi ntyinanga kulonga bintu bibwanya kumusanshija nansha kona busongi bwetu.”—Micah.
MWANDA WAKA KIDI NA MVUBU?
Shi ba mulume ne mukaji kebelēmekelepo, mīsambo yabo ifulanga ku kwifutulula, kwidibulula, ne kwipēleka—ngikadila inenwa na bakimbi amba ifikijanga bantu ku kwilubula.
“Kwela obe mukaji nkindi, kumulambika myanda, nansha kumuzawila kukamulengeja emone bule, ne kino kibwanya kona busongi bwenu.”—Brian.
BYA KULONGA
WIBANDAULE
Ta mutyima ku byonena ne byolonga mu bula bwa yenga mutuntulu. Kupwa wiipangule amba:
-
‘Le i misunsa inga yonafutulwile wami mukaji, ne i misunsa inga yonamutendele?’
-
‘I mu miswelo’ka mipotoloke monalombwele amba ndēmekele mwinē pami?’
WISAMBE NA MWINĒ POBE
-
Le i binenwa’ka ne bilongwa bilombola’mba mwi belēmeke?
-
Le i binenwa’ka ne bilongwa bilombola’mba kemwilēmekelepo?
MADINGI
-
Lemba’ko miswelo isatu yosaka bakulēmeke. Nena mwinē pobe nandi alembe. Kupwa mwishintei mapapye, ne kulonga bukomo bwa kwilēmeka mu miswelo ilembelwe’ya.
-
Lemba ngikadila ya mwinē pobe yosangelanga bininge. Kupwa lombola mwinē pobe kyosanshilwe ino ngikadila.
“Pa kulombola’mba ndēmekele wami mulume noñanga bintu bilombola’mba mumwene na mvubu kadi nsakanga kumusangaja. Kebilombengapo’nka kulonga bintu bikatampe; nansha’tu tubintu tutyetutye tubwanya kulombola bulēme.”—Megan.
Kintu kya mvubu, kekwimonapo abe mwine amba udi na bulēme nansha kudipo nabo; inoko i muswelo wimona mwinē pobe amba umulēmekele nansha’mba kumulēmekelepo.
MUSOÑANYA WA MU BIBLE: “Vwalai kisanso kya mutyima wa lusalusa, kanye, kwityepeja, kutalala, ne kitūkijetyima.”—Kolose 3:12.
