Kokajimija Nansha Dimo Lukulupilo!

Lelo wi Kamoni wa Yehova wa kala wadi usaka mwinē pobe elunge nobe mu butōtyi bwa kutōta Yehova?

Nansha watyumukilwe mutyima kitatyi kyapelele omwadi mwifunda nandi Bible wadi umweka bu wendelela biyampe kutwela mu bubinebine?

 Myanda mityetye mimweke ya mu Beletanye ikakukwasha uyuke kine kyokufwaninwepo kujimijija nansha dimo lukulupilo. Ukayuka kadi ne byobwanya kulonga pa kwela “bidībwa byobe pa mema,” mwanda wa kukwasha boba kebaitabije bubinebine.—Mus. 11:1.

KŪMININA—I KINTU KYA KAMWENO

Kintu kya kamweno kyofwaninwe kulonga i kūminina. Ufwaninwe kulamata ku bubinebine ne kudi Yehova. (Kup. 10:20) Kino kyo kyālongele Georgina. Kitatyi kyaāshilwile kwifunda Bible na Batumoni ba Yehova mu 1970, wandi mulume Kyriacos wākalabele. Watompa kumulekeja kwifunda, kadi upela kumona Batumoni ku yandi njibo ne kwela mabuku onso a batumoni ba Yehova aāmwene.

Kitatyi kyāshilwile Georgina kutanwa ku kupwila, Kyriacos wākalabela’ko. Difuku dimo wāenda ku Njibo ya Bulopwe mwanda wa kwipatana. Kaka byaādi uyukile amba, Kyriacos wisambanga Kingidiki biyampe kupita Angele, wāita ku telefone tutu Mungidiki wa mu kipwilo kikwabo aye amukwashe. Kyriacos wāsangedile mwikadila muyampe wa tutu, kadi mu myeji mityetye’tu bashilula kwifunda Bible. Ino mwenda mafuku Kyriacos wāleka’byo kwifunda.

Georgina wāendelele kulwa na kukankajibwa mu bula bwa myaka isatu ne kupita. Kyriacos wānene amba ukamupela shi wābatyijibwa. Mu difuku dya kubatyijibwa kwandi, Georgina wālombele Yehova bininge amba Kyriacos aleke kumupela. Kitatyi kyāile kumusela Batumoni bende ku kitango, Kyriacos webasapwila amba: “Badikilai. Tusa kwimulonda na wetu motoka.” Watanwa ku kipindi kya lubanga ne kumona pabatyijibwa wandi mukaji!

Kupwa lwana lwa Kyriacos lwatyepa, kadi mwenda mafuku washinta bininge. Myaka 40 pa kupwa kwitana dibajinji na Batumoni, Georgina wamona wandi mulume ubatyijibwa! Le i bika byākweshe Kyriacos? Kyriacos unena amba: “Nadi nsangedile bininge Georgina mwanda wādi musumininwe.” Georgina unena amba: “Nansha byādi binkankaja wami mulume, nkyālekelepo kukatōta wami Leza. Kyaba kyonso, nādi nombela kudi Yehova, kadi nkyājimijepo nansha dimo lukulupilo.”

KAMWENO KADI NA BUMUNTU BUPYA

Kintu kikwabo kibwanya kukwasha mwinē pobe i kutamija ngikadilo ya bwine Kidishitu. Mutumibwa Petelo wāsoñenye bakaji bene Kidishitu amba: “Kōkelai balume benu; amba, shi kudi bamobamo bakubulwa kukōkela mwanda, nankyo banekenībwe kwampikwa kwisambilwa mwanda, ponka pa mwikadilo wa bakaji babo.” (1 Pet. 3:1) Christine wālondele ano madingi, nansha byobyālombele myaka mivule pa kunekenya wandi mulume. Kitatyi kyaāikele Kamoni pano ke padi myaka 20 ne kupita, John wandi mulume kādipo ukulupile mudi Leza mu būmi bwandi. John kādipo usangedile myanda ya kipwilo, ino wādi ukimba kuyuka mvubu idi na lwitabijo lupya lwa Christine. Unena’mba, “nāmwene’mba lwāmulengeje ekale na nsangaji. Wāikele ke muntu mukomo, kadi kino kyāunkweshe mu bikoleja bivule.”

Christine kātonwenepo wandi mulume etabije mutōtelo wandi; mulume unena amba: “Christine wājingulwile tamba ku ngalwilo amba i biyampe kuleka nkusapwila myanda ya kipwilo, ne kundeka na kitūkijetyima nefunda monsakila kadi mu muswelo wami.” Kitatyi kyādi kimona Christine bishinte mu Kiteba kya Mulami nansha mu Réveillez-vous ! bisambila pa myanda yaādi uyukile bu ibwanya kusangaja John, kimfwa isambila pa sianse ne pa bupangi, wādi umulombola’yo ne kunena’mba, “mona’mba ukasangela kutanga ino myanda.”

Kyaba kimo, John wātambwile pasho ne kushilula kudima kabudimi. Byaādi na kitatyi kivule kya kulangulukila pa bipangujo bya mvubu mu būmi, wāshilula kulanguluka’mba, ‘le twāikele’ko mu kitulumukila, nansha twāpangilwe na kitungo kampanda?’ Difuku dimo, tutu bādi betumina na John misapu wamwipangula’mba, “le tubwanya kwifunda?” John unana’mba, “byonashilwile kukulupila mudi Leza, naitabija kwifunda nandi.”

Bine, kubulwa kujimija lukulupilo kwa Christine kwādi na kamweno! Pa kupwa kulomba Yehova mu bula bwa myaka 20 amba John etabije bubinebine, ebiya John wabatyijibwa. Pano bengidilanga Yehova na bupyasakane. John unena amba: “Kudi bintu bibidi byaunekenye na kampata—kanye ne kipwano kya Batumoni. Shi wi musonge kamoni wa Yehova, udi na mwinē pobe wa dikōkeji, muyampe, kadi mwipāne.” Bine, Christine wāingidije binenwa bidi mu 1 Petelo 3:1, kadi byākweshe!

NKUNWA IPANGA BIPA MWENDA MYAKA

Le tunena bika pa bifundwa bya Bible bijimijanga kusangela kwabo kubajinji pa bubinga  kampanda? Mulopwe Solomone wāsonekele amba, “lubanga kuna nkunwa yobe, kadi kyolwa nakyo kokōloja dikasa dyobe; mwanda kuyukilepo kyokya kikamena biyampe, shi kino shi kyoki, shi padi amba byonso bibidi bikalumbuluka mwa kimo.” (Mus. 11:6) Kyaba kimo nkunwa ya bubinebine iloñanga myaka mivule pa kumena. Nansha nabya, muntu ubwanya kuyuka bityebitye kamweno kadi mu kufwena kudi Leza. (Yak. 4:8) Bine, difuku dimo ukatulumuka mpata.

Langulukila pa Alice, wātambile mu India waenda mu Angeletele. Wāshilwile kwifunda Bible mu 1974. Wādi wisamba Hindi ino wasaka kulumbulula Angele yandi. Kifundwa kyāendelele mu myaka kampanda, kadi Alice wāpwidile mafuku matyetye mu kipwilo kya Angele. Wādi uyukile amba byobya byaādi wifunda byādi bya bine ino wādi wibimona bu kebidipo na mvubu. Kutabukidila, wādi utele mutyima bininge ku lupeto ne kwenda ku mafetyi. Mwenda mafuku, Alice waleka’byo kwifunda.

Kubwipi kwa myaka 30 pa kupita’po, Stella wādi wifunda na Alice, watambula mukanda wa Alice. Utangwa amba: “Nkulupile’mba usa kusangala bininge pa kuyuka’mba, kifundwa kyobe kya Bible kya mu 1974, kyabatyijibwe ku kitango kya distrike kya panopano. Wāingile mwingilo wa mvubu mpata mu būmi bwami. Wākunine nkunwa ya bubinebine mondi, kadi nansha byonkyādipo mwiteakanye kwipāna kudi Leza, nādi ndamine ino nkunwa ya bubinebine mu ñeni ne mu mutyima wami.”

Le i bika byālongekele? Alice ushintulula’mba, wātyumukilwe mutyima pāfwile wandi mulume mu 1997. Wālombele kudi Leza. Mu minite’tu dikumi, Batumoni babidi besamba ludimi lwa Punjabi bamupempula ku njibo ne kumushila trakte unena’mba, Le Tukokeja Kukemona na Bakena-Betu Bafwile? Alice wāmwene amba milombelo yandi ibalondololwa, ebiya wakwata butyibi bwa kukimba Batumoni ba Yehova. Ino le wādi wa kwibatana kwepi? Wātene kitabo kya kala mwādi adelese yāmupele Stella ya kipwilo kya ludimi lwa Punjabi. Alice waenda ku Njibo ya Bulopwe kobamulubwile na kizaji kudi batutu ne bakaka besamba ludimi lwa Punjabi. Alice unena’mba, “nadi mvuluka nyeke kizaji kyabo, kadi kyāunkweshe ntane busengi ku njia yami.”

Wāshilwile kutanwa kitatyi ne kitatyi ku kupwila ne kushilula monka kwifunda Bible, koku wifunda kwisamba ne kutanga biyampe ludimi lwa Punjabi. Mu 2003 wabatyijibwa. Mu mukanda waātumine Stella wāfudile na bino binenwa’mba, “wafwa’ko bininge ne kukuna ino nkunwa pano kepadi myaka 29, ne pa kunshila kimfwa kiyampe kya kulonda.”

Le i ñeni’ka yobwanya kuboila ku ino myanda mimweke? Bikokeja kukulomba kitatyi kupita ne molangila, ino shi muntu udi na nzala ya ku mushipiditu, wampikwa budimbidimbi kadi mwityepeje, Yehova ukatamija bubinebine mu mutyima wandi. Vuluka binenwa bidi mu kyelekejo kya Yesu bya amba: “Nkunwa nayo yamena, yenda ītama, [mukushi] kuyūkapo mo īmenena ne mo ītamina, mpika. Mwanda ntanda īmena ayo mīne ībadikila mapamba, ebiya ke myepo: myepo ke misekemo.” (Mako 4:27, 28) Kuno kutama i kwa bityebitye kadi kwa “ayo mīne.” Na bubine, musapudi yense wa Bulopwe kayukangapo muswelo oibwanya kutama. Nanshi endelela kukusa nkunwa mivule. Ukangula bivule.

Kadi kokilwa kamweno kadi na milombelo. Georgina ne Christine bālombele nyeke kudi Yehova. Shi ‘ushikilwe mu kulombela’ ne kujimija lukulupilo mpika, ukatana monka “bidibwa” byowaelele pa mema, kadi “ukatana’byo mafuku mangimangi.”—Loma 12:12; Mus. 11:1.

[Bifwatulo pa paje 30]

[Bifwatulo pa paje 30]

[Bifwatulo pa paje 30]

[Bifwatulo pa paje 30]

Myaka 40 pa kupwa kwitana dibajinji na Batumoni, Georgina wamona wandi mulume ubatyijibwa

[Bifwatulo pa paje 30]

Mukanda wa Alice wātambwile Stella utangwa amba: “Nkulupile’mba usa kusangala bininge pa kuyuka’mba kifundwa kyobe kya Bible kya mu 1974, kyabatyijibwe ku kitango kya distrike kya panopano”

[Bushintuludi pa paje 32]

“Wafwa’ko bininge ne kukuna ino nkunwa pano kepadi myaka 29, ne pa kunshila kimfwa kiyampe kya kulonda.”—Alice