2 Ikala na Buyuki bwa Binebine bwa Leza

“Ebiya’mba, bakuyūke, abe Leza enka wa binebine, . . . nankyo bo būmi ne būmi bwine bwa kulādila nyeke na nyeke.”—Yoano 17:3.

BIKOLEJA I BIKA? Bantu bamo banenanga’mba Leza kadi’kopo. Bakwabo bakulupile amba Leza i bukomo bukatakata, udi konsokonso. Boba betabija amba Leza i muntu udi’ko bine nabo bafundijanga bishileshile bya mwaikadile ne ngikadila yandi mine.

LE UKANEKENYA BINO BIKOLEJA NAMANI? Muswelo umo wa kuyuka Leza i kutala bintu byalongele. Mutumibwa Polo wānene amba: “Bintu [bya Leza] byampikwa kumweka, ku kupanga kwa panopantanda i bimwekelele’tu, padi tō, pa kuyūkanibwa pa bintu bipangibwe, ke bukomo bwandi bwa nyeke, ne bu-Leza bwandi kadi.” (Loma 1:20) Kitatyi kyotala bipangwa na katentekeji, ukayuka bivule bya mwikadile tunangu twa Umpangi wetu ne bukomo bwandi.—Mitōto 104:24; Isaya 40:26.

 Inoko, pa kwikala na buyuki bwa binebine bwa bumuntu bwa Leza, muntu ne muntu ufwaninwe kutanga ne kubandaula Bible, Kinenwa kya Leza. Kokileka bantu balamune milangwe yobe. Ino, londa ano madingi a Bible anena’mba: “Kemukīkala kudingakanibwa na bapanopantanda; nanshi mwikale kupalukako ponka pa kwisambula mityima yenu, amba mutompe kiswa-mutyima wa Leza, ne mwikadile bulumbuluke, kuloelelwa, ne bu-bwaninine monka.” (Loma 12:2) Kimfwa, bandaula myanda ilonda’ko’i itusokwela Bible padi Leza.

Leza udi na dijina dyandi dyandi. Dijina dya Leza ditanwa misunsa tununu ne tununu mu Bible. Malamuni mavule a Bible i meditele mu Mitōto 83:18, inena’mba: “Amba bayūke’mba, abe enka, wa dijina dya bu-Yehova, wi Mwinemukatakatamwine panopantanda ponsololo.”

Yehova Leza utenekwanga na bilonga bantu. Pāpwile Yehova kunyongolola Bene Isalela mu bupika bwa Edipito, abo bāidilwe madingi andi a tunangu. Butomboki bwabo bwāikele “kumufītyija ku mutyima.” Kadi ne “kusomba Mwine Mupandulwemo wa Isalela” na bilongwa byabo.—Mitōto 78:40, 41.

Yehova utele muntu ne muntu mutyima. Yesu wālombwele bandi bana ba bwanga amba: “Lelo toni tubidi ketupotwepo ne kadilungo kamo? Ino nansha kamo kakapona panshi pa kubulwa Shenu. Nanshi ne nywene mīne ya ku mutwe wenu nayo i mibalwe yonso. Papo pene po pa mwanda wakubulwa kukwatyilwa moyo o mukīdile toni tungi buleme.”—Mateo 10:29-31.

Leza kadipo na kiswelelela ku muzo nansha musaka umo kupita mikwabo. Mutumibwa Polo wāsapwidile Bangidiki ba mu Atene amba Leza “wasambakenye mizo yonso ya bantu ke mashi amo onka bēkele ku mitamba yonsololo ya panopantanda.” Kadi wānena’mba Leza “kadipo ne kulampe kwine na bātwe bonso, mhm.” (Bilongwa 17:26, 27) Mutumibwa Petelo wānene amba: “Leza kalemekangapo bantu’mba: Yeu ye yeu, mhm. Nanshi mu mizo yonso enka umutyina, ulonga bilumbuluke nabya ye waitabijibwa kudi aye.”—Bilongwa 10:34, 35.

LE I KAMWENO’KA KAMWENWA’MO? Bantu bamo “badi ne bukankamane bwa kusaka Leza, ino kebwendelepo mu ñeni, mhm.” (Loma 10:2) Shi uyukile bine bifundija Bible padi Leza, muntu kakakudimbepo ne ukabwanya ‘kufwena kudi Leza.’—Yakoba 4:8.

Shi usaka kuyukila’ko myanda mikwabo, tala dibuku Lelo I Bika Bine Bifundija Bible? * shapita 1, unena’mba “I Bubinebine’ka Butala Padi Leza?”

[Kunshi kwa dyani]

[Kifwatulo pa paje 6]

Muswelo umo wa kuyuka Leza i kutala bintu byalongele