Lelo Bipwilo Byonso I Biyampe?

TUDI mu ntanda yavula bipwilo. Bubandaudi bwa panopano bwasokwele bipwilo bikatampe 19 ne bityetye’mo 10 000 kujokoloka ntanda. Kuno kuvula kwa bipwilo ke kulombe bantu batonge kutabuka mobyadi bikadile pa kala. Lelo kutonga kipwilo kyo-kyonso kekudipo na mwanda?

Bantu bamo banenanga’mba bipwilo palapala bidi’nka bwa mashinda palapala atwala ku lūlu. Kobadi, dishinda dyo-dyonso i diyampe, mwanda ditwalanga’nka ku kifuko kimo. Banena’mba kudi Leza umo kete Mwinē Bukomo Bonso, o mwanda nanshi bipwilo byonso bitōtanga’nka aye.

Lelo Mashinda Onso Atwala Kudi Leza?

Lelo Yesu Kidishitu, muntu mulēmekwe bininge na bafundiji ba bipwilo mu mānga, wānene bika pa uno mwanda? Wānene bandi bana ba bwanga’mba: “Twelelai pa kakibelo katyetye.” Mwanda waka? Mwanda “kyokya kibelo i kikatampe kyenda kukoneka, ne dishinda nadyo monka, kadi bakatwela monka i bangi bangi. Ino kabelo ka kutwala ku bumi a! a! a! butyeko! ne dishinda monka: ne bakwikamona i batyetye.”—Mateo 7:13, 14.

Lelo bine Yesu wānene amba bipwilo bimo byendanga “kukoneka”? Nansha le wāfundije amba enka bampikwa kwitabija bo badi mu dishinda dikatampe,  ino boba betabije mudi Leza—nansha bekale mu kipwilo’ka— abo badi mu dishinda ditwala ku būmi?

Yesu pa kupwa’tu kunena’mba kudi mashinda abidi kete, wābwejeje’ko amba: “Dyumukai na bafumiki ba bubela, beya ko mudi bamweka bwi bamikoko, ino munda ko i bampumpi badyana.” (Mateo 7:15, Bisonekwa Bitokele) Kupwa wānene amba: “Ke bonso po bantela’mba: ‘Mfumwetu, Mfumwetu’ bakatwela mu Bulopwe bwa mu madiulu, anha, poso boba balonga musakila Tata udi mu madiulu.” (Mateo 7:21, Myanda Miyampe ku Bonso) Shi kudi muntu utelwa bu mupolofeto nansha ulombola bantu amba Yesu i ‘Mfumwandi,’ i kyendele’mo kumwita bu mwitabije, ke bu wampikwa kwitabijapo, mhm. Ino Yesu wādyumwine pa uno mwanda amba ke bipwilopo byonso bya bine, kadi ke bafundijipo bonso ba bipwilo bafwaninwe kukulupilwa.

Lelo Bibwanika Kusokola Dishinda Dityetye?

Mashinda onso byokeatwalapo kudi Leza, le i muswelo’ka okasokola dishinda dityetye ditwala ku būmi mu bukata mwa mashinda mavule? Tala kino kimfwa: Langa’po bidi ubajimina mu kibundi kikatampe. Koipangula bantu. Muntu umo amba enda ku lunkuso. Mukwabo amba enda ku lundyo. Ino ungi nandi amba enda mutamba onso osaka. Ku mfulo, ñenda mukwenu wakuletela kalata kakulupilwa kakulombola dishinda diyampe. Wakupe’ko amba kakukwashe mu dishinda. Le ubulwe’po kusangala ne kukulupila amba usa kufika senene?

Netu mo monka tusakilwa kalata ka ku mushipiditu kakulupilwa mwa kutongela kipwilo kiyampe. Le kano kalata kadi’ko? Eyo, kadi’ko. Kano kalata i Bible, unena aye mwine amba: “Bisonekwa byonsololo i biletwe na mushipiditu wa Leza, kadi bimwenwa’mo mu kufundija, ne kolola, ne kudingila madingi, ne kulombola byoloke.”—2 Temote 3:16, King James Version.

Padi udi kala na bwalamuni bwa Bible mu ludimi lwenu bokokeja kwingidija bu kalata ka ku mushipiditu. Batumoni ba Yehova, bene balupwile uno julunale, i balupule ne bwalamuni bwa Bible bwa bine bwitwa bu Les Saintes Écritures — Traduction du monde nouveau. Inoko, shi kudipo Kamoni wa Yehova, ukokeja kutonga kwingidija bwalamuni bo-bonso kitatyi kyokimba kujingulula kipwilo kya bine ne kya bubela. O mwanda, bino bishinte bilondakane bitela malamuni mavule a Bible alēmekelwe bininge na bipwilo bikwabo.

Posa kutanga kishinte kilonda’ko, dingakanya byobya byoyukile na byobya binena Bible. Vuluka binenwa byānene Yesu bya mwa kushiyañenya kipwilo kya bine na kipwilo kya bubela. Wānene amba: “Mutyi munengele upanga binengele, ino mutyi mukobakane nao upanga bikobakane. Mutyi munengele keuyūkile kupa bipa bikobakane, nansha mutyi mukobakane nao keupepo bipa binengele.” (Mateo 7:17, 18) Tala bidi’tu bipa bisatu binengele binena Bible amba byo bikokeja kupa ku “mutyi munengele.”

[Kifwatulo pa paje 3]

Bible udi pamo bwa kalata kakulupilwa ka dishinda kakokeja kukwasha muntu atane dishinda ditwala ku kipwilo kya bine