“Pamfulo,” Mfulo’ka?

“. . . penepo nankyo po pakafikidila ne pamfulo pene.”—MATEO 24:14.

BANTU banenanenanga mpata mwanda utala mfulo. Bitabo, mafilime, ne majulunale, kushilwila ku myanda ya makayo kutūla ku myanda ya sianse, bisapula kwikala’ko kwa binkumbulu palapala. Babadila’mo kutukijibwa na mavita a nyukilia, kwikonga kwa imbuo, bishi bya mukubo, koneka kwa umbuo mu muswelo mukomo, bintu bya mu lwelele kutamba ntanda.

Bipwilo nabyo bidi’po na milangwe mishileshile; bavule bafundija amba “mfulo” ikafudija byūmi byonso bidi pa ntanda. Mwifundi umo wa teoloji pa kushintulula Mateo 24:14, walembele na katyitya amba: “Uno vese i vese wa mvubu mikatampe mu Kinenwa kyonso kya Leza . . . Lukongo lwetu lutengele bonakani bwa kituki kebubwanyapo bantu bavule kufwatakanya bintu bibi byobukalonga.”

Bantu balanga namino abailwa bubinebine bwa mvubu bwa amba: Yehova Leza ‘wākomeneje’ ntanda; “kapangīle’popo kwikala bitupubitupu, ehe, [ino] wabumbile’po amba pekalwe.” (Isaya 45:18) Nanshi Yesu pa kutela “pamfulo,” kādipo usaka kunena amba ino nshi isa konakanibwa, mhm; nansha amba bantu bonso bakakubijibwa. Wādi usaka kunena’mba babi—boba bapela na kibengo kulonda bwendeji bwa buswe bwa Yehova mu būmi bwabo—bo bakonakanibwa.

Tulete kimfwa. Langa’po bidi shi udi na njibo miyampe ne ubatūla’mo bantu bashikate’mo ku bitupu. Bamo bashikete’mo biyampe na bakwabo ne kwiilongolola senene. Ino, bakwabo nabo, baleta enka kavutakanya, bekupila ne kususula bekadi bayampe. Abakonena njibo ne kupela kuteja byowibakankaja.

 Le ukalonga namani pa kupwa uno mwanda? Le ukapomona njibo yobe? Ke nankyopo. Mobimwekela, ukapanga boba babi ne kulongolola byobonene.

Ye mukalongela ne Yehova. Wāpele mulembi wa mitōto mushipiditu asoneke amba: “Mwanda bakulonga bibi bakatyibwako; ino boba batengele Yehova, abo bakapyana ntanda. Ke-kuntu kukidi bidi kitatyi kityetye, ne mubi ukēkala kutupu’ye; eyo i binebine, ukafwatakanya biyampe pantu pandi, ukēkalanga kutupu’ye. Nanshi bakikōkeji bakapyananga ntanda; kadi bakēsangaja mu bungi bwa ndoe.”—Mitōto 37:9-11.

Mutumibwa Petelo nandi wēsambīle pa uno mwanda. Wālembele ku bukomo bwa mushipiditu amba: “Kwadi ne madiulu a pa kalā, ne ntanda nayo ya kubumbwa ku mema, ne umbukata mwa mema, konka ku kinenwa kya Leza. Ko konka kwaonekele ne yoya ntanda yadiko’ya pa kulobelwa’yo mu mema.” (2 Petelo 3:5, 6) Pano mutumibwa wisambilanga pa Dilobe dya mu mafuku a Noa. Ntanda ya bantu bakubulwa bwine Leza yāonakanibwe, inoko nshi kēyaonakanibwepo. Dilobe’dya i “kidyumu kya kudyumukilapo boba bakēkala bakubulwa Leza.”—2 Petelo 2:6.

Kupwa Petelo wābweja’ko amba: “Madiulu akidipo ne pano, ne ntanda mīne kumo, . . . nabyo i bibīkilwe mudilo.” Shi tukadikile pano, tukokeja kusela mulangwe wa bubela. Ino tala bibweja’ko uno vese amba: “Konakanya bantu bakubulwa bwine-Leza.” Kekonakanyapo nshi, ino i bakubulwa bwine Leza. Kupwa ke bika? Petelo amba: “Bātwe, monka mwendele mwanda-wamulao wandi, tutengele madiulu mapya [Bulopwe bwa Leza bupelwe Meshiasa], ne ntanda īngi mipya [kisaka kya bantu boloke] mo mwikalanga boloke.”—2 Petelo 3:7, 13.

Bupolofeto bwa mu Bible nabo bulombola amba “pamfulo” pāya pabafwena. Tanga Mateo 24:3-14 ne 2 Temote 3:1-5 umone bintu bibingija uno mwanda. *

Le kebikutulumwinepo kumona mwikutakenya bantu pa Mateo 24:14, kisonekwa kibwanya kwimvwanwa nansha na mwanuke mutyetye? Kudi bine bibakutakanya. Satana usabanga meso a bantu baleke kumona bubinebine bulumbuluke budi mu Kinenwa kya Leza. (2 Kodinda 4:4) Ne kadi, Leza i mufye mpango yandi ku ba kwitatula ino weisokwela ku ba kwityepeja. Pa uno mwanda, Yesu wānene amba: “Nakufwijako abe Tata, mwine mūlu ne panopanshi, byo wafile’byo ku bañeni ne ku badyumuke, ino ubasokwela’byo ku twana-twalukeke.” (Mateo 11:25) Bine ino i ntumbo kubadilwa mu bano betyepeje bemvwanije amba Bulopwe bwa Leza budi’ko bine ne batengele madyese obukaletela boba bonso bebukwatakanya!

[Kunshi kwa dyani]

[Binenwa bya Kifwatulo pa paje 9]

Bulopwe ‘bukafudija’ bubi bonso pano pa ntanda