Le Yesu Wādi Umwene Politike Namani?

BALEMBI ba Evanjile i balombole myanda palapala ya mu mwingilo wa Yesu yobādi bakimba kumutwejeja mu politike. Kimfwa, kyaba kityetye kupwa kwa Yesu kubatyijibwa na kintu kya myaka 30, Satana wālaile kumubikika bu mulopwe wa ino ntanda. Mwenda mafuku, aye mu mwingilo wandi, kibumbo kyāsakile kumubikika bu mulopwe. Kupwa kadi, bantu bātompele kumwikadija bu muntu wa politike. Le Yesu wālongele’po namani? Tubandaulei bino binkumenkume.

Mbikavu wa ino ntanda. Maevanjile anena amba Dyabola wālaile kupa Yesu “malopwe onso a panopantanda.” Langa’po bidi bintu biyampe byādi bikokeja kulonga Yesu pangala pa bantu basusuka shi wāikele mbikavu wa ino ntanda! Lelo muntu ukulupile mu politike, utele mutyima bya binebine ku kwendelela kwa bantu, wādi ukokeja kupela kupebwa buno bulopwe? Ino Yesu aye wāpelelebo.—Mateo 4:8-11.

Mulopwe. Bantu bavule ba mu mafuku a Yesu bādi bakimba ne mikeketo mulopwe wādi ubwanya kupwa myanda ya kukoma kwa misokwe ne ya kipolitike. Bantu pa kutengwa mpata na bwino bwa Yesu, bādi kebakimbe Yesu ekuje mu myanda ya kipolitike. Lelo wālongele’po namani? Yoano mulembi wa Evanjile unena’mba: “Yesu byēbayūkile’mba: Basaka kwiya kuningila bakambikike bulopwe; ne kuteluka watelukila pakwabo, monka mu lūlu’mo kwa bunka bwandi.” (Yoano 6:10-15) Bine, Yesu wāpelele kwikuja mu politike.

Muntu wa politike. Tala byālongekele mu mafuku mavule kumeso kwa Yesu kwipaibwa. Bana ba bwanga ba Bafadiseo, bādi basaka Umbikalo wa Loma wibape bwana-pabo, kubadilamo ne bantu ba mu kitango kya politike kya Heloda bādi basangedile mudi Loma, bākesambile na Yesu. Bādi basaka kumuningila atwele mu myanda ya politike. Bāmwipangwile shi Bayuda bafwaninwe kusonka musonko wa Loma.

Mako wālembele malondololo a Yesu amba: “Lelo kika kyo muntompela? Nanshi ndeteleipo bidi ndenadi mone’yo. Nabo bamuletele’yo, ino webēpangula’mba: Lelo kino kyelekejo ne kilembwa kidipo i kya kwa ani? Nabo’mba: I kya kwa Kesala. Penepo kala Yesu webalondolola’mba: Nanshi lubwilai Kesala bintu bya Kesala, kadi bya Leza nabyo i bya Leza.” (Mako 12:13-17) Dibuku dimo (Church  and State—The Story of Two Kingdoms) dinena pangala pa bubinga bwa malondololo a Yesu amba: “Wāpelele kulonga bintu pamo bwa meshiasa wa kipolitike ne kutūla mukalo pa bintu bya Kesala ne bya Leza.”

Makambakano pamo bwa bulanda, majikakanwa ne bukondame, kebilombolapo amba Kidishitu kātelepo bantu mutyima. Na bubine, Bible ulombola’mba Yesu wātengelwe bininge na ngikadilo ya bulanda yādi’mo bantu ba mu andi mafuku. (Mako 6:33, 34) Ino, Yesu kāshilwilepo kulonga kampanye ka kuludika ino ntanda ya bukondame, nansha bamo byobalongele buninge bwa kumutweja mu myanda yādi ilenga kavutakanya mu mene mafuku’a.

Bine, enka namulombwela’kyo bino bimfwa, Yesu wāpelele kwikuja mu myanda ya kipolitike. Ino le Bene Kidishitu dyalelo nabo le? Le bafwaninwe kulonga bika?