Le Ukakulupila Leza?

LANGA’PO shi udi na mulunda otendelanga bininge, ino walonga kintu kyokwivwanijepo. Bakwabo abafutulula kilongwa kyandi ne kutatana kukanina kwandi kwa mutyima na kunena amba mulunda nobe i ntapani. Le uketabija bukidi bonka byobanena’ni nansha ukakungila kwivwana mulunda nobe akusekunwine’mo? Shi aye mwine kadi’popo mwanda wa kukusekunwina, ubulwe’po kutūkija mutyima ne kuleka kumutatana?

Kumeso kwa kulondolola ufwaninwe kuyuka bivule. Ubwanya kwiipangula amba, ‘le i muswelo’ka ondyukile uno mulunda ne i bubinga’ka bomutendelelanga?’ I byendele’mo kwiipangula bino bipangujo. Ino languluka bidi: Le tubulwe’po kwingidija ino misoñanya imo yonka ku kipangujo kya kuyuka shi Leza i ntapani?

Ukokeja padi kukomenwa kwivwanija bintu bimo bilongele Leza nansha kuvutakanibwa ñeni pa kuleka kwalekele bilongeka. Kudi bantu bavule bakakulombola amba, Leza i ntapani ne kukusoñanya utatane kukanina kwandi kwa mutyima pamo bwa abo. Le ukaleka kumutatana kufika’nka ne byokayuka bivule? Malondololo akemanina padi pa muswelo oyukile Leza. Wiipangule amba, ‘le Leza i mulunda nami wa muswelo’ka?’

Shi udi na makambakano mu būmi, ubwanya padi kunena amba Leza ke mulunda nobepo nansha dimo. Languluka bidi bityetye. Le Leza ye ulengeja masusu mu bobe būmi’ni—nansha madyese? Monka motwekimwenine, Satana ye “mulopwe wa panopantanda,” ke Yehovapo. (Yoano 12:31) Nanshi i Satana ulengeja bumonya-malwa ne bukondame bwa ino ntanda. Le kwitabijepo amba kubulwa kubwaninina kwetu ne ngikadilo yampikwa kulaya nabyo bilengejanga masusu mavule otwikonda nao?

Ku mutamba mukwabo nako, le Leza ulengejanga bika? Langulukila pa binena Bible amba: Leza “Wapangile diulu ne ntanda”; amba mu mingilo yandi mubadilwa imbidi yetu yāpangilwe mu muswelo wa “kutendelwa”; ne amba Yehova i “Leza wa mu dikasa dyandi mudi mūya obe.” (Mitōto 124:8; 139:14; Danyele 5:23) Le bino binenwa bishintulula bika?

Bishintulula amba muya wetu ne kwikala’ko kwetu bidi mu makasa a Umpangi wetu. (Bilongwa 17:28) Bishintulula kadi amba kyabuntu kya būmi, ntanda milumbuluke itujokolokele, buswe ne bulunda botusangela, kutompa bidibwa, kutenga, kwivwana ne kulula—bino byonso i byabuntu bitambile kudi Leza. (Yakoba 1:17) Le kwitabijepo amba ano madyese onso i mamulengeje ekale Mulunda otufwaninwe kulēmeka ne kukulupila?

Shako ubwanya kukomenwa kukulupila Leza. Padi umona’mba kumuyukilepo biyampe pa kumukulupila. Kino i kyendele’mo. Mu bino bishinte bīpi, ketubwanyapo kuleta bubinga bonso bumwena bantu bamo amba Leza i ntapani. Ino le ke biyampepo kulonga bukomo bwa kuyuka Leza senene? * Tukulupile amba shi ulonge bukomo, ukayuka bubinebine butala padi Leza. Le i ntapani? Mhm, “Leza i lusa.”—1 Yoano 4:8.

[Kunshi kwa dyani]

[Kifwatulo pa paje 7]

Le Leza ye ulengeja masusu mu bobe būmi’ni—nansha madyese?