Sylvia wingilanga mu mwingilo utala bukomo bwa ngitu unena amba, “nadi ñenda ku inivelesite na bantu bavule badi betela bu batōtanga. Ino, badi batentula ku maekizame ne kutoma bitomibwa bikolwañana. Kipwilo kekyadipo na lupusa pa būmi bwabo.”

Muntu umo witwa bu Lionel unena amba: “Bengidi-nami babepanga ne kulomba konje wa misongo abo papo kubela mpika. Badi mu kipwilo inoko kebadipo bengidija byobadi bafundijibwa—badi pamo bwa kintu kyakutadila’po mu bintu bya kupota.”

Kipwilo kekidipo na lupusa mu būmi bwa bantu bavule. Bantu bavule dyalelo ‘bedingakanyanga bu bene Leza’ ino “bukomo bwa bu-bwine Leza bafutulwile’bo.” (2 Temote 3:5) Bendeji babo ba bipwilo kebaletangapo kimfwa kiyampe, nansha kupa luombe lwabo madingi a mu Bisonekwa obasakilwa pa kwikala biyampe mu būmi. Ke kya kutulumukapo shi bavule bakulupile amba Leza katelepo mutyima ku muswelo obeendeja mu būmi bwabo.

Bible ulombola amba, Leza uteñwanga ne amba mwiendelejo wetu udi na mwanda mukatampe kwadi. Bene Isalela ba pa kala pobātombokele Leza, ‘bāmufityije ku mutyima.’ (Mitōto 78:40) Inoko, shi muntu washinta mwiendelejo wandi mubi bya binebine, ‘kusepelela kukatampe kwikalanga mūlu.’ (Luka 15:7) Shi muntu washilula kusangela ngikadilo miyampe ya Tata wetu wa mūlu, buswe bwaswele Leza bukatama ne kumutonona asanswe byobya bisenswe Leza ne kushikwa byashikilwe.—Amose 5:15.

Julunale umo (The Deseret News of Salt Lake City, Utah, U.S.A.) unena amba, Batumoni ba Yehova “bakankamikanga bumo mu kisaka ne kulengeja bana ba kibundi bekale bampikwa budimbidimbi.” Uno julunale ubweja’ko amba: “Bantu badi’mo balondanga misoñanya ya mu mwikadilo. Betabije amba, kutoma mfwanka, kukolwa, kutoma bitomibwa bikolwañana, makayo a kwidya lupeto, busekese ne kusambakena pamo kwa bantu ba ngitu imo, i bilongwa bibi byona muntu ku mushipiditu.”

Le kwifunda myanda itala bumuntu bwa Leza kukwashanga Batumoni namani? Sylvia utelelwe kūlu unena amba, “bwivi i butāle mu mwingilo utala bukomo bwa ngitu. I bipela kwendelela kwiba. Ino kwivwanija muswelo wibumona Yehova * kwankweshe nonge byoloke. Nemusangale kadi ngidi na ndoe ya mutyima.” Sylvia witabije amba kwiendeja mungya nkulupilo ya kyandi kipwilo i kulumbulule būmi bwandi.