Nādi nsenswe bupangi tamba pa bwanuke. Divule dine kisaka kyetu kyādi kisenswe kwenda mu mató mayampe ne majiba malumbuluke ajokolokele yetu ntanda ya Jyväskylä, ntanda ya pa bukata bwa Felande. Kadi nsenswe banyema. Ponakidi mwanuke nādi mfumbakanya pushi nansha mbwa onādi mona! Ami pa kutama, nakambakanibwa na muswelo wādi uvudile bantu kususula banyema. Kyaba kimo natwela mu bulongolodi butala byepelo bya banyema, mwine monātene bantu bādi na milangwe na yami.

Twālongele kampanye ka kulama byepelo bya banyema. Twēsambile na bantu bavule pa uno mwanda ne kukwata’ko mpangiko ya kupela kwipaibwa kwa banyema, kutūlwa’ko kwa bīkwe bya lupoto lwa banyema ne bifuko bya kwibapimina’ko misongo. Twābundile’ko’nka ne bulongolodi bupya bwa kukinga banyema. Divule dine ketwādipo twiivwana na balupusa mwanda wa mpangiko yotwātudile’ko ya kukimba kulonda myanda ya banyema. Nākutyilwe ne kutwejibwa mu kidye misunsa mivule.

Kutentekela pa kuta konādi ntele banyema mutyima, nādi nkambakanibwa na makambakano makwabo adi pano pa ntanda. Mwenda mafuku natwela mu malongolodi mavule, kubadila’mo ne bulongolodi bwa Amnesty International ne bwa Greenpeace. Nāingidije bukomo bwami bonso mu kukwatakanya mingilo yao. Nādi nenena balanda, ne bantu bakwabo bampikwa misokwe.

Ino mwenda mafuku najingulula’mba, nkibwanyapo kushinta ntanda. Nansha ano malongolodi byoālongele bukomo bwa kupwija myanda mityemitye, ino myanda mikatampe yādi imweka bu yenda ibipila’ko. Byādi pamo bwa bukomo bwa bubi bwātādile ntanda yonso ne amba kekwādipo muntu wādi ubanga kintu. Bukomo bwāumpwa.

Pa kuyuka’mba nkibwanyapo kulonga kintu pa kuleta kuno kushinta,  nashilula kulangulukila padi Leza ne pa Bible. Dibajinji nēfundile Bible na Batumoni ba Yehova. Nansha byonāyukile amba Batumoni badi na kanye ne amba bantele mutyima, nkyādipo mwiteakanye kushinta būmi bwami. Ino mu kino kitatyi, bintu byāshintyile.

Nasela Bible wami ne kushilula kutanga’ye. Wāunsengele bininge. Nātene bisonekwa bivule bya mu Bible byāmfundije kumona banyema na kanye. Kimfwa, Nkindi 12:10 unena’mba “muntu moloke ubanga būmi bwa nyema yandi.” Kadi nāyukile’mba ke Lezapo ulengejanga makambakano a ino ntanda. Ino amba, makambakano etu abipilanga’ko mwanda wa bantu bavule kebalondapo buludiki bwandi. Natengelwe ponayukile buswe bwa Yehova ne kwīfula kwandi.​—Mitōto 103:8-14.

Mu kino kitatyi, nātene kapindi (coupon) konadingile pa kulomba dibuku Lelo I Bika Bine Bifundija Bible? ne kwikatuma. Kepejije ba mulume ne mukaji Batumoni baiya ku njibo yami ne nkunena twifunde Bible, ebiya naitabija. Kadi nashilula ne kutanwa ku kupwila kwa bwine Kidishitu ku Njibo ya Bulopwe. Mfulo mfulō, bubinebine bwa mu Bible bwashilula kwala miji mu mutyima wami.

Byonalangulukile pa Bible, nashintyile bininge. Naleka’byo kutoma mfwanka ne kukolwa. Nalumbulula mumwekelo ne muneneno wami. Kadi nashinta ne mumweno onadi mona balupusa. (Loma 13:1) Naleka ne būmi bwami bwa busekese, kintu kyādi kinkomene kulonga.

Kushinta kwādi kunkomene i kwa kutamija mumweno moloke pa malongolodi atala myanda ya bantu. Kino kekyalongekelepo mu kitulumukila. Dibajinji nādi nanga’mba shi naleka’byo, nkalonga buzazangi ku ano malongolodi. Inoko, nāyukile’mba Bulopwe bwa Leza i lukulupilo lumo kete ludi’ko pa yetu ntanda. Nākwete butyibi bwa kwingidija bukomo bwami bonso mu kukwatakanya buno Bulopwe ne kukwasha bakwetu befunde myanda yabo.​—Mateo 6:33.

Byonādi muntu ulwila bantu, nādi mvudile kukalañanya bantu mu bisumpi bibidi​—bekale bayampe nansha babi​—kadi nādi ndwa na boba bonādi mona bu babi. Ino byonangulukilanga pa Bible, nkikidipo kadi na mushikwa pa bakwetu. Inoko, noñanga bukomo bwa kutamija buswe bwa bwine Kidishitu pa bantu bonso. (Mateo 5:44) Kutentekela pa miswelo mikwabo, nombolanga buno buswe na kusapula myanda miyampe ya Bulopwe bwa Leza. Ndi musangale pa muswelo uleta uno mwingilo wa kwituma ndoe ne nsangaji ne kupa bantu lukulupilo lwa binebine.

Namwene ndoe ya mutyima kupityila ku kutūla myanda yonso mu makasa a Yehova. Nkulupile’mba byadi Umpangi, kakalekapo banyema ne bantu basusulwa nyeke nansha kuleka yetu ntanda milumbuluke yonakanibwa. Ino, kupityila ku Bulopwe bwandi, usa kulongolola panopano ponka byonso byonekele. (Isaya 11:1-9) Kino kekindetelangapo’nka nsangaji mikatampe ya kuyuka buno bubinebine, ino i ne kukwasha bakwetu bebwitabije. Nkikimonengapo amba nenwe kushinta ntanda.