Le Yehova umwene na mvubu byobya bilonga batōtyi bandi mwanda wa kumusangaja? Bamo babwanya kunena’mba ke amopo, na kulanga’mba Leza ketutelepo mutyima. Ino kulanga namino kufutulwijanga Leza bininge. Bible Kinenwa kyandi kilombola uno mwanda patōkelela. Kitukulupija’mba Yehova usangelanga bukomo bulonga batōtyi bandi ba kikōkeji. Tulangulukilei bidi pa binenwa bya mutumibwa Polo bidi mu Bahebelu 11:6.

Le i bika byotubwanya kulonga pa kusangaja Yehova? Polo wāsonekele amba: “Pampikwa lwitabijo kebibwanikapo kusangaja Leza.” Yuka’mba Polo kanenepo amba i bikomo kusangaja Leza pampikwa lwitabijo. Ino, mutumibwa unena’mba kebibwanikapo kumusangaja. Mu muneneno mukwabo, lwitabijo i kintu kya mvubu pa kusangaja Leza.

Le i lwitabijo lwa muswelo’ka lusangajanga Yehova? Lwitabijo lwetu mudi Leza lulomba kulonga bintu bibidi. Kibajinji, ‘tufwaninwe kwitabija’mba udi’ko.’ Malamuni makwabo anena’mba “kulupila’mba i muntu udi’ko bine” ne “kulupila’mba udi’ko.” Le tubwanya kusangaja Leza namani shi tutatana kwikala’ko kwandi? Inoko, lwitabijo lwa binebine lulomba bivule, mwanda ne bademona bakulupile’mba Yehova udi’ko. (Yakoba 2:19) Lwitabijo lotwitabije’mba Leza i muntu udi’ko bine lufwaninwe kwitutonona tulonge’po kintu, ko kunena’mba, kulombola lwitabijo lwetu na kwiendeja mu muswelo umusangaja.—Yakoba 2:20, 26.

Kya bubidi, ‘tufwaninwe kwitabija’mba’ Leza ye “upalanga mpalo.” Muntu udi na lwitabijo lwa bine ukulupile ne pa mfulo amba, bukomo bwalonga bwa kwiendeja mu muswelo usangaja Leza ke bwa bitupupo. (1 Kodinda 15:58) Le tubwanya kusangaja Yehova namani shi tutatana bukomo bwandi nansha mutyima wandi wa kwitupala mpalo? (Yakoba 1:17; 1 Petelo 5:7) Muntu ufula ku kunena’mba Leza katelepo bantu mutyima, kasangelangapo bantu kadi wa kubulwa buntu, kayukilepo Leza utelelwe mu Bible.

Le Yehova upalanga bāni mpalo? Polo unena’mba, i “boba bamukimba na mikeketo.” Dibuku dimo dya balamuni ba Bible dinena’mba, kishima kya Kingidiki kyalamwinwe bu ‘kukimba na mikeketo’ kekishintululapo “kusokola” ino, kifunkila pa kwiya kudi Leza mwanda wa “kumutōta.” Dibuku dikwabo dishintulula’mba, kino kyubwa kya Kingidiki kileta mulangwe wa kulonga bukomo bininge. Bine, Yehova upalanga mpalo boba badi na lwitabijo lwibatonona bamutōte na buswe bwa na mutyima umo ne bupyasakane.—Mateo 22:37.

Le Yehova upalanga batōtyi bandi ba kikōkeji mpalo namani? I mulaye kuleta mpalo mikatampe mu mafuku a kumeso ikalombola buntu ne buswe bwandi bukatampe—ke būmi bwa nyeke mu Paladisa pano pa ntanda kadi. (Kusokwelwa 21:3, 4) Nansha ke dyalelo, boba bakimba Yehova na mikeketo bemwenanga madyese mavule. Na bukwashi bwa mushipiditu sandu wandi ne tunangu tudi mu Kinenwa kyandi, bemwenanga mpalo ne būmi bwa nsangaji.—Mitōto 144:15; Mateo 5:3.

Na bubine, Yehova i Leza wa kufwija’ko usenswe mwingilo wingila batōtyi bandi ba kikōkeji bepāne. Le kuyuka kino, kubakutonona ukimbe kufwena kwadi? Shi i amo, ubulwe’po kwifunda bivule pa muswelo obwanya kutamija ne kulombola lwitabijo lukakupadilwa mpalo na Yehova?