Nabutwidilwe mu Riga, mwipata mwa ntanda ya Latvia. Kaka ne ami twatamijibwe na mama. Nansha mama byaadi wa Katolika, twadi twenda ku kipwilo enka mu mafuku a mafetyi. Nadi nkulupile amba kudi ne bukomo butabukile bonso, ino byonadi nkasampe nadi mpuwakanibwa na myanda mikwabo.

Ami pa kwenda nkula, mama wajingulula amba ngidi na bwino bwa kupomona bintu kupwa kadi nebifunga monka. Byotwadi na bintu bivule mwinjibo bibwanya kupomonwa, mama wadi ukwatwa moyo wa nkushiya ku njibo bunka. Waumpele kya kukaya nakyo kyonasenswe ne kyonadi mpomona ne kwikifunga monka. Kino kintu kyakwatañene na kintu kikwabo kyonadi nsenswe—kwitaka na tukutuku. Mama waunembeje ku makayo a kwitaka na tukutuku etwa bu Zelta Mopēds (Mobilete wa Olo). Kepejije nashilula kunyema na mobilete, kupwa ke na tukutuku.

Pa kubulwa ne kwija kwine nashilula kunyema kupita bakwabo mu ano makayo aleta kyaka. Naselele Kikombe kya bakayi ba matukutuku ba mu Latvia misunsa isatu, Kikwabo nakyo misunsa ibidi kya babingwa ba matukutuku ba mu Matanda a Baltic.

Ami papo mwielele mu makayo ami, Evija mulunda nami mwana-mukaji (waikele mwenda mafuku ke wami mukaji), wetana na Batumoni ba Yehova. Wadi na mabuku amo a Batumoni, mwine mwadi kalupapule pa kulomba shi usaka kwifunda Bible. Wadingile kalupapule’ka, kupwa wekatuma. Ponka’pa Batumoni babidi baiya kumupempula, washilula kwifunda nabo Bible. Kino kifundwa kyansangeje, ino mu kine kitatyi’kya nadi nkyaloedilwe bininge myanda ya Leza.

Mwenda mafuku, Batumoni baunena ntanwe pobefunda Bible na Evija ne kuteja. Naitabija, kupwa kadi nasangedile  bintu byonaivwene. Kintu kyantengele bininge ku mutyima i mulao wa Bible utala paladisa pano pa ntanda. Kimfwa, bauntangile kisonekwa kya Mitōto 37:10, 11, kinena amba: “Ke-kuntu kukidi bidi kitatyi kityetye, ne mubi ukēkala kutupu’ye; eyo i binebine, ukafwatakanya biyampe pantu pandi, ukēkalanga kutupu’ye. Nanshi bakikōkeji bakapyananga ntanda; kadi bakēsangaja mu bungi bwa ndoe.” Uno mulao waunsangeje bininge.

Nashilwile kusangela bininge myanda ya Leza. Naanza kujingulula bubela bwa bipwilo bivule. Inoko, bufundiji bwa mu Bible bwantulumwije, mwanda bwadi busenga kadi bwimvwanike.

Ami pa kwendelela kwifunda Bible, najingulwile amba Yehova ukwete būmi na mvubu mikatampe kadi i mwibulēmeke. (Mitōto 36:9) Kino kyaikele na lupusa pa makayo ami a kunyema lubilo​—nkyakidipo nsaka kutūla būmi bwami mu kyaka. Ino, nadi kensake kwingidija būmi bwami mwanda wa kutumbija Yehova. O mwanda, ntumbo ne nsangaji idi mu kunyema na tukutuku kebyakidipo monka na mvubu kondi.

Natenwe ku kitango kya ntanda kya Batumoni ba Yehova kyalongelwe mu Tallinn, Estoni mu 1996, kekyadipo kulampe na kiwanza kya matukutuku, pene ponadi nkaila divule. Namwene ku kino kitango bantu bavule batamba mu matanda palapala babungakene pamo mu ndudi ne mu ndoe. Kimfwa, pajimije Kamoni umo mpotomoni yandi, namwene amba kasapo kwiimona monka. Kepejije, Kamoni umo waboya’yo ne kukeijokeja pa kubulwa kintu nansha kimo kijimine’mo. Nabezemukile bininge! Najingulula amba na bubine, Batumoni baludikwanga na misoñanya ya peulu ya mu Bible. Ami ne Evija twaendelele na kifundwa kyetu, kupwa twabatyijibwa mu 1997 ne kwikala Batumoni ba Yehova.

Balunda nami bamo bafwile pa mwanda wa butomboki bwabo ne pa mwanda wa kunyema lubilo na tukutuku. Tamba ponefundile Bible, najingulwile amba ngidi na kiselwa kudi Yehova Mwine upāna būmi. Kuno kwifunda padi ko kwapandije būmi bwami.

Ami ne Evija twaikele na dyese dya kwingila myaka iná bu bengidi ba kitatyi kyonso ku musambo wa Batumoni ba Yehova wa mu Riga. Pano tudi na nsangaji ya kutamija Alise wetu mwana mwana-mukaji ne kumukwasha ansanswe Yehova. Ngidi kadi na dyese dya kwingila difuku dimo ku yenga ne yenga ku bilo ya bwalamuni, kulongolola myotoka ne bintu bikwabo byonekele. Ndi na nsangaji pa kwingidija biyampe busendwe bonefundile tamba pa bwanuke! Bine, nakipomonanga bintu ne kwibifunga monka.

Nkwete na mutyika dyese dya kusapwila bakwetu Leza umo kete wa bine pamo na kisaka kyami, ne kufwija’ko pa byonso byonefundile mu Bible. Na bubine, mulao wa paladisa pano pa ntanda washintyile būmi bwami!