Kitatyi kyonabutwilwe bambutwile bami badi kunja mu Galicia, mu bwikike bwa kungala ne kupona kwa Espanye. Ne wa buná mu bana mwanda. Twadi tusangedile būmi botwadi nabo mu kisaka. Mu kine kitatyi’kya mu Espanye mwadi kibidiji kya kutuma mwana nansha’tu umo mu kisaka, ende ku seminele nansha ku kuva. Mu kyetu kisaka mwaendele bantu basatu.

Ponabwenye myaka 13 nakalonda kaka ku kuva ya mu Madrid. Būmi bwa mu kuva bwadi bubi. Kemwadipo bulunda​—mwadi’nka bijilajila, milombelo, ne kasumalomo. Lubanga na futwi twadi twenda ku kipwilo mwanda wa kulanguluka, nansha byonkyadipo nanguluka’byo ne kulanguluka kwine. Mwenda mafuku, twadi twimba ñimbo ya kipwilo ne kulonda misa, byonso mu Kilateni. Nkyadipo ngivwana kintu nansha kimo kadi nadi mona’mba Leza wadi kulampe nami. Mafuku ami adi enda’nka na mu makayo. Nansha ke potwadi twitana na kaka wami, twadi tunena’tu’mba: “Nakwimuna Madia Utōkele.” Bamasele betupele’nka minite 30 ya kwisamba pa kupwa kudya. Bine, bino byadi bīshile kulampe na būmi bwa nsangaji bonashile mu kisaka kyetu! Nadi nemona bu ndi bunka, ndila’nka kudila.

Nansha byonadi nemona bu nkidipo pepi na Leza, natyipile mutyipo ne kwikala masele na myaka 17. Bine, nadi nonga byonadi nenwe kulonga, na pano ponka nadi ke neipangula shi bine Leza ye wauntongele kwingila uno mwingilo. Bamasele badi bavudile kunena’mba bonso batatana’ba, bakelwa mu kalunganyembo ka mudilo! Ino kutatana kwami kekwapwilepo. Nadi ndyukile’mba Yesu kadipo’tu kwa bunka bwandi kufula, ino wādi wikwete’ko na kufundija ne kukwasha bakwabo. (Mateo 4:23-25) Ponadi ke numba ku myaka 20, nkyadipo ndyukile ne kine kyonadi nakikadile bu masele. Kya kutulumukwa, mukulumpe wa bamasele waunombola’mba shi nakitatana nabya i biyampe ndeke’bo pambulwa kwija. Kala nayuka’mba utyinanga nakasoñanya bakwabo. Ye monatambile mu kuva.

 Ponajokele kwinjibo, bambutwile baingivwanije na katentekeji. Ino mu kyetu kibundi byokemwadipo kaji, ko kuvilukila mu Alemanye kwadi kushikata mwanetu. Wadi mu Bakoministe kisumpi kya beni ba mu Espanye. Napēlelwe kushikata umbukata bwa bano bantu badi balwila byepelo bya bengidi ne bwanapabo bwa bana-bakaji. O mwanda natwelele mu Bakoministe, mwenda mafuku, nasongwa na mulume wa mu kino kisumpi. Nadi nanga amba nadi ñingila mwingilo wa mvubu, mpāna mabuku a Bakoministe, ne kwikuja mu bisumpi bya batombokela lupusa.

Ino mwenda mafuku, nashilula kutyumukwa mutyima. Namwene pavule pene’mba Bakoministe bakomenwanga kulonga byobadi banena. Kuno kutatana kwaningile kitatyi kyasokele bankasampe ba mu kisumpi kyetu bilo ya Ambasade ya Espanye mu Frankfurt mu 1971. Balongele kino mwanda wa kukankaja bukondame bwa mu Espanye wa kasusu. Ino nadi ndyukile amba uno i muswelo mubi wa kulombola bulobo.

Kitatyi kyonabutwile mwana umbajinji, nalombwele wami mulume’mba nkikisapo kutanwa ku malenyo a Bakoministe. Nadi bunka, mwanda mu balunda bonadi nabo kekwailepo nansha umo kumpempula ami ne wami mwana. Nadi neipangula shi būmi budi na kitungo. Le kyadi na mvubu kulonga bukomo bwa kulumbulula bisaka bya bantu?

Mu 1976, Batumoni babidi ba mu Espanye bakokwele ku kibelo kyetu, betupa mabuku esambila pa Bible. Pobaile dikwabo, nebepangula bipangujo bitala pa masusu, mboloji ne bukondame. Natulumukile mpata pa kumona balondolola na Bible ku kipangujo kyo-kyonso! Naitabije’nka pene’pa kwifunda Bible.

Dibajinji, nadi nsaka’tu kuyuka kubapu. Ino bintu byashintyile potwashilwile na wami mulume kutanwa ku kupwila ku Njibo ya Bulopwe ya Batumoni ba Yehova. Papo twadi ke tudi na bana babidi. Batumoni betukwatakenye kadi badi betuselela bana ku kupwila. Nasenswe Batumoni kutabuka.

Ino nansha nabya, nadi nakitatana bipwilo. Nakwete butyibi bwa kwenda kukapempula kisaka kyetu mu Espanye. Tata nkasa wadi kitobo, watompele kunkankaja kwifunda Bible. Ino Batumoni ba mu kino kibundi baunkweshe bininge. Balondolwele na Bible ku bipangujo byami byonso, monka mwalongele Batumoni ba mu Alemanye. Nakwete butyibi bwa kushilula monka kifundwa kya Bible ponajokele ku Alemanye. Nansha wami mulume byapelele kwendelela kwifunda Bible, ino ami naendelele. Mu 1978, nabatyijibwa kendi Kamoni wa Yehova.

Buyuki bwa bine bwa mu Bible bwalengeje ngikale na kitungo ne kundudika mu būmi. Kimfwa, 1 Petelo 3:1-4 ukankamika bakaji, ‘bakōkele bininge’ balume babo na “bulēme bukatampe” ne kutamija “mushipiditu utalala ne mutūkanye, mwine wa bulēme bukatampe ku meso a Leza.” Ino misoñanya yaunkweshe kuvuija kiselwa kyami kya bu mukaji ne bumbutwile.

Pano kendi kintu kya myaka 35 tamba ngikala Kamoni. Nsangedile kwingidila Leza mu kisaka kya batutu ne bakaka ntanda yonso, kadi ndi na nsangaji pa kumona bana baná mu batano, nabo ke Batumoni.