KYABA kimo kunyuma, natengelwe na mutwe wa mwanda usanshija mutyima wadi mu julunale wa bene Kola unena’mba (The Chosun Ilbo). Uno julunale wipangula’mba: “‘Le Shim Cheong Muyampe,’ Kadipo Uyukile Kintu Padi Yesu—I Mwende mu Kalunga-nyembo?”

Uno mutwe wa mwanda wādi uloba tudi mukanwa, mwanda Shim Cheong i nsongwakaji muswedibwe mu mānga ya kishi kya bene Kola, wāpēne būmi bwandi mwanda wa kukwasha shandi mpofu. Bāmutumbije bininge mu bula bwa myaka mivule. Na bubine, Shim Cheong wadi umonwa mu Kola bu mwana-mukaji mwipāne uleta kimfwa kya kulondela’po.

Ku bantu bavule, mulangwe wa amba uno muntu wādi wa kupebwa mfuto mu kalunga-nyembo ka mudilo pa mwanda’tu wa kubulwa kwikala mwine Kidishitu mubatyijibwe, wādi umweka bu wa bubela ne usanshija mutyima. Ne kadi, mānga yandi yādi imonwa bu yālongekele kitatyi kilampe kumeso kwa musapu wa Kidishitu kutwela mu kyabo kibundi.

Mu kino kishinte mudi bwipangudi bwa mwendeji umo wa kipwilo. Bāmwipangwile shi bantu bāfwile pakubulwa kumona mukenga wa kwifunda myanda ya Yesu, banenwe kwenda mu kalunga-nyembo ka mudilo. Le wālondolwele namani? Wālondolwele amba: “Ketuyukilepo. Tufwatakanya’tu amba Leza ufwaninwe kwikala na Mulangwe kampanda pa [bano bantu].”

Dibuku dimo (The New Catholic Encyclopedia) dinena amba: “Lubatyijo ludi na mvubu pa kupanda. Monka mwānenene Kidishitu aye mwine amba, muntu kabwanyapo kutwela mu Bulopwe bwa Leza pakubulwa kubutulwa dipya ku mema ne ku mushipiditu sandu (Yoano 3:5).” Pa mwanda wa bino binenwa, bamo bakulupile amba boba bafwile pakubulwa kubatyijibwa i belwe mu kalunga-nyembo ka mudilo nansha kususulwa mu muswelo mukwabo pa kupwa kufwa.

Inoko, kudi bantu bakwabo bavule bamwene lukulupilo lwa uno muswelo bu lwa bituputupu. Midiyo ne midiyo ya bantu i bafwe kwakubulwa kuyuka Bible. Lelo bafwaninwe kususuka nyeke ne nyeke? Le Bible unena bika pa uno mwanda?

Bible ulombola patōkelela’mba, Leza kapelulangapo bantu beendeja pakubulwa kuyuka misoñanya yandi. Bilongwa 17:30 witukulupija amba: “Leza wasūla bitatyi bya kuno kubulwa kuyuka.” Penepa, le Bible uleta lukulupilo’ka ku boba bafwile kwakubulwa kwikala na mukenga wa kwifunda myanda ya Leza?

Tubwanya kutana malondololo mu bintu byānene Yesu kudi banonga-bibi bāfwile pamo nandi. Umo wānene Yesu amba: “Umvuluka’ko posa kutwela mu Bulopwe bobe.” Le Yesu wālondolwele namani? Wālondolwele amba: “I bine nakusapwila dyalelo dino’di amba, Ukekalanga nami mu Paladisa.”—Luka 23:39-43.

Lelo Yesu wālaile amba uno muntu wādi wa kwenda mūlu? Mhm. Uno muntu kādipo ‘mubutulwe monka’ ku mema ne ku mushipiditu, bintu bine byādi bilombelwe dibajinji pa kutwela mu Bulopwe bwa mūlu. (Yoano 3:3-6) Ino, Yesu wālaile amba uno nonga-bibi ukekala’ko monka mu Paladisa. Uno muntu byaādi Muyuda, wādi padi uyukile Paladisa ya pano pa ntanda—budimi bwa Edena—butelelwe mu mukanda mubajinji wa mu Bible. (Ngalwilo 2:8) Mulao wa Yesu wāmupele lukulupilo lwa binebine lwa kukasangulwa mu Paladisa kitatyi kyoikajokejibwa pano pa ntanda.

Na bubine, Bible i mulaye “lusangukilo lwa boloke ne bakondame bene kumo.” (Bilongwa 24:15) “Bakondame” i boba kebādipo bayukile misoñanya myoloke ya leza, mwanda kebādipo bayukile kiswa-mutyima kya Leza. Yesu ukasangula nonga-bibi ‘mukondame,’ wēsambile nandi ne midiyo ne midiyo, padi ne midiyala ya bantu bakwabo bafwile pa kubulwa kuyuka. Ebiya, mu Paladisa ya pano pa ntanda, bakafundijibwa misoñanya ya Leza ne kupebwa mukenga wa kulombola amba basenswe Leza na kukōkela ku misoñanya yandi.

Lelo kitatyi kikasangulwa bakondame, bakatyibilwa mambo mungya bilongwa byabo bya pa kala? Mhm. Loma 6:7 unena amba: “Yewa wafwa watalulwa mambo a bubi bwandi.” Mpalo ya bubi bwa bakondame i lufu. Mu uno muswelo, bakatyibilwa mambo pa byobya byobakalonga pa kupwa kusangulwa, ke pa byobyapo byobālongele pa kubulwa kuyuka kumeso kwa abo kufwa. Le bakamwena’mo namani?

Bakondame pa kupwa kusangulwa, bakekala na mukenga wa kwifunda bijila bya Leza, bine bikasokolwa kitatyi kikapūtulwa mivungo ya kyelekejo. Ebiya ke bakatyibilwa mambo “mwendele bilongwa byabo,” ko kunena’mba, shi bakakōkela ku bijila bya Leza nansha kwibikōkela mpika. (Kusokwelwa 20:12, 13) Ku bakondame bavule, dino kedikekalapo dyese dya bubidi, ino mukenga mubajinji wa binebine obakekala nao wa kukamona būmi bwa nyeke pano pa ntanda kupityila ku kwifunda ne ku kulonga kiswa-mutyima kya Leza.

Buno bufundiji bwa mu Bible bwakweshe bantu bavule bekale monka na lwitabijo mudi Leza. Yeong Sug ubadilwa mu bano bantu. Wātamijibwe bu mwine Katolika mwipāne. Bantu ba mu kyabo kisaka badi ba bitobo. Byaadi ukulupile kwikala masela, waenda mu kuva. Watamba’mo mwenda mafuku mwanda wātyumwinwe mutyima na bintu byaāmwene’mo. Ne kadi, kābwenyepo kwitabija lufundijo lwa kalunga-nyembo ka mudilo, mwanda wādi umona bu kususula bantu mu mudilo wa kalunga-nyembo i kubulwa buswe.

Ebiya, Kamoni wa Yehova umo wālombola Yeong Sug bino binenwa bya mu Bible bya amba: “Bōmi bayukile’mba bakafwa; nanshi bafwe kebayukilepo nansha kimo kine, nansha abo kukamona mpalo mpikila.” (Musapudi 9:5) Uno Kamoni wāmukwasha ayuke amba, bankambo bandi kebasusukangapo mu kalunga-nyembo ka mudilo. Ino, balele mu lufu, bakungila lusangukilo.

Yeong Sug pa kuyuka’mba, bantu bavule kebaivwene bubinebine bwa mu Bible, wata mutyima ku binenwa bya Yesu bidi mu Mateo 24:14 binena amba: “Ino myanda miyampe ya Bulopwe ikasapulwa pa ntanda yonso ikelwe na bantu mwanda wa bukamoni ku mizo yonso, ebiya mfulo keiya shayo.” Pano usapulanga myanda miyampe ne kusapwila bakwabo lukulupilo lwa kutendelwa lwa mu Bible.

Bible witusapwila amba: “Leza kadipo na mboloji, ino mu mizo yonso yewa muntu umwakaminwe ne ulonga byoloke ye witabijibwa nandi.” (Bilongwa 10:34, 35) Buno bo boloke bwa binebine botubwanya kutengela kudi Leza, mwine “uswele boloke ne kutyiba-mambo.”—Ñimbo 33:5.