I kipēla kulanga’mba Satana otutañanga mu Bible i kyelekejo’tu kya bubi bonso. Ino le ye mufundijijanga na bubine Bible? Shi i amo, mwanda waka Bible wisambila pa Satana wisamba na Yesu Kidishitu ne na Leza Mwinē Bukomo Bonso? Tubandaulei bimfwa bibidi bya ino mīsambo.

Kitatyi kyāshilwile Yesu mwingilo wandi, Dyabola wāmutompele misunsa isatu. Mubajinji, Satana wāningile Yesu engidije bukomo bwāmupele Leza mwanda wa kamweno ka aye mwine mwanda wa kupwa nzala yandi. Kadi, Dyabola wānene Yesu atūle bya bitupu būmi bwandi mu kyaka mwanda wa kwimwekeja. Ku mfulo, Satana wāmulaya kumupa Yesu malopwe onso a pano pa ntanda mwanda’tu wa kakilongwa katyetye ka butōtyi. Yesu wākomene matompo onso asatu a bunwanwa na kutela Bisonekwa ku ditompo ne ditompo.—Mateo 4:1-11; Luka 4:1-13.

Lelo Yesu wādi wisamba na ani? Lelo i na ngikadilo ya bubi yādi munda mwandi? Mungya Bisonekwa, Yesu “watompelwe mu byonso pamo bwa batwe, ino kwampikwa bubi.” (Bahebelu 4:15) Kadi Bible unena amba: “Kalongelepo bubi, nansha bongojani kutanwa mu kyakanwa kyandi mpika.” (1 Petelo 2:22) Yesu wāshele nyeke mubwaninine, ulamete ku bululame bwandi. Kālekelepo kabubi nansha kamo katame mwadi. Na bubine, Yesu kēsambilepo na ngikadilo kampanda mibi ya munda mwandi; ino wādi wisamba na muntu udi’ko bine.

Ino mīsambo ilombola bukamoni bukwabo bwa amba Satana i muntu udi’ko bine.

• Vuluka’mba Dyabola wālaile kupa Yesu bulopwe bwa ntanda yonso shi Yesu walonga kilongwa kimo kya kumutōta. (Mateo 4:8, 9) Shi Satana wadi’mba kadi’kopo, longa kuno kulaibwa bulopwe kekudipo na buluji. Longa kadi, Yesu kādipo wa kupelela Satana wikimbila bukata.

• Yesu pa kupwa kukomena matompo, Dyabola “wamutaluka’po kufika ne pa kitatyi kikwabo kifwaninwe.” (Luka 4:13) Lelo pano ulanga Satana i ngikadilo’tu ya bubi’ni nansha i walwana wa kōminija kakōka?

• Yuka’mba kepāijije “bamwikeulu baiya bashilula kumwingidila” Yesu. (Mateo 4:11) Lelo bano bamwikeulu i bantu ba ku mushipiditu bāile kukankamika Yesu ne kumukwasha? I amo. Ne shi i amo, le penepo tubwanya kunena namani amba Satana ke muntupo wa ku mushipiditu ino i kintu bitupu?

Kimfwa kya bubidi i kitala Yoba muntu wādi wakaminwe Leza. Ino nsekununi ilombola mīsambo ya Dyabola na Leza. Dyonso dibidi dyōbesambile, Leza wātendele Yoba pa bululame bwandi. Satana wānene’mba Yoba wingidilanga Leza pa mwanda wa kamweno kandi, kadi amba Leza i mupote bululame bwa Yoba. Na bubine, Dyabola wādi wianya’mba umuyukile Yoba kupita mumuyukidile Leza. Yehova wālekele Satana amujimijije Yoba bintu byaādi nabyo, bandi bana, enka ne bukomo bwa ngitu bwine. * Mwenda mafuku, byāmwekele’mba Yehova wādi na bubinga padi Yoba, ne Satana wābepele. Leza wāesele Yoba pa mwanda wa bululame bwandi.—Yoba 1:6-12; 2:1-7.

Le mu ino mīsambo ya ba Leza ne Satana, Yehova wādi wisamba na ngikadilo imo ya bubi yādi mwadi? Bible unena amba: “Dishinda [dya Leza wa bine] i dilumbuluke she-e.” (2 Samwele 22:31) Kinenwa kya Leza kinena monka amba: “Ujila, ujila, ujila i Yehova Leza, Mwinē Bukomo Bonso.” (Kusokwelwa 4:8) Ujila kishintulula utōka, ukola, mupaluke ku bubi. Yehova i mubwaninine kadi i wa kubulwa kakoba. I kutupu ka bubi nansha kamo kadi mwadi.

Inoko, bantu bamo babwanya kunena’mba, aa, ne Yoba mwine kādi’kopo ne mīsambo’yo i ya kufwatakanya bitupu. Ino, le kulanga namino i kwendele’mo? Bilembwa bikwabo bya mu Bible binena’mba Yoba wādi’ko binebine. Kimfwa, mu Yakoba 5:7-11, Yoba i mutelwe bu kimfwa ku bene Kidishitu kya kūminina mu bitatyi bikomo kadi ne kwitusenga pa kuyuka’mba Yehova upalanga mpalo boba bōminina. Shi Yoba kādi’kopo ne shi kutambwa na Satana kwādi kwa kufwatakanya bitupu, nabya kino kimfwa kyadi kya kwikala kya bubela! Kadi, mu Ezekyele 14:14, 20, Yoba i mutelwe pamo na ba Noa ne Danyele mu bana-balume basatu boloke. Pamo bwa ba Noa ne Danyele, Yoba wādi’ko na bubine, bu muntu wa lwitabijo lukomo. Shi Yoba wādi’ko bine, lelo yewa wāmutambile, nsulo ya kupangwapangwa kwandi abulwe kwikala wa bine nandi?

Na bubine, Bible utela Satana bu muntu udi’ko bine wa ku mushipiditu. Padi ye uno ubeipangula’mba, ‘lelo uletanga kyaka kondi ne ku kisaka kyami mu ino ntanda ya dyalelo?’

Langa’po bidi shi abatume mu kitulumukila kibumbo kya bantapani mu kyenu kibundi. Ubayuka kala’mba mutyima-ntenke ne mwikadilo wa bantu bisa kuvutakana. Tala pano mwanda wiifwene na uno: Satana ne bandi bandemona—bantu badi’ko bine ba ku mushipiditu, pamo bwa Satana, wātombokele Leza—baelelwe mu kitulumukila pano panshi. Le i bipa’ka byalupukile’ko? Bine, langulukila pa byoimvwana kwenu ne kukwabo ntanda yonso.

• Le umwene kwilundila’ko kwa bilongwa bya butapani, nansha bilongwa bukomo ntanda yonso bwa kwimika’byo?

• Le umwene kwilundila’ko kwa kwipwija mukose kulombola bintu bya majende nansha bambutwile byo kebebisenswepo?

• Le umwene mwenda monekela bintu bitujokolokele nansha byo kulongwa bukomo bwa kwibilama?

• Le bimweka’mba kudi kintu kekyendekapo mu bantu—bukomo kampanda butonwena bantu ku musala?

Tukulomba utale mwine utelelwe na Bible amba, ye kalenga-byanzwe mwine wa kavutakanya kadi’ko dyalelo, tutanga’mba: “Ebiya mpumina mukatampe’wa waelwa panshi, nyoka wa kala na kala, yewa witwa bu Dyabola ne bu Satana, mwine ongolanga ntanda yonso ikelwe na bantu; waelwa pano pa ntanda, ne bamwikeulu bandi bene baelwa panshi pamo nandi. . . . Malwa obe ntanda ne abe dijiba, mwanda Dyabola watūkila pomudi, udi na bulobo bukatampe, pa kuyuka’mba udi na kakitatyi katyetye.” (Kusokwelwa 12:9, 12) Pa kupwa kubandaula buno bukamoni, bantu bavule i bafule ku kunena’mba Satana i muntu wa ku mushipiditu uleta kyaka, mwine utonona bintu bilongeka pano pa ntanda.

Ye uno ubeipangula mwa kwilamina. Kyakyo i kipangujo kyendele’mo. Kishinte kilonda’ko kisa kuleta’po madingi mafwaninwe.