MUTWE WA MWANDA WA PA KIBALU | NOBE UBWANYA KWIVWANIJA BIBLE
Mwanda Waka Twivwanije Bible?
“Bible i dibuku dya bipwilo. Inoko i dibuku dyeni ne kadi kedidipo na mvubu ku bantu ba mu Shine.”—LIN, SHINE.
“Nkyadipo ngivwanija mabuku ajila a mu mutōtelo wami wa Kihindu. Penepa i muswelo’ka onkokeja kwivwanija Bible Ujila?”—AMIT, INDIA.
“Ndemēkele Bible bu dibuku dya kala kadi naivwene banena’mba dipotwanga na lupoto luyampe. Inoko kashā nkyaikele na Bible.”—YUMIKO, JAMPANI.
Bantu bavule pano pa ntanda ponso bakwete Bible na mutyika mukatampe. Inoko bayukile’tu myanda mityetye mu Bible, pakwabo ne kwiiyuka mpika. Ye mokikadile ku bantu bavule bashikatanga mu Azia, ne boba bashikete mu matanda muvudile Bible mwine.
Ino, wiipangule amba, ‘Mwanda waka mfwaninwe kwivwanija Bible?’ Kwivwanija buluji bwa dino dibuku dijila kukokeja kukukwasha:
-
Uloelelwe ne kutana nsangaji
-
Unekenye makambakano a mu kisaka
-
Unekenye kuzumbija mutyima
-
Ulumbulule kipwano kyobe na bantu
-
Wingidije na tunangu lupeto lobe
Tala kimfwa, Yoshiko, wa mu Jampani. Wadi ukimba kuyuka bine binena Bible kupwa wakwata butyibi bwa kutanga’ye. Byaikala namani? Aye’mba “Bible waunkweshe ngikale na kitungo mu būmi ne kwikala na lukulupilo lwa mu mafuku a kumeso,” kupwa wabweja’ko amba: “Nkikimonengapo bu muntu kadi kyayukile.” Amit, utelelwe kūlu’ku wakwete butyibi bwa kwifunda Bible aye mwine. Unena amba: “Natulumukile. Nanshi mu Bible mudi myanda ya kamweno itala muntu ye-yense.”
Bible udi na lupusa lukatampe pa midiyo ne midiyo ya bantu. Ubulwe’po nobe kwifunda’ye ne kumona muswelo wakokeja kukukwasha?
