MUTWE WA MWANDA WA PA KIBALU | MWA KUMWENA BININGE MU BUTANGI BWA BIBLE
I Bika Bikalengeja Nsangele Butangi?
Lelo butangi bwa Bible budi namani kodi? Le bukupungijanga’ni nansha bukusangajanga? Byonso bilondakananga na muswelo otanga. Tala byokokeja kulonga pa kusaka’mba usangele mpata byotanga’bya.
Tonga bwalamuni bwa Bible bukulupilwa, kadi bwa muneneno wa dyalelo. Shi utanga myanda mudi bishima bivule bikomo nansha bya kala byokuyukilepo, kukasangelapo kwiitanga. O mwanda kimba Bible udi na muneneno upēla kwivwana mwine ukatenga obe mutyima. Bufwaninwe kwikala bwalamuni bwa bine kadi bukwatañane. *
Ingidija bya busendwe bya panopano. Dyalelo Bible kakidipo’nka bu dibuku ditampwe kete, ino ubwanya kutangilwa ne mu mashini. Mabible amo abwanya kutangilwa pa Entelenete nansha kwitentwila’o mu maolodinatele, matabulete nansha mu matelefone. Malamuni amo adi na myanda ya ntentekelo ikakupēleleja kukimba mavese makwabo esambila pa mwanda umo nansha kudingakanya malamuni palapala. Shi usaka kwivwana Bible mutange kala, nandi udi’po mu bupunga palapala. Bantu bavule balondanga butangi pobadi mu lwendo, pobafula bisandi nansha pobengila mingilo mikwabo ibapa muswelo wa kwivwana koku abo bengila. Ubulwe’po kwingidija manwa akwendekela?
Ingidija bingidilwa bya kwifunda nabyo Bible. Bingidilwa bya kwifunda nabyo Bible bikakukwasha umwene ne pa mfulo mu butangi bobe. Mudi tulata tulombola matanda atelelwe mu Bible, twine tukakukwasha uyuke bifuko byotana mu butangi bobe ne kumona mukwatañenine bintu. Kimfwa bishinte bya mu dino dipepala nansha byobya bidi mu kipindi “Bible ne Abe” pa diteba dya jw.org, bikakukwasha uyuke nshintulwilo ya bipindi bivule bya mu Bible.
Shinta manwa. Shi umona’mba kutanga Bible yense kupungijana, le wabulwa’po kutamija kusangela kobe na kushilula kutanga kipindi kikusangajanga bininge? Shi usaka kuyuka myanda ya bantu batumbe batelelwe mu Bible, kimba bidi mwine utelelwe mu byotanga’bya. Ano manwa apela adi mu kapango, “ Kola mu Bible pa Kuyuka Bantu Batelelwe’mo.” Padi kadi usakanga kutanga Bible tamba ku ngalwilo kutūla ne ku mfulo, nansha kutanga’ye mungya mwilondela binkumenkume. Le wabulwa’po kutompa’ko amo?
^ mus. 4 Bantu bavule i bamone amba Bisonekwa Bijila—Bushintuludi bwa Ntanda Mipya i bwalamuni bwa bine, bukulupilwa kadi bupēla kutanga. Uno Bible, ulupwilwe na Batumoni ba Yehova, udi’ko mu ndimi 130 ne kupita. Ubwanya kutentula’ye pa diteba dya jw.org nansha kutentula JW Library app. Kadi shi usaka, Batumoni ba Yehova babwanya kukuletela’ye kobe.
