“Nunku, nudipuekeshe muinshi mua tshianza tshia bukole tshia Nzambi, bua anubandishe mu tshikondo tshikumbane, panudi eku numupuila ntatu yenu yonso, bualu yeye udi unutabalela.”​—1 Petelo 5:6, 7, Nkudimuinu wa bulongolodi bupiabupia.

 “Nunku nudihuekeshe kunshi kua tshianza tshikole tshia Nzambi, bua yeye anubandishe mu tshikondo tshiasunguleye; nuteke ntatu yenu yonso kudiye, bualu bua yeye udi unulubulula.”​—1 Petelo 5:6, 7, Mukanda wa Nzambi.

 Petelo udi ujadikila bena Kristo ne mêyi aa ne: badi mua kukuatshila Nzambi ntatu yabu ne malu adi mabatonde mu disambila ne dishindika dionso. Nzambi utu wanyisha bena budipuekeshi, ne neabafute bia bungi.

 “Nudipuekeshe muinshi mua tshianza tshia bukole tshia Nzambi.” Mu Bible, tshianza tshia Nzambi tshitu tshitamba kuleja bukole buende bua kupandisha bantu bende ne kubakuba. (Ekesode 3:19; Dutelonome 26:8; Ezela 8:22) Bena Kristo badi badipuekesha muinshi mua tshianza tshia Nzambi padibu bamueyemena. Mbamanye mikalu yabu, mbamanye kabidi ne: kabena mua kutshimuna ntatu bobu nkayabu to. (Nsumuinu 3:5, 6; Filipoyi 4:13) Mbatuishibue ne: Nzambi udi ne bukole bua kubambuluisha mu tshikondo tshikumbane ne mu mushindu muimpe menemene.​—Yeshaya 41:10.

 “Bua anubandishe mu tshikondo tshikumbane.” Bantu badi bananukila mu ntatu ne lutulu luonso mbatuishibue ne: Nzambi neababandishe ndekelu wa bionso, mmumue ne: neabafute. Kakulekela batendeledi bende bua batetshibue kashidi ne tshiendelele anyi batetshibue ne diteta didibu kabayi mua kutantamena to. (1 Kolinto 10:13) Kadi bobu batungunuke ne kuenza malu mimpe, Nzambi neabafute bushuwa “mu tshikondo tshiakane.”​—Galatiya 6:9.

 “Panudi eku numupuila ntatu yenu yonso, bualu yeye udi unutabalela.” Bena Kristo badi mua kupuila Nzambi ntatu yabu yonso, anyi kuyiteka kudiye padibu bamulomba mu disambila. Mukanda mukuabu udi uleja ne: “Muaku wa pa muanda kupuila udi upatula lungenyi lua kudienzeja bua kumbusha tshintu kampanda kutudi. Udi umvuija tshintu tshidi muntu wenza ku bukole.” Diakamue padi muena Kristo upuila Nzambi ntatu yende, udi mua kukepesha kanyinganyinga kende ne kupeta tshidi Bible ubikila ne: “ditalala dia Nzambi.” (Filipoyi 4:6, 7) Ikala mutuishibue ne: Nzambi mmusue kumuambuluisha bualu mmumanye ne: Nzambi udi umutabalela ne udi mua kuenza malu ne bukole buende bua bungi bua kumukuatshisha.​—Misambu 37:5; 55:22.

 Nshapita 5 ke udi ujikija mukanda wa kumpala uvua mupostolo Petelo mufundile bena Kristo. (1 Petelo 1:1) Pashishe bayidi ba Kristo bakatuilangana ne mateta mashilashilangane avua mateke ditabuja diabu mu diteta ne mabakebele kanyinganyinga anu bu lelu kabidi. (1 Petelo 1:6, 7) Bu muvua Petelo mumanye ntatu yabu, wakabafundila mukanda muimpe bua kubakankamija bu mu 62-64 P.Y.​—1 Petelo 5:12.

 Petelo udi ujikija mukanda wende ne divuluija dia kukankamija nadi bena Kristo badi batuilangana ne ntatu bua ditabuja diabu. Bobu badipuekesha ne beyemena Nzambi, bikale batuishibue ne: Nzambi neabambuluishe bua bashale bashindame. (1 Petelo 5:12) Mêyi a Petelo adi mua kukankamija kabidi bena Kristo badibu bakengesha lelu.

 Tangila filme muîpi eu bua kumona kadiosha ka mukanda wa 1 Petelo.