“Nusanke mu ditekemena. Nunanukile mu makenga. Nusuminyine mu disambila.”​—Lomo 12:12, Nkudimuinu wa bulongolodi bupiabupia.

 “Nusanke ne ditekemena, nuikale ne lutulu mu makenga, nunanukile mu disambila.”​—Lomo 12:12, Mukanda wa Mvidi Mukulu (Katolike).

 Mu mvese au mupostolo Paulo wakakankamija bena Kristo ba ku Lomo bua kuenza malu asatu avua mua kubambuluisha bua kushala ne lulamatu nansha pavuabu babakengesha anyi batuilangana ne ntatu mikuabu.

 “Nusanke mu ditekemena.” Bena Kristo badi ne ditekemena dimpe dia muoyo wa kashidi; bamue mu diulu, bakuabu mu Mparadizu pa buloba. (Misambu 37:29; Yone 3:16; Buakabuluibua 14:1-4; 21:3, 4) Badi ne ditekemena dia kumona muajikija Bukalenge a bua Nzambi ntatu yonso idi ikengeshisha bantu. (Danyele 2:44; Matayi 6:10) Batendeledi ba Nzambi badi mua kuikala ne disanka nansha bobu batuilangane ne ntatu bualu mbatuishibue ne: ditekemena diabu ndia bushuwa ne Nzambi udi ubanyisha bua dinanukila diabu.​—Matayi 5:11, 12; Lomo 5:3-5.

 “Nunanukile mu makenga.” Mu Bible, muaku wa mu tshiena Greke udibu bakudimune ne: “dinanukula” udi umvuija “kuimana pamutu pa kunyema; kusuminyina; kuikala mushindame.” Bayidi ba Kristo ‘kabena ba pa buloba,’ b nunku mbamanye ne: nebabakengeshe, ke bualu kayi badi dijinga ne dinanukila. (Yone 15:18-20 ; 2 Timote 3:12) Padi muena Kristo wenzela Nzambi mudimu nansha wowu umutuadila makenga, udi ukolesha ditabuja diende dia ne: ndekelu wa bionso Nzambi neamufute. (Matayi 24:13) Ditabuja diende dikole adi didi dimuambuluisha bua kunanukila mu makenga ne lutulu ne disanka.​—Kolosayi 1:11.

 “Nusuminyine mu disambila.” Batu batamba kukankamija bena Kristo bua kusambila misangu yonso bua kushala ne lulamatu kudi Nzambi. (Luka 11:9; 18:1) Badi bakeba misangu yonso bulombodi bua Nzambi ne badi bamueyemena mu malu onso. (Kolosayi 4:2; 1 Tesalonike 5:17) Mbajadike ne: Nzambi neandamune masambila abu bualu badi batumikila mikenji yende ne benza muabu muonso bua kumusankisha. (1 Yone 3:22; 5:14) Mbamanye kabidi ne: bobu basuminyine mu disambila, Nzambi neabapeshe bukole budibu nabu dijinga bua kushala ne lulamatu mu ntatu yonso.​—Filipoyi 4:13.

 Paulo wakafundila bena Kristo bavua mu Lomo mukanda bu mu tshidimu tshia 56 P.Y. Mu nshapita wa 12 wa mukanda au, wakafila mibelu mimpe ya mua kuleja ngikadilu ya buena Kristo, mua kusomba ne bena kuitabuja nabu ne bantu bakuabu, kabidi ne mua kuikala mu ditalala padibu babakengesha. (Lomo 12:9-21) Mibelu ayi yakafika pa dîba diayi bualu matuku makese pashishe bakakengesha bena Kristo ba ku Lomo bikole.

 Bidimu bikese pashishe, mu tshidimu tshia 64 P.Y., bintu biakoshika bikole mu Lomo. Bantu ba bungi bakamba ne: mukalenge Néron ke uvua mukebeshe kapia aku. Tacite mumanyi wa malu a kale a bena Lomo wakalonda ne: Néron wakakeba kudikuba pa kuela bena Kristo tshilumbu pambidi. Ke kubangabu kubakengesha bikole. Mibelu ivua Paulo mufile bua kunanukila dikengeshibua yakabambuluisha bua kutua tshikondo tshikole atshi tshiadi ne ditabuja ne bunême. (1 Tesalonike 5:15; 1 Petelo 3:9) Badi tshilejilu tshimpe bua batendeledi ba Nzambi lelu.

 Tangila filme muîpi eu bua kumona kadiosha ka mukanda wa Lomo.