“Mbikila, nenkuandamune ne nenkuambile diakamue malu manene ne adi makole bua kumvua audi kuyi mumanye.”—Yelemiya 33:3, Nkudimuinu wa Bulongolodi bupiabupia.

 “Umbikile, nengitabe kûdi, nenkulesha malu a kukema ne malu makole audi kuyi mumanye.”—Yelemiya 33:3, Mukanda wa Nzambi.

 Mêyi aa adi aleja mudi Nzambi ubikila bukua bantu bua kumusambila. Bantu badi bumvua dibikila dia Nzambi edi bobu baditabe ne bamusambile, neabambile malu enzeka kumpala eku.

 “Mbikila, nenkuandamune.” Tshiambilu tshia ne: “mbikila” katshiena tshiumvuija kubikila dîna dia Nzambi patupu to. Kadi kubikila Nzambi muaba eu kudi kumvuija kukeba diambuluisha diende ne buludiki buende mu disambila.—Misambu 4:1; Yelemiya 29:12.

 Tshisamba tshia Isalele wa kale ke tshivuabu mua kuikala babikile mushindu eu. Bena Isalele bavua bele Yehowa nyima ne bavua bababunde kudi tshiluilu tshia bena Babilona. (Yelemiya 32:1, 2) Yehowa a wakambila bena Isalele bua bapingane kudiye mu disambila.

 “Nenkuambile . . . malu manene ne adi makole bua kumvua audi kuyi mumanye.” Malu adi Nzambi ulaya bua kutuambila ‘mmakole bua kumvua’ mu ngumvuilu wa ne: bantu kabena mua kufika ku diamanya bobu nkayabu to. Tshiambilu tshia ne: “malu manene ne adi makole bua kumvua” tshidi mua kumvuija kabidi “malu masokome.”

 ‘Mmalu kayi masokeme’ avua Nzambi ne bua kusokolola? Mmalu avua ne bua kuenzeka, bu mudi dibutuka dia tshimenga tshia Yelushalema wa kale, dishala diatshi munda mutupu, ne muvuabu ne bua kutshibakulula pashishe. (Yelemiya 30:1-3; 33:4, 7, 8) Kadi Nzambi uvua mulaya kabidi ne: tshisamba tshia batendeledi bende katshivua ne bua kujimina to.—Yelemiya 32:36-38.

 Muprofete Yelemiya wakapeta mukenji wa kudi Yehowa eu mu 608 K.Y., mu tshidimu tshia 10 tshia bukokeshi bua mukalenge Sedekiya. Yelemiya ukavua mamanyishe ne: Yelushalema uvua ne bua kukuluka ne bavua ne bua kuya ne Sedekiya mu bupika. Kadi bu muvua Sedekiya kayi munange mukenji au, wakelesha Yelemiya mu buloko.—Yelemiya 32:1-5; 33:1; 37:21.

 Malu onso aa ke avua mafikishe Nzambi ku dibikila bantu bende ne mêyi adi mu Yelemiya 33:3. Bia dibungama, mukalenge Sedekiya ne bena Isalele bakuabu ba bungi bakabenga dibikila dia Yehowa bua butomboji buabu. (Yelemiya 7:26; 25:4) Kabavua basambile bua kukeba buludiki kudi Nzambi to. Panyima pa tshidimu tshijima, Sedekiya wakajimija bukole buvuaye nabu, kubutulabu Yelushalema, ne bantu ba bungi bavua bapanduke bakaya nabu mu bupika mu Babilona.—Yelemiya 39:1-7.

 Mêyi adi mu Yelemiya 33:3 adi avuluija babadi ba Bible lelu ne: Nzambi udi mua kupesha bantu badi bamusambila ne balonga Bible Dîyi diende “dimanya dijalame dia disua diende,” ne kubasokoluela “malu male.” (Kolosayi 1:9; 1 Kolinto 2:10) Malu male aa adi akongoloja malu adi Nzambi mulaye bua kuenza mu matuku makese kumpala eku.—Buakabuluibua 21:3, 4.

 Tangila filme muîpi eu bua kumona kadiosha ka mukanda wa Yelemiya.