Eyowa, Diabolo utuku menemene. Yeye ke “mukokeshi wa buloba ebu.” Ntshifukibua tshia mu nyuma tshiakadifila ku malu mabi, e kutombokelatshi Nzambi. (Yone 14:30; Efeso 6:11, 12). Bua kumvuija tshidi Diabolo, Bible udi umubikila ne:

•   Satana, mmumue ne: “Muluishi.”​—Yobo 1:6.

•   Diabolo, mmumue ne: “Mushiminyinyangany wa malu.”​—Buakabuluibua 12:9.

•   Nyoka, tuambe ne: etshi ntshibikidilu tshia mu Bible tshidi tshiumvuija ‘Mudingianganyi.’​—2 Kolinto 11:3.

•   Mutetshianganyi.​—Matayi 4:3.

•   Muena dishima.​—Yone 8:44.

Diabolo ki mbubi anyi lungenyi lua bubi munda mua muntu to

 Bamue batu bamona Diabolo bu bubi, nansha bu lungenyi anyi tshikadilu tshia bubi tshidi munda muetu. Kadi Bible udi wakula bua muyuki wakayukila Nzambi ne Satana. Nzambi mmuimpe mupuangane, nanku kavua mua kuikala uyukila ne tshitupa kampanda tshia munda muende tshivua mua kuikala ne bubi to. (Dutelonome 32:4) Bia muomumue, Satana wakateta Yezu udi kayi ne bubi munda muende to. (Matayi 4:8-10; 1 Yone 3:5) Mushindu au ngudi Bible uleja ne: Diabolo mmuntu udiku, ki mbubi patupu buvuija bu muntu to.

 Mbualu bua kukema bua mudi ba bungi kabayi bitaba ne: Diabolo mmuntu udiku menemene anyi? Tòo, bualu Bible udi uleja ne: Satana utu udingangana bua kukumbaja bipatshila biende. (2 Tesalonike 2:9, 10) Mayele ende makuabu atuye utamba kudingangana nawu nga kufofomija ba bungi bua kabajinguludi ne: utuku to.​—2 Kolinto 4:4.

  Mudi bamue babuejakaja: Lusifere ndîna dikuabu dia Diabolo.

 Bulelela bua bualu: Muaku wa mu tshiena Ebelu udibu bakudimune mu Bible mikuabu ne: “Lusifere” udi umvuija ne: “wewe udi ukenka.” (Yeshaya 14:12) Malu a mu mvese idi kuulu ne kuinshi kua mvese eu adi aleja ne: tshibikidilu atshi tshivua tshitangila bumfumu bua tshiota bua bena Babilona anyi mulongolongo wa bakalenge ba mu Babilona uvua Nzambi ne bua kufuisha bundu bua diambu diende. (Yeshaya 14:4, 13-20) Tshiambilu tshia ne: “wewe udi ukenka,” bavua batshitela bua kuseka bumfumu bua tshiota bua bena Babilona panyima pa dikuluka diabu.

  Mudi bamue babuejakaja: Satana udi wenzela Nzambi mudimu wa “bunzuji.”

 Bulelela bua bualu: Diabolo mmuluishi wa Nzambi, ki mmuena mudimu wende nansha. Satana Diabolo udi uluisha badi benzela Nzambi mudimu ne ubabanda ne malu a mashimi.​—1 Petelo 5:8; Buakabuluibua 12:10.