Nzambi udi ne mêna bungi kayi?

TELEJA MU

Diandamuna dia mu Bible

Nzambi utu ne dîna anu dimue. Mu tshiena Ebelu batu badifunda nunku: יהוה; mu Tshiluba batu badifunda ne: “Yehowa.” * Nzambi wakamba mukana mua muprofete Yeshaya ne: “Meme ndi Yehowa. Adi ndîna dianyi.” (Yeshaya 42:8) Dîna edi didi mu mivungu ya kale ivuabu bafundile Bible misangu mitue ku 7 000; bungi bupite bua mianzu mikuabu itubu babikila Nzambi, anyi bupite bua dîna dikuabu dionso. *

Yehowa utu ne mêna makuabu anyi?

Nansha mudi Bible ubikila Nzambi mu dîna anu dimue, utu umubikila kabidi mu mianzu ne mu biambilu bia bungi bidi bileja tshidiye. Mbaleje bimue bia kudibi kuinshi eku; ne tshionso tshia kudibi tshidi tshileja tshibadi kampanda tshia bumuntu bua Yehowa.

Muanzu	Mvese wa mu Bible	Diumvuija
Allah	(Kakuena mvese)	“Allah” mmuaku wa mu tshiena Arabe. Ki ndîna dia Nzambi to, kadi mmuanzu udi umvuija ne: “Nzambi.” Nkudimuinu ya Bible ya tshiena Arabe ne miakulu mikuabu mmikudimune muaku “Nzambi” ne: “Allah.”
Wa Bukole Buonso	Genese 17:1	Udi ne bukole kabuyi kutua tshiadi. Tshiambilu tshia mu tshiena Ebelu tshia El Shaddai, “Nzambi Wa Bukole Buonso,” tshidi mu Bible misangu muanda mutekete.
Alfa ne Omega	Buakabuluibua 1:8; 21:6; 22:13	“Wa kumpala ne wa ndekelu” anyi “ntuadijilu ne ndekelu,” mmumue ne: kakuvua Nzambi Wa Bukole Buonso mukuabu kumpala kua Yehowa ne kakuakuikala mukuabu panyima pende to. (Yeshaya 43:10) Alfa ndileta dia kumpala, ne Omega ndileta dia ndekelu mu maleta a mu tshiena Greke.
Wa Kale wa Matuku a Bungi	Danyele 7:9, 13, 22	Kena ne tshibangidilu to; yeye ukavuaku katshia ku bikondo bia tshiendelele kumpala kua muntu mukuabu anyi tshintu tshikuabu kuikalaku.—Misambu 90:2.
Mufuki	Yeshaya 40:28	Yeye ke wakafuka bintu bionso.
Tatu	Matayi 6:9	Yeye ke udi mutupeshe muoyo.
Nzambi	Genese 1:1	Wa kutendelela; Wa bukole. Muaku wa mu tshiena Ebelu wa Elohim udi ku bungi, uleja bunene bua Yehowa, ne bunême, ne buimpe buende.
Nzambi wa banzambi	Dutelonome 10:17	Nzambi udi mupite nzambi mikuabu, mushingane ne “nzambi ya patupu” udi bamue bantu batendelela.—Yeshaya 2:8.
Mulongeshi Munene	Yeshaya 30:20, 21	Udi utulongesha ne utuludika bua diakalenga dietu.—Yeshaya 48:17, 18.
Mufuki Munene	Misambu 149:2	Yeye ke udi mufuke bintu bionso.—Buakabuluibua 4:11.
Nzambi wa disanka	1 Timote 1:11	Utu ne disanka dia bungi.—Misambu 104:31.
Muteleji wa disambila	Misambu 65:2	Utu uteleja disambila didi muntu yonso wenza ne ditabuja.
Meme ndi mundi	Ekesode 3:14, Mukanda wa Nzambi	Udi ulua tshionso tshidi tshikengedibua bua kukumbaja bualu budiye mulongolole. Mbakudimune kabidi tshiambilu etshi ne: “Nendue tshindi nsungula bua kulua.” (Bible—Nkudimuinu wa bulongolodi bupiabupia) Tshiambilu etshi tshidi tshiambuluisha bua kumvua tshidi dîna dia Nzambi, Yehowa, didi mu mvese udi ulonda diumvuija.—Ekesode 3:15.
Nzambi wa mukawu	Ekesode 34:14, Mukanda wa Nzambi	Katu musue bua bamutendelele pamue ne nzambi mukuabu to. Mbakudimune kabidi tshiambilu etshi ne: “Kutendeledi nzambi mukuabu nansha,” ne “mmumanyike bua mudiye ulomba bua bamulamate anu yeye.”—Bible—Nkudimuinu wa bulongolodi bupiabupia.
Mukalenge wa tshiendelele	Buakabuluibua 15:3	Bukokeshi buende kabuena ne mbangilu ne kabuena ne ndekelu to.
Mukalenge	Misambu 135:5	Muenabi anyi mfumu. Bidi bipetangana ne muaku wa mu tshiena Ebelu wa Adhohn ne wa Adhonim.
Mukalenge wa misumba	Lomo 9:29, Mukanda wa Nzambi	Mulombodi wa biluilu binene bia banjelu. Badi mua kukudimuna kabidi muanzu wa “Mukalenge wa misumba” ne: “Yehowa wa biluilu.”—Lomo 9:29, Bible—Nkudimuinu wa bulongolodi bupiabupia.
Mutambe Bunene	Misambu 47:2	Yeye udi ku mutu kua bionso.
Mutambe Tshijila	Nsumuinu 9:10	Kena ne mukenende ku dikala wa tshijila (udi ne mankenda ne mukezuke mu bienzedi).
Mufumbi	Yeshaya 64:8	Udi ne bukokeshi kudi bantu ne kudi bisamba, anu mudi mufumbi ne bukokeshi kudi diima.—Lomo 9:20, 21.
Mupikudi	Yeshaya 41:14	Udi upikula anyi ukuula bukua bantu ku mpekatu ne ku lufu ku diambuluisha dia mulambu wa Yezu Kristo udi upikulangana.—Yone 3:16.
Dibue	Misambu 18:2, 46	Muaba wa kunyemena mushindame ne wa kupetela lupandu.
Mupandishi	Yeshaya 45:21	Udi upandishangana ku njiwu ne ku kabutu.
Mulami	Misambu 23:1	Utu utabalela batendeledi bende.
Mukalenge Mutambe Bunene	Genese 15:2	Udi ne bukokeshi ku mutu kua bionso. Adhonai mu tshiena Ebelu.
Udi ku Mutu kua Bionso	Danyele 7:18, 27	Yeye udi ku mutu kua batambe bunene bonso.

Mêna a miaba mu Mifundu ya tshiena Ebelu

Amue mêna a miaba adibu batele mu Bible adi ne dîna dia Nzambi, kadi ki mmêna makuabu a Nzambi to.

Dîna dia muaba	Mvese wa mu Bible	Diumvuija
Yehowa-yile	Genese 22:13, 14	“Yehowa neafile tshidi tshikengedibua.”
Yehowa-nisi	Ekesode 17:15	“Yehowa udi dikunji dianyi dia tshimanyinu.” Yehowa nNzambi udi bantu bende badisangisha kudiye bua abakube ne abambuluishe.—Ekesode 17:13-16.
Yehowa-shaloma	Balumbuluishi 6:23, 24	“Yehowa udi ditalala.”
Yehowa-shama	Yehezekele 48:35, dimanyisha dia kuinshi kua dibeji mu Bible wa American Standard Version	“Yehowa Udimu.”

Tshitudi ne bua kumanyina dîna dia Nzambi ne kuditela

Nzambi udi ne bua kuangata dîna diende ne mushinga, bualu mmudifundishe mu Bible misangu binunu ne binunu.—Malaki 1:11.
Yezu Muana wa Nzambi uvua uleja mushinga udi nawu dîna dia Nzambi misangu ne misangu. Tshilejilu, wakasambila Yehowa ne: “Dîna diebe dijidibue.”—Matayi 6:9; Yone 17:6.
Bantu badi bafika ku dimanya dîna dia Nzambi ne baditela badi benza malu a kumpala adi abambuluisha bua kudia bulunda ne Yehowa. (Misambu 9:10; Malaki 3:16) Bulunda bua nunku budi bubambuluisha bua mulayi wa Nzambi eu ubakumbanyine: “Bu mudiye munnange, meme nemmusungile. Nemmulame bualu mmumanye dîna dianyi.”—Misambu 91:14.
Bible udi wamba ne: “Kudi bidibu babikila nzambi, nansha mu diulu anyi pa buloba, anu bu mudiku ‘nzambi’ ya bungi ne ‘bakalenge’ ba bungi.” (1 Kolinto 8:5, 6) Kadi udi usunguluja Nzambi mulelela bimpe menemene mu dîna diende dia Yehowa.—Misambu 83:18.

^ Bamue bamanyi ba tshiena Ebelu batu basue kukudimuna dîna dia Nzambi ne: “Yahweh.”

^ Tshikepeshilu tshia dîna dia Nzambi tshia “Yah” tshidi mu Bible misangu mitue ku 50, mu tshiambilu bu mudi “Aleluya,” tshidi tshiumvuija ne: “Tumbishayi Yah.”—Buakabuluibua 19:1.