Lukonko lua kumanya mushinga udi nawu muoyo wetu batu baluela mishindu ya bungi, bu mudi: Bua tshinyi tudiku? Ndi ne muoyo bua kukumbaja tshipatshila kampanda anyi? Bible udi uleja ne: tshipatshila tshitudi bikadile ne muoyo ntshia kudia bulunda ne Nzambi. Mona bulelela budi Bible utubuluila mu malu adi alonda aa.

•   Nzambi udi Mufuki wetu. Bible udi wamba ne: “Nyeye [Nzambi] mene wakatufuka.”​—Misambu 100:3, Mukanda wa Nzambi; Buakabuluibua 4:11.

•   Nzambi udi ne tshipatshila tshidiye mufukile tshintu tshionso tshidiku, nansha tuetu kabidi.​—Yeshaya 45:18.

•   Nzambi uvua mutufuke bikale “dijinga ne malu a mu nyuma” didi dikonga kabidi dijinga dia kujingulula mushinga udi nawu muoyo wetu. (Matayi 5:3) Mmusue bua tukumbaje dijinga dietu adi.​—Misambu 145:16.

•   Dijinga dietu dia malu a mu nyuma tudi tudikumbaja patudi tudia bulunda ne Nzambi. Nansha mudi bakuabu mua kumona bu ne: kudia bulunda ne Nzambi mbualu budi kabuyi mua kukumbana, Bible yeye udi utukankamija ne: “Semenayi pabuipi ne Nzambi ne yeye neasemene pabuipi nenu.”​—Yakobo 4:8; 2:23.

•   Bua tuetu kulua balunda ba Nzambi, tudi ne bua kuikala ne nsombelu udi upetangana ne tshipatshila tshivuaye mutufukile. Bible udi umvuija tshipatshila atshi mu Muambi 12:13: “Tshina Nzambi mulelela ne tumikila mikenji yende, bualu tshiotshi atshi ke tshionso tshine tshivuabu batufukile.”​—Bible wa Good News Translation.

•   Mu matuku atshilualua, pikala Nzambi mujikijile balunda bende badi bamutendelela makenga onso ne mubapeshe muoyo wa kashidi, netuikale mua kumvua tshipatshila tshionso tshivua Nzambi mutufukile bimpe menemene.​—Misambu 37:10, 11.