Tòo. Bible udi wamba patoke ne: Nzambi wakafuka bantu ne “mishindu” mishilashilangane ya nyama ne bikunyibua. * (Genese 1:12, 21, 25, 27; Buakabuluibua 4:11) Udi wamba ne: dîku dijima dia bukua bantu ndifumine kudi Adama ne Eva baledi betu ba kumpala. (Genese 3:20; 4:1) Malu adi mamba mu Bible kaena apetangana ne lungenyi lua ne: Nzambi wakafuka tshintu tshimue bua kuditantshilatshi kulua bukua bintu bishilashilangane bidi ne muoyo lelu nansha. Tshidibi, bulelela budi ne: malu adi bamanyi ba bia panu bamone a dishintulukangana ditu dimueneka mu bungi bua bidimu munda mua mushindu ne mushindu wonso wa bintu bidi ne muoyo, kakuena bualu bua mu Bible budi bubengangana nawu to.

•  Nzambi uvua mushiye bintu biditantshila anyi?

•  Dilongesha dia diditantshila dia bintu didi diumvuangana ne Bible anyi?

•  Kadi netuambe tshinyi bua bukokeshi bua bikunyibua ne nyama bua kudikolela bilondeshile miaba idibi?

 Bena dilongesha dia ne: Nzambi mmufuke kantu kakese mukashiye kaditantshila too ne ku muoyo utudi nawu eu batu ne ngenyi mishilangane ya muvua Nzambi mua kuikala mubienze. Bilondeshile mukanda kampanda wa tshibungu, bamue batu bela meji ne: “Tshimue tshia ku bivua Nzambi mulombole nabi bintu bia panu bua kuditantshila mbukokeshi buabi bua kudikolela bua kushala ne muoyo ne kuvulangana.”​—Encyclopædia Britannica.

 Dilongesha adi ditu kabidi pamuapa ne ngenyi eyi:

•   Bukua bintu bionso bidi ne muoyo mbufumine ku nkambua umuepele wa kale kale.

•   Mushindu kampanda wa bintu bidi ne muoyo udi mua kuditantshila mu bungi bua bidimu kulua mushindu mukuabu wa bintu bia muoyo mushilangane menemene.

•   Nzambi nkayende ngutu wenzeja malu onso au mu mushindu kampanda.

 Bena dilongesha dia ne: Nzambi mmufuke kantu kakese mukashiye kenda kaditantshila too mudiku kapatule bionso bidi ne muoyo panu badi basua kuleja ne: malu a bufuki adi Bible ulonda mu Genese kaena majalame menemene to. Pende Yezu se wakaleja ne: malu a mu Genese au mmalu malelela akenzeka kale. (Genese 1:26, 27; 2:18-24; Matayi 19:4-6) Bible udi wamba ne: kumpala kua Yezu kulua pa buloba, uvua mu diulu ne Nzambi ne uvua mumuambuluishe bua kufikisha “bintu bionso” ku dikalaku. (Yone 1:3) Ke bualu kayi, lungenyi lua ne: Nzambi wakafuka kantu mukashiye kaditantshila too ne pakatulaku mishindu ne mishindu ya bionso bidi ne muoyo kaluena lupetangana ne tshidi Bible ulongesha to.

 Bible kena umvuija tshipidi tshia dishintulukangana didi mua kumueneka mu bungi bua bidimu munda mua mushindu kampanda wa bintu bidi ne muoyo nansha. Kena nansha ubenga bulelela bua ne: nyama ne bikunyibua bidi Nzambi mufuke bilondeshile mishindu yabi bidi mua kukudimuka padibi bienda bilelangana anyi biluangana bua kuibidilangana ne miaba mipiamipia idibi to. Bamue badi bamona kudikolela kuabi bua kuibidilangana ne miaba mipiamipia aku bu diditantshila dia bintu, kadi kudikolela aku kakutu kuanji kubikudimuna bishale bintu bidi ne muoyo bia mushindu mukuabu mupiamupia nansha.