“Padi bantu babi batumpuka bu bisonsa ne benji ba malu mabi bonso batanta, mbua bobu kubutudibua bua kashidi.”​—MISAMBU 92:7.

Anu mutuvua bamone mu tshiena-bualu tshishale, malu mabi adi enda anu avula. Kabiena ne bua kutukemesha to. Bualu Bible ukavua muambe mu 2 Timote 3:1-5 ne: mu “matuku a ku nshikidilu” bantu bavua ne bua kuenza malu mabi menemene. Mmatuku a ku nshikidilu wa tshinyi atudi tuakuila? Tudi tuakula bua matuku a ku nshikidilu wa ndongoluelu eu wa bantu babi badi kabayi basue kutumikila Nzambi. Mu matuku makese emu, Nzambi neabutule bantu badi kabayi balekela kuenza malu mabi. Kadi neashiye anu bantu bimpe, mmumue ne: badi bamutumikila. “Bantu bakane nebapiane buloba, nebasombapu bua kashidi.”​—Misambu 37:29.

“Nzambi udi ufila ditalala neazaze Satana.”​—LOMO 16:20.

Pikala bantu babi, Satana, ne bademon kabatshiyiku, ditalala nedikalaku pa buloba bujima.  Mufuki wetu mmulaye ne: ‘Muntu kakukutshinyisha’ to.​—Mika 4:4.

“Ntenta wa Nzambi udi ne bantu . . . Neakupule tshisonji tshionso ku mêsu kuabu, ne lufu kaluakuikalaku kabidi, nansha madilu, nansha mbila ya miadi.”​—BUAKABULUIBUA 21:3, 4.

Makenga ne masama nebijike bualu Nzambi neajikije ntatu yonso mikebesha kudi Satana, Adama, Eva, ne kudi dipanga dietu dia bupuangane. Ke bualu kayi, nansha “lufu kaluakuikalaku kabidi” to. Bantu badi banange Mufuki wabu ne bamutumikila nebashale ne muoyo kashidi. Kadi nebasombele penyi?

“Tshipela ne buloba bume nebisanke bikole, ne mpata wa tshipela neikale ne disanka ne neele bilongo bu bilongo bia safran.”​—YESHAYA 35:1.

Pabutula Nzambi bantu babi, buloba nebumeneshe bintu bimpe be! Nebuikale ne madimi ne miaba milenga ya kusombela, ne nebupatule biakudia bia bungi. (Misambu 72:16) Mbuu, majiba, ne misulu nebikale anu kezukezu, biuwule tente ne bifukibua bia muoyo. Pamuapa too ne tshiambilu “dinyanguka dia kapepe” katuakutshitela kabidi to! Bantu nebase nzubu ne nebasombelamu. Muntu nansha umue kakupangila muaba wa kulala, kufua nzala, anyi kushala mupele nansha.​—Yeshaya 65:21, 22.

“Nekuikale dibishibua dia bantu ku lufu.”​—BIENZEDI 24:15.

Udi musue kumona kabidi bantu baudi mufuishe anyi? Nzambi wa bukole buonso neababishe ku lufu mu Mparadizu pa buloba. Pawabamona kuakubapanga to, ne bobu pabu kabakukupanga to. Ela meji a bungi bua disanka dinuikala nadi wewe ne bobu! Bua tshinyi tudi batuishibue ne: bantu nebabishibue? Bualu mu Bible mudi bilejilu bia bantu bakole ne bia bana bavuabu babishe ku lufu bapetangane kabidi ne bena mu mêku abu. Bualu bukuabu, Yezu uvua misangu ya bungi mubishe bantu ku lufu mu mêsu a bantu ba bungi.​— Luka 8:49-56; Yone 11:11-14, 38-44.