Kufila dinyoka kudi mua kumvuija kuludika anyi kulongesha. Misangu mikuabu, kudi kukongoloja kululamija bikadilu bibi bia muana. Kadi kutu kutamba kuleja kulongesha muana bikadilu bimpe bidi bimuambuluisha bua kudiangatshila mapangadika mimpe kumpala kua kuenza bualu.

Kukadi bidimu bia bungi bidi baledi kabatshiyi bapesha bana babu dinyoka, batshina ne: dinyoka didi mua kushiya bana kabatshiyi badimona ne mushinga. Kadi baledi ba meji badi belela bana babu mikenji batshintshikila ne babalongesha mua kuyitumikila.

Pamela udi wamba ne: “Mbimpe bana bamanye malu adibu babanyishile bua kuenza ne adibu kabayi mua kuenza bua kubambuluisha bua balue bantu bakulumpe bashindame. Bana bobu kabayi bapeta dinyoka, badi anu bu buatu budi kabuyi ne biipu (nkaya) budi mua kupueka ne mâyi anyi kudishinda.”

Kuikadi ushintuluka to. Muanebe yeye kayi mulonde mikenji iudi mumuelele, mupesha dinyoka. Kadi yeye muyitumikile, muela kalumbandi musangu umue.

Christine udi wamba ne: “Ntu ngela bana banyi kalumbandi bua mudibu batumikila lelu udi bana ba bungi kabatshiyi batumikila baledi babu. Kuela bana kalumbandi kudi kubambuluisha bua kuitaba dinyoka didi dikengedibua bipepele.”

DÎYI DINENE DIA MU BIBLE: “Tshionso tshidi muntu ukuna, ke tshiapuolaye kabidi.”​—Galatiya 6:7.

Kuikadi muena malu makole. Pesha muana dinyoka bilondeshile bukole buende, dimanya diende, ne bunene bua tshilema tshidiye muenze. Dinyoka ditu ditamba kuambuluisha padidi dipetangana ne tshilema tshienza. Tshilejilu, muana yeye wenza mudimu bibi ne telefone, udi mua kumunyengaye bua matuku bungi kampanda. Kadi wewe pebe lekela kufiika munda too ne bua tumalu tua mukodi.

Wendell udi wamba ne: “Ntu nditatshisha bua kumanya bikala muananyi mubenge kutumikila ku bukole anyi mutupakane tshianana. Kudi dishilangana pankatshi pa tshikadilu tshibi tshidi tshikengela kululamija ne tshilema tshidi tshikengela kuleja muntu tshianana.”

DÎYI DINENE DIA MU BIBLE: “Kanuikadi nufiikisha bana benu munda, bua kabateketshi ku muoyo.”​—Kolosayi 3:21.

Ikala ne dinanga. Bana batu batamba kuitaba dinyoka ne baditumikila bobu bamanye ne: baledi babu badi babapesha dinyoka bualu mbabanange.

Daniel udi wamba ne: “Pavua muanetu wenza bilema, tuvua tumukankamija tumuambila ne: tuvua tusanka bua mapangadika mimpe avuaye muangate ku kale. Tuvua tumuleja ne: tshilema tshivuaye muenze katshivua mua kumunyangila lumu yeye mutshilongolole muvuabi bikengela, kabidi ne: tuvuaku bua kumuambuluisha.”

DÎYI DINENE DIA MU BIBLE: “Dinanga didi ne lutulu ne bulenga.”​—1 Kolinto 13:4.