Dîna dia Nzambi nnganyi? Nzambi nkayende udi wamba ne: “Meme ndi Yehowa. Adi ndîna dianyi.” (Yeshaya 42:8) Dîna dia Nzambi didi mu Bible misangu mitue ku 7 000. Kadi mu nkudimuinu ya Bible ya bungi mbadiumbushe ne mbapingaje muanzu bu mudi “Mukalenge” pa muaba wadi. Nzambi mmusue bua wikale mulunda wende, nunku udi ukulomba bua ‘ubile dîna diende.’​—Misambu 105:1.

Mianzu itu nayi Yehowa. Bible udi utela mianzu bu mudi “Nzambi,” “Wa Bukole Buonso,” “Mufuki,” “Tatu,” “Mukalenge,” ne “Mutambe bunene” bua kuakula bua Yehowa. Mu Bible mudi masambila a bungi adi aleja mudibu babikila Yehowa mu mianzu bua kumunemeka ne mu dîna diende dia Yehowa.​—Danyele 9:4.

 Mushindu utu Nzambi. Nzambi nnyuma, katu umueneka to. (Yone 4:24) Bible udi wamba ne: “Kakuena muntu ukadi mumone Nzambi” to. (Yone 1:18) Kadi Bible udi uleja mutuye udiumvua. Bantu badi mua kumubungamija, anyi ‘kumusankisha.’​—Nsumuinu 11:20; Misambu 78:40, 41.

Ngikadilu milenga ya Nzambi. Nzambi katu usunguluja bantu bilondeshile bisamba biabu anyi miaba idibu bakolele to. (Bienzedi 10:34, 35) Udi kabidi Nzambi wa “luse udi uditeka pa muaba wa bakuabu, kena ukuata tshiji lukasa, mmuwule tente ne dinanga dia lulamatu.” (Ekesode 34:6, 7) Kadi udi ne ngikadilu minene inayi idi isankisha.

Bukole. Bu mudiye “Wa Bukole Buonso” udi ne bukole budi kabuyi ndekelu bua kukumbaja bualu buonso budiye ulaya.​—Genese 17:1.

Meji. Nzambi udi ne meji adi mapite a muntu kayi yonso. Ke tshidi Bible usua kumvuija padiye wamba ne: “Udi nkayende muena meji.”​—Lomo 16:27.

Buakane. Nzambi utu anu wenza malu makane. Bienzedi biende ‘mbipuangane’ ne katu “wenza bibi” to.​—Dutelonome 32:4.

Dinanga. Bible udi wamba ne: “Nzambi udi dinanga.” (1 Yone 4:8) Nzambi katu anu uleja dinanga patupu to, kadi yeye muine udi dinanga. Dinanga nngikadilu wende mutambe bunene utu umusaka bua kuenza bionso bituye wenza, ne ditu dituambuluisha mu mishindu ya bungi.

Malanda adi Nzambi mudie ne bantu. Nzambi n’Tatu wetu wa mu diulu udi mutunange. (Matayi 6:9) Tuetu bamuitabuje tudi mua kulua balunda bende. (Misambu 25:14) Bushuwa, Nzambi udi ukulomba bua usemene pabuipi nende mu disambila ne ‘umupuile ntatu yebe yonso, bualu yeye udi ukutabalela.’​—1 Petelo 5:7; Yakobo 4:8.

Yezu ki n’Nzambi to. Yezu mmuntu wa pa buende bualu yeye nkayende ke uvua Nzambi mufuke buludiludi. Ke bualu kayi Bible udi umubikila ne: Muana wa Nzambi. (Yone 1:14) Yehowa mumane kufuka Yezu muanende muanabute, wakenza nende mudimu bu “muena mudimu mupiluke” bua kufuka  bintu bionso ne bantu kabidi.​—Nsumuinu 8:30, 31; Kolosayi 1:15, 16.

Yezu katu muanji kudiamba mudiye Nzambi to. Kadi wakamba ne: “Ndi muleji mpala udi ufuma [kudi Nzambi] ne Yeye au ke uvua muntume.” (Yone 7:29) Pavua Yezu uyukila ne umue wa ku bayidi bende wakabikila Yehowa ne: “Tatu wanyi ne Tatu wenu” ne “Nzambi wanyi ne Nzambi wenu.” (Yone 20:17) Yezu mumane kufua, Yehowa wakamubisha kuyaye mu diulu, ne kumupeshaye muanzu munene ku tshianza Tshiende tshia balume.​—Matayi 28:18; Bienzedi 2:32, 33.

Yezu Kristo udi mua kukuambuluisha bua kudia bulunda ne Nzambi

Yezu wakalua pa buloba bua kulongesha bantu malu a Tatuende. Yehowa nkayende wakamba bua Yezu ne: “Eu udi Muananyi, munanga. Mutelejayi.” (Mâko 9:7) Yezu mmumanye Nzambi bimpe kupita muntu kayi yonso. Wakamba ne: “Kakuena muntu udi mumanye Tatu, anu Muana ne muntu yonso udi Muana musue kumusokoluelaye.”​—Luka 10:22.

Yezu utu widikija ngikadilu ya Nzambi mu mushindu muimpe menemene. Yezu wakidikija ngikadilu ya Tatuende bimpe menemene, kufikaye ku diamba ne: “Muntu yonso udi mummone mmumone kabidi Tatu.” (Yone 14:9) Yezu wakakoka bantu kudi Nzambi bualu uvua uleja dinanga dia Tatuende mu mêyi ne mu bienzedi. Wakamba ne: “Meme ndi njila ne bulelela ne muoyo. Muntu kena mua kulua kudi Tatu kayi mupitshile kundi to.” (Yone 14:6) Wakamba kabidi ne: “Batendeledi balelela [badi] ne bua kutendelela Tatu ne nyuma ne bulelela, bualu, bushuwa, Tatu udi ukeba bua bantu ba nunku bamutendelele.” (Yone 4:23) Anji umvua pebe! Yehowa udi wenda ukeba bantu badi basue kumanya bulelela budi bumutangila anu bu wewe.